قارالى كۇن جاريالاندى
يران ەلىنىڭ احۆاز قالاسىنا تەررورلىق شابۋىل جاسالىپ, 30-عا جۋىق ادام قازا بولدى. بۇعان قوسا, 60-تان اسا تۇرعىن ءتۇرلى دەڭگەيدە جاراقات الدى.
قاندى شابۋىل وتكەن سەنبى كۇنى اسكەري شەرۋ كەزىندە بولدى. تريبۋنا ارتىندا اسكەري كيىم كيگەن بەلگىسىز بىرەۋلەر اينالاسىنا وق جاۋدىرعان. حۋزەستان پروۆينتسياسى گۋبەرناتورىنىڭ مالىمەتى بويىنشا ءتورت ادام شابۋىل جاساپ, ولاردىڭ ۇشەۋى وقيعا ورنىندا مەرت بولسا, قالعان بىرەۋى اۋرۋحانادا كوز جۇمعان. دەگەنمەن كوپ ۇزاماي بۇل ارەكەتتى «ال-احۆازيا» مەن دايش سودىرلار توبى ءوز موينىنا الدى.
«احۆازداعى تەراكت دۇشپانداردىڭ يران حالقى مەن مەملەكەتىن جويۋدى كوزدەيتىنىن بىلدىرەدى. الايدا مۇنداي قايعىلى جاعداي قايتا بىرلىگىمىزدى كۇشەيتە تۇسەدى» دەيدى ەل ۇكىمەتىنىڭ حابارلاماسىندا. بۇعان قوسا, يران ۇكىمەتى وسى ىسكە قاتىسى بار كۇدىكتىلەر تولىعىمەن انىقتالىپ, ءتيىستى جازاسىن الاتىنىن ءمالىم ەتتى.
دۇيسەنبى كۇنى يراندا جالپى ازا تۇتۋ كۇنى بولىپ بەلگىلەندى. ال تەراكتىدەن قازا بولعانداردى جەرلەۋ ءراسىمى احۆازدا وتەدى.
بوسقىندارعا شەكتەۋ قويىلماق
اقش پرەزيدەنتى دونالد ترامپ اكىمشىلىگى مەملەكەتتىڭ جەڭىلدىكتەرىن پايدالاناتىن يمميگرانتتارعا قاتىستى فەدەرالدى نورمانى قابىلداۋدى ۇسىنادى.
بۇل نورما بويىنشا ازىق-تۇلىك تالوندارى, Medicaid باعدارلاماسى بويىنشا مەديتسينالىق كومەك الۋ سەكىلدى يمميگرانتتارعا ارنالعان جەڭىلدىكتەر ەندى قيىنداي تۇسپەك. سول سياقتى اقش ازاماتتىعىن الۋ, Green Card ماسەلەسى دە قايتا قارالادى.
اقش-تىڭ ىشكى قاۋىپسىزدىك مينيسترلىگىنىڭ مالىمەتىنە سايكەس, بۇل نورما بوسقىندار مەن قۇراما شتاتتارعا باس ساۋعالاپ كەلگەندەرگە قولدانىلمايدى. دونال ترامپ اكىمشىلىگى بۇل باستامانى اسكەري قىزمەتكەرلەرگە دە قولدانباۋدى ۇسىنىپ وتىر.
ايتا كەتەيىك, بىلتىر نيۋ-يوركتەگى قاندى وقيعادان كەيىن ەل پرەزيدەنتى Green Card ۆيزالىق لوتەرەياسىنان باس تارتاتىنىن ءمالىم ەتكەن.
ەڭ العاشقى جانۋار انىقتالدى
ارحەولوگتار اق تەڭىز ماڭايىنان ەڭ العاشقى جانۋاردىڭ ءىزىن انىقتادى.
عالىمدار وعان ديكونسونيا دەگەن اتاۋ بەرىپ وتىر. باستاپقى زەرتتەۋ بويىنشا ونىڭ ۇزىندىعى مەن ەنى شامامەن 1,4 مەتردى قۇرايدى. بۇعان قوسا, تىرشىلىك يەسىنىڭ سۋ جانۋارى بولعانى انىقتالدى. ال سۇيەكتەرىنە تالداۋ جۇرگىزىلىپ, ونىڭ 558 ميلليون جىل بۇرىن ءومىر سۇرگەنى بەلگىلى بولدى.
باس مامان يوحەن بروكستىڭ ايتۋىنشا, الداعى ۋاقىتتا العاشقى جانۋار جايلى تولىعىمەن زەرتتەۋ جۇمىستارى جۇرگىزىلىپ, انىق-قانىعى جاريالانباق. سونىمەن قاتار, وسى ارقىلى جەر بەتىندە ءومىر سۇرگەن العاشقى جانۋار تۋرالى داۋ باسىلاتىنىن جەتكىزدى.
ايان ءابدۋالي
