ەلوردا اكىمدىگىنىڭ قولداۋىمەن باس قالادا «Tamos Space School» اتتى جەكەمەنشىك مەكتەپ قۇرىلىسىنىڭ العاشقى كىرپىشى قالاندى. ول ءبىلىم بەرۋ سالاسىندا 25 جىلدان اسا ۋاقىت بويى تانىمال «Tamos» برەندى بويىنشا جۇمىس ىستەيتىن استاناداعى العاشقى مەكتەپ بولماق. جالپى, بۇگىنگى تاڭدا قالالىق اكىمدىكتىڭ, ءبىلىم جانە عىلىم مينيسترلىگىنىڭ, «قارجى ورتالىعى» اق جانە «Astana Invest» مەكەمەسىنىڭ بىرلەسۋىمەن 21 جەكەمەنشىك مەكتەپتىڭ قۇرىلىسى جوسپارلانۋدا. تومەندەگى ماقالادا سولاردىڭ بىرقاتارىنا شولۋ جاساعان ەدىك.
ساباققا ستيمۋل بەرەتىن smart-up تەحنولوگيالار قولدانىلادى
جوعارىدا اتالعان «Tamos Space School» مەكتەبى 800 وقۋشىعا ارنالىپ سالىنادى. جاڭا ءبىلىم ورداسىنىڭ اشىلۋى 2020 جىلعى 1 قىركۇيەككە جوسپارلانعان. وعان فيزيكا-ماتەماتيكا باعىتى بويىنشا 4-سىنىپقا دەيىنگى وقۋشىلار قابىلدانادى. «Tamos Education» مەكتەبىنىڭ نەگىزىن قالاۋشى داۋرەن قاۋپىنباەۆتىڭ ايتۋىنشا, مۇندا بالالار PBL, ياعني Problem Based Learning ءادىسى ارقىلى فيزيكا, ماتەماتيكا جانە حيميا پاندەرىن ءبىر-بىرىنەن بولمەي تەرەڭدەتە وقيدى. سونداي-اق عارىش تەحنولوگيالارىنا باعىتتالعان ساباقتار مەن عارىش ورتالىعى وكىلدەرىنىڭ دارىستەرى دە وتەدى. ءتىپتى «قازاقستان عارىش ساپارى» كومپانياسى تاراپىنان قانداي دا ءبىر مامانداردى دايارلاۋعا تاپسىرىستار دا ءتۇسۋى مۇمكىن.
– شاكىرتتەردىڭ ساباق وقۋىنا ستيمۋل بەرەتىن smart-up تەحنولوگيالار قولدانىلادى. سونىمەن قوسا, ولار ءاربىر جۇمىستىڭ كاپيتاليزاتسيالانۋى كەرەكتىگىنە ۇيرەنەدى. ماسەلەن, بالا مەكتەپكە كەلىپ, ەجەلگى قالالارعا ۆيرتۋالدى ساياحات جاساعاندا, بەلگىلى ءبىر تاپسىرمالاردى ورىنداعانى ءۇشىن دراحمالارعا يە بولادى. مۇنداي ەجەلگى گرەكيالىق تيىندار وعان وقۋ قاۋىمداستىعىندا بەلگىلى ءبىر ستاتۋس بەرەدى, – دەيدى مەكتەپ باسشىسى.
ءححى عاسىرعا كەرەكتى نەگىزگى قابىلەتتەردى يگەرىپ شىعادى
ەسىل اۋدانىنداعى ءا.بوكەيحانوۆ, ۇلى دالا جانە №38 كوشەلەردىڭ قيىلىسار تۇسىندا كەلەر جىلعى ناۋرىزعا دەيىن Seed School اتتى تاعى ءبىر جەكەمەنشىك مەكتەپتىڭ كەڭەيتىلگەن قۇرىلىسى باستالادى. Seek (ىزدەنىس), Explore (زەرتتەۋ), Experiment (تاجىريبە), Discover (اشۋ) دەگەن ۇراندى نەگىزگە العان بۇل مەكتەپتە وقۋشىلار ماتەماتيكانى, تىلدەردى, ءىت-تەحنولوگيانى جانە ىسكەرلىك ءبىلىمدى تەرەڭدەتە وقيدى.
