«استانا» كونتسەرت زالىندا سىدىق مۇحامەدجانوۆ, ءابىلاحات ەسپاەۆ, تەمىرجان بازارباەۆ سەكىلدى كورنەكتى كومپوزيتورلاردىڭ شىعارماشىلىعىنا ارنالعان «ۇمىتىلماس اندەر» اتتى كەش ءوتتى. ەلوردانىڭ مەملەكەتتىك اكادەميالىق فيلارمونياسى ۇيىمداستىرعان كەشتە ونەر وشاعىنىڭ ۇجىمدارىمەن قاتار قازاقستان جانە تاتارستاننىڭ حالىق ءارتىسى نۇرجامال ۇسەنباەۆا, قازاقستاننىڭ ەڭبەك سىڭىرگەن ءارتىسى باعدات سامەدينوۆا, قازاقستاننىڭ ەڭبەك سىڭىرگەن قايراتكەرلەرى التىناي جوراباەۆا مەن ايگۇل قوسانوۆا اتالعان مۋزىكا مايتالماندارىنىڭ اندەرىن اۋەلەتە سالدى.
وتكەن عاسىردىڭ 50-60-جىلدارى قازاق ونەرىنە ءبىر شوعىر تاماشا كومپوزيتورلار كەلدى. ولار وزدەرىنىڭ كلاسسيكالىق شىعارمالارى مەن ەسترادالىق اندەرىمەن ۇلتتىق مۋزىكانى بايىتتى. سونىڭ ءبىرى – كسرو جانە قازكسر حالىق ءارتىسى, مەملەكەتتىك سىيلىقتىڭ لاۋرەاتى سىدىق مۇحامەدجانوۆتىڭ تۋعانىنا جاقىندا 95 جىل تولدى. ارتىنا مول مۇرا قالدىرعان شىعارماشىلىق يەسى وپەرالاردى, سيمفونيالاردى, وراتوريالاردى, اندەردى, رومانستاردى تۋدىرىپ, حورلار مەن كونتسەرتتەرگە, درامالىق قويىلىمدار مەن كينوفيلمدەرگە ارناپ مۋزىكا جازدى. وسى كەشتە ونىڭ «شاتتىق وتانى» سيمفونياسى قالىقتاپ, ۇلى ابايدىڭ ولەڭدەرىنە جازىلعان اندەر, ت.ب. تۋىندىلارى شىرقالدى. سونىڭ ىشىندە ءانشى مۇراتبەك حايرولدا مەن تالانتتى ءبيشى كوركەم شولوشوۆا «قىرمانعا كەل, قالقاتاي» انىمەن تاماشا كورىنىس قويىپ, كورەرمەندەردىڭ كوڭىلىن كوتەردى.
ءابىلاحات ەسپاەۆ 240-قا جۋىق اندەر مەن رومانستاردىڭ اۆتورى. 8 سپەكتاكل كومپوزيتوردىڭ مۋزىكاسىمەن كوركەمدەلىپ, ساحناعا جول تارتتى. ال بارىمىزگە تانىس «اققۋىم», «اق ساۋلە», «مارجان قىز», «ۇستازىم», «قايداسىڭدار, دوستارىم» سىندى اندەرى قازاق مۋزىكاسىنىڭ التىن قورىنا ەنگىزىلدى. كونتسەرتكە جينالعان قاۋىم وسى اندەرمەن سۋسىنىن قاندىرىپ, جانسارايلارىن اشتى.
قازاقستاننىڭ ەڭبەك سىڭىرگەن ونەر قايراتكەرى تەمىرجان بازارباەۆتىڭ «اۋىلىم», «تاماشا» اندەرى تالايلارىمىزدىڭ جۇرەگىمىزدى تەربەيدى. ونىڭ ليريك اقىن تۇمانباي مولداعاليەۆتىڭ ولەڭىنە جازىلعان «قازدار قايتقاندا» ءانىن ايگۇل قوسانوۆا ەستراداعا ادەمى سالعان ەدى. وسى جولى تانىمال ءانشى بۇل تۋىندىنى سيمفونيالىق وركەستردىڭ سۇيمەلدەۋىمەن ءبىر مىسقال كەم ەمەس ايتتى. كورەرمەندەر كونتسەرتتە ەشقاشان ەسكىرمەيتىن اندەردى تىڭداپ, ءبىر دەمالىپ قالدى.
