1.كەزەكتى فورۋمنان نە كۇتەسىز؟
2.ءسىز باسقارىپ وتىرعان ۇيىم قانداي ىستەرگە ۇيىتقى بولىپ ءجۇر؟
قامقا جاسانوۆا,
«استانا قالاسىنىڭ مۇگەدەك بالالار قوعامى» قوعامدىق بىرلەستىگىنىڭ ءتورايىمى:
1.ەستۋ قابىلەتى ناشار جاستاردى جۇمىسقا ورنالاستىرۋ ماسەلەسى ءالى كۇنگە دەيىن شەشىمىن تاپپاي كەلەدى. قۇلاعى ەستىمەيدى دەگەنى بولماسا, ولار دا اياق-قولى ساۋ, اقىل-ەسى ءتۇزۋ جاندار. ەڭ بولماعاندا, ەدەن جۋ, تاماق ءپىسىرۋ قولدارىنان كەلەدى. وكىنىشكە قاراي, كوپ مەكەمەلەر ولاردى قىزمەتكە الۋدان باس تارتادى. فورۋمدا وسىنداي جانداردى جۇمىسقا ورنالاستىرۋ ءۇشىن مينيسترلىكتەرمەن ارنايى كەلىسىمشارت جاساۋ قاجەتتىگىن كوتەرمەكپىز.
2.بۇگىندە ءبىزدىڭ مەكەمەگە استاناداعى مۇگەدەك بالا تاربيەلەپ وتىرعان 500-دەن استام وتباسى تىركەلگەن. مۇگەدەك بالالاردىڭ اتا-انالارىنا ارنالعان پسيحولوگيالىق ترەنينگتەر وتكىزىپ تۇرامىز. ەكى جىلداي بۇرىن بىرلەستىكتىڭ جانىنان «بالام-اي» مۇمكىندىگى شەكتەۋلى بالالاردى دامىتۋ ورتالىعى اشىلدى. مۇندا قۇلاعىنىڭ مۇكىسى بار بالالارمەن جۇمىس جاسايتىن سۋردولوگ ماماندار, 18-دەن اسقان بالالاردى كاسىپكە بەيىمدەيتىن ۇيىرمەلەر جۇمىس ىستەيدى. بۇلدىرشىندەرگە ارنالعان ەمدەۋ, ماسساج جاساۋ بولمەلەرى دە بار. جاز مەزگىلىندە دەمەۋشىلەردىڭ كومەگىمەن بالالاردى دەمالىس ورىندارىنا تەگىن اپارىپ كەلەمىز. سونداي-اق, ۇكىمەتپەن, دەمەۋشىلەرمەن بىرلەسىپ, مۇگەدەكتەردىڭ قولايلى ءومىر سۇرۋىنە باعىتتالعان باعدارلامالاردىڭ جوباسىن جاسايمىز. بۇگىنگە دەيىن دەمەۋشىلەردەن تۇسكەن قارجىنىڭ ەسەبىنەن 70-تەن اسا مۇگەدەك بالاعا وپەراتسيا جاسالدى. 1998 جىلدان بەرى مۇگەدەكتەردىڭ مۇڭىن مۇڭداپ, جوعىن جوقتاپ كەلە جاتقان ۇجىمىمىزدىڭ اتقارعان قىزمەتىن ءبىر-ەكى اۋىز سويلەمگە سىيدىرۋ مۇمكىن ەمەس شىعار.
سارسەنباي مىڭباەۆ,
استانا قالاسى كاسىپوداقتار كەڭەسىنىڭ توراعاسى:
1.كەزەكتى فورۋم اتالعان ۇيىمداردىڭ قىزمەتىن بۇرىنعىدان دا نىعايتىپ, الداعى اتقارار مىندەتىن ايقىنداپ بەرەدى دەپ ويلايمىن. فورۋمدا ەلباسىنىڭ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىنداعى ەڭبەك ادامدارىنا قاتىستى ايتىلعان ماسەلەسى دە كۇن تارتىبىنە شىعارىلادى دەپ ويلايمىن.