– مەكتەپتە 0-سىنىپتان باستاپ بيلينگۋالدى وقىتۋ جۇيەسى قولدانىلادى. بالالاردىڭ تۇلعا رەتىندە جان-جاقتى دامۋى ءۇشىن نەگىزگى ساباقتارمەن قاتار, سپورت ۇيىرمەلەرى (فۋتبول, تحەكۆوندو, حورەوگرافيا, بي), ينتەللەكتۋالدىق ۇيىرمەلەر (شاحمات, قارجىلىق جانە زاڭي ساۋاتتىلىق, ىسكەرلىك ءبىلىم), تىلدىك كۋرستار (قازاق, اعىلشىن جانە نەمىس تىلىندەگى جۋرناليستيكا, قىتاي ءتىلى), شىعارماشىلىق (ۆوكال, بەينەلەۋ ونەرى, ديزاين, مودەلدەۋ, اسپازدىق ونەر) جانە ساۋىقتىرۋ پروتسەدۋرالارى سەكىلدى قوسىمشا شارالار ەنگىزىلگەن. بۇلاردىڭ ارقاسىندا بالا ءححى عاسىرعا كەرەكتى نەگىزگى قابىلەتتەردى يگەرىپ شىعادى, – دەيدى «Math-Language SEED School» مەكەمەسىنىڭ ديرەكتورى گۇلسىم ەگىزباەۆا.
سينگاپۋرلىق ءبىلىم جۇيەسىنە سۇيەنەدى
جاقىن جىلدارى ەلوردادا بوي كوتەرەتىن يننوۆاتسيالىق مەكتەپتەردىڭ ءبىرى «Singapore International School Kazakhstan» دەپ اتالادى. دۇنيە ءجۇزى بويىنشا 15-كە تارتا ەلدە بولىمدەرى بار بۇل ءبىلىم مەكەمەسى ەندى كىشكەنتاي نۇر-سۇلتاندىقتاردى دا ساپالى بىلىممەن سۋسىنداتۋدى كوزدەيدى. سينگاپۋر ينۆەستورلارى سالعالى جاتقان بۇل جوبانىڭ باستى ەرەكشەلىگى – ونىڭ وقۋشىلارعا ارنالعان قالاشىق رەتىندە اشىلاتىنىندا: ياعني وقۋ كورپۋستارىنان بولەك, كامپۋستا جاتاقحانالار دا تۇرعىزىلادى. جالپى كولەمى 3,04 ملرد تەڭگە ينۆەستيتسيا قۇيىلعان مەكتەپ 2021-2022 جىلدارى پايدالانۋعا بەرىلۋى مۇمكىن. حۋسەين بەن تالال كوشەسى مەن №38 كوشەنىڭ قيىلىسىنان قونىس تەبەتىن مەكتەپتە 1200 بالا وقيدى دەپ كۇتىلۋدە. ولار سينگاپۋرلىق ءبىلىم بەرۋ جۇيەسىنە نەگىزدەلگەن باعدارلاما بويىنشا ءبىلىم الادى.
سينگاپۋرلىق ءبىلىم جۇيەسىنە ءسۇيەنىپ وقىتاتىن تاعى ءبىر ەلوردالىق مەكتەپتىڭ قۇرىلىسىن كەلەر جىلى «Smart Astana» جشس كومپانياسى باستاماقشى. شامامەن 6 ملرد تەڭگەدەن اسا ينۆەستيتسيا قۇيىلاتىن بۇل مەكتەپ 600 بالاعا شاقتاپ سالىنادى. وندا 1-سىنىپتان باستاپ ماتەماتيكا, ينفورماتيكا, تەحنولوگيا, ديزاين جانە ونەر پاندەرى اعىلشىن تىلىندە جۇرگىزىلەتىن بولادى.
