ەلوردادا نۇر-سۇلتان قالاسى اكىمدىگىنىڭ قولداۋىمەن ەرەكشە قاجەتتىلىكتەرى بار بالالارعا ارنالعان بالاباقشا اشىلدى. 2 جاستان 7 جاسقا دەيىنگى بالالاردى قابىلدايتىن مەكەمەدە بارلىق جاعداي جاسالعان.
شاراعا قاتىسقان قازاقستان رەسپۋبليكاسى پارلامەنتى ءماجىلىسىنىڭ دەپۋتاتى لاريسا پاۆلوۆەتس بالاباقشانىڭ بالالار ءۇشىن ماڭىزى زور ەكەنىن ايتتى.
– بالاباقشا قوعام ءۇشىن ماڭىزدى. سول ءۇشىن دە بۇل مەكەمەنىڭ اشىلعانىنا قاتتى قۋانىپ تۇرمىن. مەديتسينا ۋنيۆەرسيتەتى مەن بالاباقشانىڭ بىرلەسۋى قوعامداعى ەرەكشەلىكتەرى بار بالالاردىڭ دامۋى وڭ اسەر ەتەدى دەپ سەنەمىن, – دەدى دەپۋتات.
سويلەۋ قابىلەتى, اۋتيزم سپەكترى, ورتالىق جۇيكە جۇيەسى بۇزىلعان جانە باسقا دا ەرەكشەلىكتەرى بار بالالار مەديتسينالىق-پەداگوگيكالىق كومەكتىڭ تولىق كەشەنىن الاتىن بولادى. ولارمەن لوگوپەد-دەفەكتولوگ, رەابيليتولوگ, بالالار نەۆروپاتولوگى, پەدياتر, پەداگوگ-پسيحولوگ, ەرگوتەراپەۆت, كينەزيوتەراپەۆت, سونداي-اق سۋردولوگ جانە نۋتريتسيولوگ ماماندارى جۇمىس ىستەيدى. استانا مەديتسينا ۋنيۆەرسيتەتىنىڭ باسقارما توراعاسى-رەكتورى كامالجان نادىروۆتىڭ ايتۋىنشا, بالاباقشا ۋنيۆەرسيتەتتىڭ كلينيكالىق بازاسىنا اينالادى. ياعني, مەديتسينا ستۋدەنتتەرى بالالارعا كومەك كورسەتۋ ارقىلى قوسىمشا بىلىكتىلىككە يە بولادى.
– مەكتەپكە دەيىنگى مەكەمەلەردە ەرەكشە قاجەتتىلىكتەرى بار بالالاردىڭ بەيىمدەلۋى جىلدامىراق وتەدى. سەبەبى باسقا قاتارلاستارىنىڭ اراسىندا ولار ەركىن سەزىنە الادى. پرەزيدەنتىمىز قاسىم-جومارت كەمەلۇلى 2022 جىلدى بالالار جىلى دەپ جاريالادى. ال ءبىزدىڭ مىندەتىمىز – وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعىن قامتاماسىز ەتۋ, – دەدى كامالجان نادىروۆ.
بايان اسىلبەكوۆا
