ۇلتتىق قۇرىلتاي وسى جىلى تاريحى تەرەڭ, شەجىرەلى اتىراۋ قالاسىندا ءوتتى. حالىق پەن بيلىك اراسىنداعى كوپىرگە اينالعان قۇرىلتاي مەملەكەتتىك ماسەلەلەر تالقىلاناتىن اشىق الاڭ دەسەك تە بولادى. بۇل جولى دا ەل كوكەيىندە جۇرگەن تاقىرىپتار قوزعالدى.
ءار ادامنىڭ كونستيتۋتسيالىق قۇقىعىنىڭ ساقتالۋى, زاڭ الدىنداعى تەڭدىگى, قاۋىپسىزدىگى جانە جەكە باس بوستاندىعى قورعالۋى ءتيىس ەكەنى ايتىلدى. قوعامدا ورىن الىپ جاتقان وقيعالار زاڭنىڭ ساقتالۋىندا ولقىلىقتار بار ەكەنىن كورسەتەدى.
مەملەكەت باسشىسى ءتىل ماسەلەسىنە قاتىستى دا مالىمدەمە جاسادى. قازاق ءتىلىنىڭ قولدانۋ اياسىن كەڭەيتۋ – نەگىزگى ماقساتىمىزدىڭ ءبىرى, الايدا ماجبۇرلەۋمەن ساپالى ناتيجەگە جەتە المايمىز. سوندىقتان بۇل ماسەلەدە جۇيەلىلىك قاجەت. ونىڭ ءبىر جولى – قازاق تىلىندەگى كىتاپتاردى كوبەيتۋ, كىتاپ وقۋعا دەگەن قىزىعۋشىلىقتى ارتتىرۋ.
سونىمەن قاتار پرەزيدەنت ەلتاڭبامىزدىڭ كەڭەس زامانىن ەسكە تۇسىرەتىنىن جانە سوعان قاتىستى سىني پىكىرلەردىڭ ورىن الىپ جۇرگەنىن اتاپ ءوتتى. بۇل ماسەلە بويىنشا ارنايى كوميسسيا قۇرىلىپ, اشىق بايقاۋ ارقىلى جاڭا ەلتاڭبا جوباسى جاسالاتىنىن جاريالادى.
ەرلان داكەنوۆ,
استانا قالاسى
ءماسليحاتىنىڭ دەپۋتاتى