تۇلەكتەرى الەمدەگى 100 ۇزدىك جوو-عا شاقىرتۋلار الادى
2018 جىلى اشىلعان «Astana Garden School» مەكتەبى كەڭەيىپ, ەندى تەك جوعارى سىنىپ وقۋشىلارىن عانا ەمەس, باستاۋىش سىنىپ شاكىرتتەرىن دە وقىتپاقشى. تولىق تسيكلدى جاڭا مەكتەپ 900 بالانى قامتيدى. ول ماڭگىلىك ەل مەن ۇلى دالا كوشەلەرىنىڭ قيىلىسىندا ورىن تەبەدى. جوبانىڭ ينيتسياتورى – وكسفورد مەن كەمبريدج ۋنيۆەرسيتەتتەرىنىڭ تۇلەكتەرى قۇرعان «Central Asia Garden Schools» كومپانياسى, ولار ون جىلعا تارتا قازاقستاندىق نارىقتا تابىستى جۇمىس ىستەپ كەلەدى. تابىستىلىعى سول, مەكتەپتى بىتىرۋشىلەر الەمنىڭ 100 ۇزدىك جوو-عا شاقىرتۋلار الادى.
وتاندىق ينۆەستورلار ەسەبىنەن بوي كوتەرەتىن جاڭا مەكتەپتەردىڭ قاتارىندا Alpamys School دا بار. بۇعان دەيىن اتالعان مەكتەپ 6-سىنىپقا دەيىنگى وقۋشىلاردى عانا قابىلدايتىن. ەندى ول ودان ءارى كەڭەيىپ, قوسىمشا 900 شاكىرتتى قامتيتىن بولادى. جالپى كولەمى 4,5 ملرد تەڭگە ينۆەستيتسيا قۇيىلعان ءبىلىم ورداسى ۇلى دالا مەن تۇران كوشەلەرىنىڭ قيىلىسىندا ورنالاسادى. ەرەكشەلىگى سول, وندا بالالار ساعات تاڭعى 8-دە كىرگەننەن كەشكى 6-عا دەيىن ساباقتارىن وقىپ قانا قويماي, قوسىمشا ۇيىرمەلەرگە دە قاتىسا الادى.
60,7 ملرد تەڭگە ينۆەستيتسيا تارتىلعان
– رەسمي دەرەكتەرگە سۇيەنسەك, قازىرگى كۇنى ەلوردادا 180 مىڭنان اسا بالا مەكتەپكە بارادى. 2020-2021 جىلدارى بۇل كورسەتكىش 210 مىڭعا جۋىقتايدى دەپ كۇتىلۋدە. ويتكەنى قالانىڭ اۋماعى دا ءوسىپ جاتىر, سونداي-اق استاناعا كوشىپ كەلۋشىلەر دە كوبەيۋدە. وسىنىڭ سالدارىنان تۋىندايتىن مەكتەپتەردەگى ورىن جەتىسپەۋشىلىك ماسەلەسىن شەشۋدە جوعارىداعى يننوۆاتسيالىق ءبىلىم وردالارىنىڭ كومەگى كوپ بولادى دەپ ويلايمىن, – دەيدى «Astana Invest» كومپانياسى باسقارما توراعاسىنىڭ ورىنباسارى مۇحامەد كابۋلدينوۆ.
اتالمىش مەكەمەنىڭ ينۆەستيتسيالىق جوبالار دەپارتامەنتىنىڭ ديرەكتورى داۋرەن بايدۇيسەنوۆتىڭ ايتۋىنشا, قازىرگى تاڭدا ءبىلىم سالاسىنا 21 جوبا بويىنشا جالپى كولەمى 60,7 ملرد تەڭگە ينۆەستيتسيا تارتىلعان, ونىڭ ىشىندە 5 جوبانى ىسكە اسىرۋ ءۇشىن كەلىسىمشارتتار جاسالعان. «بۇل نۇر-سۇلتان قالاسىنىڭ شەتەلدىك جانە وتاندىق ينۆەستورلار ءۇشىن ىڭعايلى ورتا ەكەنىن كورسەتەدى. ينۆەستورلاردان تۇسەتىن تابىس تا ءوز كەزەگىندە ەلوردانىڭ ەكونوميكاسىنا جاعىمدى اسەر ەتەتىنى ءسوزسىز» دەيدى كومپانيا وكىلى.
