ە توبى: برازيليا. شۆەيتساريا. كوستا-ريكا. سەربيا
تۋرنيردەگى ەڭ كوڭىلدى توپ – وسى. فۋتبول ماماندارى بۇلارعا وسىنداي باعا بەرىپتى. برازيليا ىرىكتەۋ كەزەڭىندە كەرەمەت وينادى. كوستا-ريكا, ادەتتەگىدەي, «بۇكىل كوماندا بولىپ شابۋىلعا شىعاتىندارىن, ار جاعىن سوسىن كورە جاتاتىنىن» ايتىپ جاتىر. سەربتەر مەن شۆەيتساريالىقتار دا بىرەۋدەن ايىلدارىن جيا قويمايدى. دەمەك, ءبارى دە ناتيجەلى پەرفورمانس كورسەتىپ, ەڭىستەن سالسا, توسكە وزعالى تۇر. بىراق برازيليالىقتاردىڭ ءبارىبىر كوش باسىندا تۇراتىنىنا ءشۇبا كەلتىرۋ قيىن. ال ەكىنشى ورىننىڭ تاعدىرى قالعان ءۇش قۇراما اراسىندا شەشىلەدى.
برازيليا قۇراماسى
برازيليا كومانداسى وڭتۇستىك امەريكا ايماعىندا وزىنەن كەيىنگى ۋرۋگۆايدان 10 ۇپاي العا كەتىپ, عالامات جەڭىسكە جەتتى. قۇراما ليدەرى نەيماردىڭ توڭىرەگىنە توپتاسقان جاساق ءتۋرنيردى باستان-اياق ءبىر لەپپەن وتكىزدى.
جاھاندا چەمپيوندىق اتاق جونىنەن «پەنتاكامپەوننان» وزاتىن قۇراما جوق. ول 1958, 1962, 1970, 1994 جانە 2002 جىلدارى 5 رەت توپ جاردى. سونىڭ ىشىندە 1970 جىلى مەكسيكادا وتكەن مۋنديالدا ءۇشىنشى رەت كۋبوكتى جەڭىپ العاسىن, «التىن نيكە» پەلە باستاعان قۇرامادا ماڭگىگە قالدىرىلدى.
بارلىق 20 چەمپيوناتقا قاتىسقان جالعىز كوماندا سولاردا جەتكەن جەڭىستەرى جونىنەن دە رەكوردشى اتانىپ وتىر. ول 107 كەزدەسۋدە 70 مارتە باسەكەلەسىنەن باسىم تۇسكەن. بۇدان بولەك, كونفەدەراتسيا كۋبوگىن 4 مارتە (1997, 2005, 2009, 2013) ۇتىپ السا, وڭتۇستىك امەريكا چەمپيوناتىندا 8 رەت (1919, 1922, 1949, 1989, 1997, 1999, 2004, 2007) التىن جۇلدەگە قول جەتكىزدى. ال 2016 جىلى ريودا وتكەن وليمپيادادا تۇڭعىش رەت چەمپيون اتاندى.
برازيليانىڭ تاعى ءبىر رەكوردى, ول 7 فينالدىق تۋرنيردە جەڭىلىپ كورگەن جوق. بىراق بۇل 1972 جانە 1986 جىلدارى ونىڭ ءبىرىنشى بولۋىنا مۇمكىندىك بەرە المادى.
شۆەيتساريا قۇراماسى
شۆەيتساريا ىرىكتەۋ تۋرنيرىن ەۋروپانىڭ قازىرگى چەمپيونى – پورتۋگاليانى ۇتۋدان باستاپ, بۇدان كەيىن 8 ماتچتا جەڭىسكە جەتتى. بىراق ەڭ سوڭىندا پورتۋگالدارمەن قارىمتا كەزدەسۋدە ۇتىلىپ, ەكىنشى ورىنعا سىرعىپ كەتتى. ءبىرىنشى ورىن بۇلارمەن ۇپايى تەڭ بولعانىمەن, دوپ ايىرىمى جاقسى قارسىلاستارىنا بۇيىردى. ال رەسەيگە كەلۋگە مۇمكىندىك بەرەتىن جولدامانى سولتۇستىك يرلانديامەن قايتپا-قايت كەزدەسۋدە 1:0, 0:0 ەسەبىمەن ۇتىسقا جەتۋ ارقىلى جەڭىپ الدى.
الداعى چەمپيونات شۆەيتساريالىقتار ءۇشىن وسىنداي 11-ءىنشى باسەكە بولماقشى. بۇعان دەيىن ولار تۋرنيردە شيرەك فينالدان ارى اسىپ كورگەن جوق.
قۇرامانىڭ ەڭ ۇلكەن تابىسى 1924 جىلى الەم چەمپيوناتىندا كۇمىس جۇلدە جەڭىپ الۋى بولدى
كوستا-ريكا قۇراماسى
ەكى امەريكانىڭ ورتاسىندا جاتقان مويناقتاعى ەلدىڭ كومانداسى كونكاكاف ايماعىن قامتىعان ەلەكتىك جارىستا ەكىنشى ورىن الۋى ارقىلى كەزەكتى مۋنديالعا كەلىپ وتىر. بۇدان ءتورت جىل بۇرىن بۇل ەلدىڭ تەرمە جاماعاتى شيرەك فينالعا دەيىن بارىپ, ءوز تاريحىنداعى ەڭ ۇلكەن جەڭىسكە جەتىپ ەدى.
كوستا-ريكا وسى جولى بەسىنشى مارتە جاھاندىق جارىستا ونەر كورسەتەدى. كوماندا 1963, 1969, 1989 جىلدارى سولتۇستىك امەريكانىڭ چەمپيونى بولدى.
سەربيا قۇراماسى
سەرب فۋتبولشىلارى 10 ماتچتىڭ 6-ۋىندا جەڭىسكە جەتىپ, كۇشتەرى ءبىر-بىرىمەن شامالاس يرلانديا, ۋەلس جانە اۆستريا باس قۇراعان ىرىكتەۋ توبىندا ءبىرىنشى ورىن الدى. بىراق قۇرامانى وسىنداي جەڭىسكە جەتكىزگەن سلاۆوليۋب مۋسلين مىندەتىن ورىنداعان بويدا وتستاۆكاعا جىبەرىلدى. فەدەراتسيا پرەزيدەنتى سلاۆيش كوكەز مۇنى ونىڭ تالانتتى جاس فۋتبولشىلاردى الۋدان باس تارتۋىمەن ءتۇسىندىردى. ماسەلە مىنادا, بۇل ەلدىڭ جاستار قۇراماسى 2015 جىلى الەم چەمپيونى اتانعان. الايدا ۇلتتىق كومانداعا ولاردىڭ بىردە-ءبىرى شاقىرىلعان جوق. ال مۋسلين فەدەراتسيانىڭ ءوز ىسىنە ارالاسۋىن قابىلداي المادى.
سەربيا جاڭا زاماندا ءىرى جەڭىسكە جەتكەن جوق. ال يۋگوسلاۆيا 1960 جىلى وليمپيادانى ۇتىپ, 1960, 1968 جىلدارى ەۋروپادا ۇزدىك شىققان بولاتىن.
