كەشە ەسىل وزەنىنىڭ كەمە ءجۇرەتىن ۋچاسكەسىندە ونىنشى ناۆيگاتسيا سالتاناتتى تۇردە اشىلدى دەپ حابارلادى ەلوردا اكىمدىگىنىڭ رەسمي سايتى.
سەرۋەنگە ارنالعان كەمەنىڭ العاشقى جولاۋشىلارى ءداستۇر بويىنشا «نۇرلى جۇرەك» الەۋمەتتىك قىزمەت كورسەتۋ ورتالىعىنىڭ تاربيەلەنۋشىلەرى بولدى. رەسمي بولىمنەن كەيىن مۇمكىندىگى شەكتەۋلى بالالار تەپلوحودپەن تەگىن قىدىرىپ كەلدى.
«ەسىل-استانا» مكقك ديرەكتورى قانات الين بيىل استانالىقتار مەن قالا مەيماندارىن وزەندە سەرۋەندەتۋ ءۇشىن التى جولاۋشى كەمەسى جۇزەتىن بولادى دەپ ءمالىم ەتتى.
«ءداستۇرلى ناۆيگاتسيا كەزىندە استانا تۇرعىندارى مەن قوناقتارى سۋ كولىگىنىڭ قىزمەتىن پايدالانا الادى. 2009 جىلى بىزدە بار بولعانى 5 كەمە بولسا, بۇگىندە ولاردىڭ سانى 14-كە جەتتى, ونىڭ 6 كەمەسى جولاۋشىلارعا قىزمەت ەتەدى. ولاردىڭ جالپى سىيىمدىلىعى 265 ورىندى قۇرايدى» دەپ اتاپ ءوتتى مەكەمە باسشىسى.
ايتا كەتەيىك, امفيتەاتر اۋدانىنداعى جاياۋ جۇرگىنشىلەر كوپىرىن سالۋ بويىنشا جۇرگىزىلىپ جاتقان قۇرىلىس-مونتاج جۇمىستارىنا بايلانىستى, استانا اكىمدىگى ۋاقىتشا قوزعالىس باعدارىن بەكىتتى: وتىرعىزۋ كەنەسارى ەسكەرتكىشىنەن تومەندە ورنالاسقان روتوندادان – سۋ رەتتەيتىن پلوتينا – امفيتەاتر – كەنەسارى ەسكەرتكىشىنەن تومەن ورنالاسقان روتونداعا وزگەرتىلدى.
مارشرۋتتىڭ ۇزاقتىعى – 3 كم, ال ۋاقىتى – 25-30 مينۋت. وزەندە ساياحاتتاۋدىڭ ەكسكۋرسيالىق-قىدىرۋ قىزمەتىنىڭ باعاسى ەرەسەكتەر ءۇشىن – 500 تەڭگە, بالالار ءۇشىن – 250 تەڭگە.
كوپىر قۇرىلىسى جوندەلگەننەن كەيىن «استانا-ەسىل» قايتادان بۇرىنعى بەكىتىلگەن مارشرۋت بويىنشا كەنەسارى ەسكەرتكىشىنەن اقورداعا دەيىن قاشىقتىعى 18,8 شاقىرىمعا جولاۋشىلار تاسىمالدايدى. ول كەزدە قىزمەت كورسەتۋ ۇلكەندەرگە – 1000 تەڭگە, بالالارعا 500 تەڭگە بولماق.
ەسىل وزەنىندەگى كەمە ءجۇزۋ ماۋسىمى 31 قازانعا دەيىن جالعاسادى.