2.كاسىپوداق ۇيىمى – وندىرىستەگى جانە وندىرىستەن تىس سالالارداعى قىزمەتكەرلەردى بىرىكتىرەتىن جانە ولاردىڭ الەۋمەتتىك-ەكونوميكالىق قۇقىلارى مەن مۇددەلەرىن قورعاۋ ءۇشىن قۇرىلاتىن ەرىكتى ۇيىم. جۇمىس بەرۋشى مەن جۇمىسشى اراسىنداعى كەز كەلگەن ەڭبەك داۋىن شەشۋدە ەلەۋلى ءرول اتقارادى. استانا قالاسى كاسىپوداقتار كەڭەسىنىڭ قۇرامىنا بەس قالالىق كاسىپوداق كوميتەت كىرەدى. ولارعا قاراستى 270 باستاۋىش كاسىپوداق ۇيىمى بار. مەن ەلىمىزدەگى كاسىپوداق ۇيىمى بار مەكەمەلەردە ەڭبەك داۋى ورىن المايدى دەپ سەنىمدى تۇردە ايتا الامىن. ماسەلەن, استانادا قۇرىلىس, اۆتوكولىك, شاعىن بيزنەس سالالارىندا جۇمىسشىلاردىڭ جۇمىس بەرۋشىگە قارسى نارازىلىقتارى ءجيى ورىن الىپ جاتادى. مۇنىڭ باستى سەبەبى اتالعان مەكەمەلەردە كاسىپوداق ۇيىمدارىنىڭ بولماۋىنان. ەگەر ۇجىمدا كاسىپوداق جۇمىس ىستەيتىن بولسا, مەكەمەدەگى ەڭبەك داۋى سىرتقا شىعارىلماي, ءوز ىشىندە وڭ شەشىمىن تابار ەدى.
التىناي كوبەەۆا,
ۇەۇ-نى قولداۋ ورتالىعىنىڭ ءتورايىمى:
1.ۇكىمەتتىك ەمەس ۇيىمداردىڭ فورۋمىنا 200-دەن استام مەكەمە قاتىسادى. بيىلعى فورۋمنىڭ ەرەكشەلىگى, بىرنەشە ماسەلە توڭىرەگىندە قوعامدىق تىڭداۋلار ۇيىمداستىرىلىپ, دوڭگەلەك ۇستەلدەر وتكىزىلمەكشى. كۇن تارتىبىنە شىعارىلاتىن ەكونوميكالىق دامۋ سالاسىنداعى الەۋمەتتىك جاۋاپكەرشىلىك, تۇتىنۋشىلار قۇقىن قورعاۋ, تۇرعىن-ءۇي قاتىناستارىن دامىتۋ ماسەلەلەرىنىڭ ءبارى شەشىمىن تابادى دەپ ويلايمىن.
2.ۇكىمەتتىك ەمەس ۇيىمداردى قولداۋ ورتالىعىنىڭ نەگىزگى قىزمەتىن اتاۋىنىڭ ءوزى ايتىپ تۇر. ۇكىمەتتىك ەمەس ۇيىمداردىڭ جۇمىسىن ۇيىمداستىرۋ, سەمينار-ترەنينگتەر وتكىزۋ, دوڭگەلەك ۇستەلدەر مەن كونفەرەنتسيالار ۇيىمداستىرۋ, الەۋمەتتىك زەرتتەۋلەر, جوبالاردىڭ مونيتورينگىن جاساۋ, ادىستەمەلىك ادەبيەتتەر شىعارۋ جانە استانا قالاسىنىڭ ۇەۇ-نىڭ نەگىزگى مالىمەتتەرىن جاساۋ مەن جاڭارتۋ ءبىزدىڭ ەنشىمىزدەگى شارۋا بولىپ تابىلادى.
