بۇقارالىق اقپارات قۇرالدارىنىڭ وكىلدەرى اراسىندا داستۇرگە اينالعان ۆاQ ليگا چەمپيوناتىنىڭ جازعى ماۋسىمى اياقتالدى.
ءتورتىنشى مارتە ۇيىمداستىرىلىپ وتىرعان بىرىنشىلىككە بۇل جولى ايتارلىقتاي وزگەرىس ەنگىزىلدى. باستى ەرەكشەلىگى – ليگا «ا» جانە «ۆ» بولىپ, ەكى توپقا ءبولىندى.
«Elorda Aqparat» ۇجىمى وتكەن قىسقى ماۋسىمعا قاتىسپاعانى سەبەپتى «ۆ» توبىنداعى كوماندالارمەن كۇش سىناستى. جەتى كوماندا باس قوسقان بايگەدە ارىپتەستەرىمىز 12 ويىن وتكىزىپ, سونىڭ ەكەۋىندە عانا تەڭ تۇسسە, قالعان ماتچتاردا جەڭىسكە جەتتى. باس-اياعى 32 ۇپاي جيناپ, قارسىلاستارىنان قارا ءۇزىپ كەتتى. ءسويتىپ «ۆ» ليگاسىنىڭ مەرزىمىنەن بۇرىن چەمپيونى اتاندى. ال ەكىنشى ورىنعا 24 ۇپايمەن تۇراقتاعان «حابار 24» جىگىتتەرى دە قىسقى ماۋسىمدى جوعارى ليگادا وتكىزەتىن بولدى. ال 21 ۇپاي جيناعان «Qazaqstan» تەلەارناسى ۇجىمىنىڭ دا ءدال وسى جەتىستىككە جەتەر مۇمكىندىگى بولىپ ەدى. الايدا شەشۋشى كەزدەسۋدە «سپورت 59» كومانداسىنا 1:6 ەسەبىمەن جول بەرىپ قويدى.
ءتۋرنيردىڭ سوڭعى كۇنى ماۋسىم بويى كوزگە تۇسكەن ويىنشىلار نازاردان تىس قالماي, ارنايى نوميناتسيالارمەن ماراپاتتالدى. قارسىلاستار قاقپاسىن 26 رەت تۋلاتقان, قاتارلاستارىنان وزا شاپقان «ەلوردالىق» بەكساتتار ساتتار «ۇزدىك سۇرمەرگەن», سونىمەن قاتار «ۇزدىك شابۋىلشى» اتاعىن السا, «ۇزدىك ويىنشى» نوميناتسياسىندا «ەلوردا اقپاراتتىڭ» كاپيتانى – ەلتاي نۇرعازين توپ جاردى. ال «ۇزدىك قورعاۋشى» سىيلىعى «حابارلىق» ايات دۇيسەمباەۆقا بۇيىرسا, «قالامگەر» قاقپاشىسى قانات بازىلحان وزگەلەردەن ءبىر ساتى جوعارى بولدى.
ال «ا» ليگاسىندا «حابار» اگەنتتىگىنىڭ جىگىتتەرى كەزەكتى رەت جەڭىسكە جەتسە, ەل گازەتى – «ەگەمەن قازاقستان» ۇجىمى جەڭىمپازدان ەكى ۇپايعا قالىپ, كۇمىس جۇلدەگەر اتاندى. ال قولا مەدال اقپارات جانە كوممۋنيكاتسيالار مينيسترلىگىنىڭ تساي كومانداسىنا بۇيىردى. ليگانىڭ «ۇزدىك ويىنشى» سىيلىعىنا «Qazmedia» كومانداسىنىڭ شابۋىلشىسى قۇماربەك ازات يە بولدى.
جازدان شىعىپ كۇزگە ۇلاسقان باسەكەنىڭ كىل مىقتىلارىن ماراپاتتاۋعا قازاقستان فۋتبول فەدەراتسياسى پرەزيدەنتىنىڭ كەڭەسشىسى, قازاق فۋتبولىنىڭ اڭىزىنا اينالعان سەيدىلدا بايشاقوۆ, «Elorda Aqparat» جشس ديرەكتورى قايسار جۇمابايۇلى, «ەگەمەن قازاقستان» گازەتىنىڭ باسشىسى دارحان قىدىرالى, «حابار» اگەنتتىگى اق توراعاسىنىڭ ورىنباسارى رەنات كەرتاەۆ, بەلگىلى سپورت كوممەنتاتورى امانگەلدى سەيىتحان سەكىلدى ەلەۋلى ازاماتتار قاتىستى.
ءوز كەزەگىندە سەيدىلدا بايشاقوۆ «ۇزدىك ويىنشى» اتاعىن العان ەلتاي نۇرعازينگە جۇلدەسىن تابىستاپ تۇرىپ, جارىسقا قاتىسقان بارلىق جۋرناليستەردى, جارىستى ۇيىمداستىرۋشىلاردى چەمپيوناتتىڭ ءساتتى اياقتالۋىمەن قۇتتىقتاپ, وسىنداي تۋرنيرلەردىڭ داستۇرگە اينالۋى بۇقارالىق سپورتتىڭ جاندانعانىن كورسەتەدى دەپ اتاپ ءوتتى.
ايتا كەتسەك, «Elorda Aqparat» ۇجىمى وتكەن جازدا, ياعني «ۆاQ ليگانىڭ» ەكىنشى ماۋسىمىندا كۇمىس جۇلدەگەر اتانعان بولاتىن. سونداي-اق بيىل جازدا سەيداحمەت بەردىقۇل اتىنداعى ءداستۇرلى رەسپۋبليكالىق ءتۋرنيردىڭ ءفيناليسى بولدى.
سونىمەن الا جازداي جۋرناليستەر قاۋىمىن الا دوپقا ارباعان قىزىقتى دا تارتىستى فۋتبول مەرەكەسى دە مارەسىنە جەتتى. جارىستىڭ نەگىزگى ۇيىمداستىرۋشىسى «ۆاQ ليگا» جوباسىنىڭ جەتەكشىسى ءازيز ءجۇمادىل مىرزاعا العىس بىلدىرەمىز.
