2021 جىلدىڭ باسىندا استانا قالاسى ءماسليحاتىنىڭ شەشىمىمەن الماتى اۋدانىنا قاراستى ا36 كوشەسىنە قوعام جانە مەملەكەت قايراتكەرى, ءىرى تۇلعا, زاڭگەر عالىم, قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, قازاقستانعا ەڭبەگى سىڭگەن عىلىم قايراتكەرى سالىق زيمانوۆتىڭ ەسىمى بەرىلدى.
مىنا دۇنيەدە بيىك پاراساتىمەن, اسىل قاسيەتىمەن ادامدىقتىڭ زيالى ۇلگىسىن كورسەتكەن قازاق زاڭ عىلىمىنىڭ ابىزىنا اينالعان الىپ تۇلعانى ءبىر كەزدەرى قانىش ساتپاەۆ «سالىق زيمانوۆ – قازاقستاندا زاڭ عىلىمدارىنىڭ نەگىزىن قالاۋشى» دەپ باعالاعان ەدى. جاراتۋشى ءوزى بەرگەن توقسان جىلعا سوزىلعان ماعىنالى عۇمىرىنىڭ جەتى جىلىن قاندى شايقاستا وتكەرىپ, ودان كەيىنگى ىزدەنىسپەن وتكەن جىلدارى قازاقستان مەن ورتالىق ازيانىڭ باسقا دا ايماقتارىندا ۇلتتىق مەملەكەتتەردىڭ قالىپتاسۋى مەن دامۋىنا, قازاقستان رەسپۋبليكاسىنىڭ مەملەكەتتىك تاۋەلسىزدىگىنە, ت. ب. وزەكتى ماسەلەلەرگە ارنالعان زەرتتەۋلەرىن جازىپ قالدىردى.
بىلىكتى زاڭگەر مامان رەتىندە ەگەمەندىك, تاۋەلسىزدىك جولىنداعى قازاقستاننىڭ حالىقارالىق قاتىناسىن زاڭداستىرىپ, قازاق تىلىنە مەملەكەتتىك مارتەبە بەرۋ, پرەزيدەنتتىك باسقارۋ ينستيتۋتىن ەنگىزۋ, قۇقىقتىق-دەموكراتيالىق رەفورمالاردى جۇرگىزۋ ىسىنە بەلسەنە ارالاستى. قازاقستان مەملەكەتى مەن قۇقىعىنىڭ تاريحىن, ۇلتتىق مەملەكەت قۇرىلىمىنىڭ تەوريالىق ماسەلەلەرىن زەرتتەۋدە جاڭا عىلىمي باعىت قالىپتاستىرىپ, ءادىل سوتتى قامتاماسىز ەتۋ ءۇشىن رەسپۋبليكادا سوت مۇشەلەرىنىڭ قاتىسۋىمەن «بيلەر القاسىن» ەنگىزۋگە باسشىلىق جاسادى.
قازاقستان رەسپۋبليكاسى قۇرىلعاننان كەيىن س.زيمانوۆتىڭ عىلىمي جانە قوعامدىق-ساياسي قىزمەتىنىڭ جاڭا, جەمىستى كەزەڭى باستالدى. قازاقستاننىڭ جوعارعى كەڭەسى كوپتەگەن جاڭا زاڭدى قابىلداۋعا ءتيىس بولدى. وسى جاۋاپتى تاريحي كەزەڭدە سالىق زيمانوۆ بىلىمدىلىك, قايراتكەرلىك قىرىمەن تانىلدى. قازاق مەملەكەتتىگى مەن قازاق حالقىنىڭ تاريحىندا شەشۋشى ءرول اتقارعان «قازاق كسر-ءنىڭ مەملەكەتتىك ەگەمەندىگى تۋرالى دەكلاراتسيانىڭ» (25.10.1990) جوباسىن دايىنداۋ جونىندەگى كوميسسيانى باسقاردى. ەل تاريحىنداعى ەكىنشى ءبىر اسا ماڭىزدى ساياسي اكتىنىڭ – «قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى» كونستيتۋتسيالىق زاڭنىڭ (16.12.1991) جوباسىن دايىنداۋ جونىندەگى كوميسسيانىڭ جەتەكشى مۇشەلەرىنىڭ ءبىرى بولدى. ول جوعارعى كەڭەستەگى قازاقستان رەسپۋبليكاسى جاڭا كونستيتۋتسياسىنىڭ جوباسىن ازىرلەۋ جونىندەگى كونستيتۋتسيالىق كوميسسيانىڭ مۇشەسى بولدى, مۇندا ول ساراپشىلار توبىن باسقاردى.
س.زيمانوۆ 10 تومدىق «قازاقتىڭ اتا زاڭدارى» ەنتسيكلوپەدياسىنا عىلىمي جەتەكشىلىك جاسادى. ەلگە قىزمەتى ءۇشىن قازاقستان رەسپۋبليكاسى پرەزيدەنتىنىڭ «بەيبىتشىلىك پەن رۋحاني كەلىسىم» (1993), «قازاقستان» مەملەكەتتىك سىيلىقتارىنىڭ (2002) لاۋرەاتى اتاندى. «پاراسات» وردەنىمەن (2002), ەكى رەت «وتان سوعىسى», «قىزىل جۇلدىز» وردەندەرىمەن جانە مەدالدارمەن ماراپاتتالعان.
