استاناداعى MEGA Silk Way ساۋدا-ويىن-ساۋىق ورتالىعىندا «ماحاببات – عاجايىپ كۇش» اتتى فوتوكورمە اشىلدى. اتالمىش شارا داۋن سيندرومىنا شالدىققان بالالار مەن ولاردىڭ اتا-اناسىن قولداۋ ماقساتىندا ۇيىمداستىرىلدى.
فوتوكورمەنى ۇيىمداستىرۋشى «سولنەچنىي مير» قوعامدىق قورىنىڭ جەتەكشىسى ەۆگەنيا چەبوتارەۆسكايانىڭ ايتۋىنشا, اتالمىش شارانى وتكىزۋ بىلتىر جوسپارلانعان. الايدا سول كەزدە ونى وتكىزەتىن ورىن تابىلمادى. بيىل استانا قالاسى ەسىل اۋدانى اكىمدىگى قولداۋ كورسەتتى. بۇل فوتوكورمە ءبىر اپتا بويى وتەدى.
– كەيبىر ادامدار داۋن جۇقپالى اۋرۋ دەپ ويلايدى. ءبىز بۇل بالالاردىڭ قوعامنىڭ ءبىر مۇشەسى ەكەنىن كورسەتكىمىز كەلەدى. فوتوسۋرەتتەرگە كوز جۇگىرتسەك, وتباسىندا ماحابباتتى سەزىنىپ ءوسىپ كەلە جاتقان بالالار قالىپتى داميتىنىن بايقاۋعا بولادى. ولاردان قورقۋدىڭ قاجەتى جوق. داۋن سيندرومىنا شالدىققان جاس اتا-انالار بىزگە ءجيى كەلەدى. ولار كەيىنگى بالالارى دا وسىنداي دياگنوزبەن تۋى مۇمكىن دەپ قورقادى. كەيبىر فوتوسۋرەتتەردە ءتورت نەمەسە ودان دا كوپ بالالى وتباسىلار كورسەتىلسە, بىرەۋىندە عانا داۋن دەرتى, قالعان بالالار ساۋ. بۇل گەنەتيكالىق اۋىتقۋدىڭ باسقا بالالارعا تارالمايتىنىن دالەلدەيدى, – دەيدى ەۆگەنيا چەبوتارەۆسكايا.
