جالعىزىلىكتى قارتتار مەن مۇمكىندىگى شەكتەۋلى جاندارعا ۇيدە الەۋمەتتىك قىزمەت كورسەتەتىن مامان بولۋ وڭاي شارۋا ەمەس. وعان جۇكتەلەر مىندەت كوپ, جاۋاپكەرشىلىك جوعارى.
سوعان قاراماستان, تاعدىردىڭ جازۋىمەن قارتايعان شاعىندا جالعىز قالعان قاريالار مەن دەرتى جاس تالعامايتىن مۇمكىندىگى شەكتەۋلى بالالارعا جانىنىڭ جىلۋىن سىيلاپ, ۇنەمى يگىلىكتى ءىستىڭ باسى-قاسىندا جۇرەتىن جاندار جوق ەمەس ارامىزدا. سولاردىڭ ءبىرى – ەلوردالىق دينارا تاحاروۆا.
ونىڭ بۇل سالاعا كەلۋى دە تەگىننەن-تەگىن ەمەس. توعىزىنشى سىنىپتا وقىپ جۇرگەن كەزىندە اناسىنان, كوللەدجدىڭ ءبىرىنشى كۋرسىن ءتامامدار تۇستا اكەسىنەن ايىرىلىپ, تاعدىردىڭ تاۋقىمەتىنە تاپ بولعان قارشاداي قىز اتا-اناسىنا كوزى تىرىسىندە ولارعا كورسەتە الماعان قامقورلىقتى بۇگىندە قاراۋسىز قالعان قاريالارعا سىيلاپ, قارت ادامدارعا قارايلاسۋدى ماقسات ەتەدى. ءسويتىپ, جالعىزىلىكتى جاندارمەن سىرلاسىپ, اقىلداسىپ, بىرگە جۇمىس ىستەۋگە بەل بۋادى.
– نەگىزگى ماماندىعىم – قازاق ءتىلى مەن ادەبيەتى ءپانىنىڭ مۇعالىمى. سول بويىنشا الدىمەن ينتەرناتتا, كەيىن بالاباقشادا تاربيەشى بولىپ جۇمىس ىستەدىم. 2019 جىلى وتباسىلىق قيىن جاعدايعا بايلانىستى «ءۇمىت» كريزيستىك ورتالىعىنا كەلىپ, التى ايداي وسى جەردە تۇرىپ, پسيحولوگتارمەن, الەۋمەتتىك قىزمەتكەرلەرمەن اشىق سويلەسىپ, پىكىرلەسكەننەن كەيىن سول كىسىلەردىڭ كومەگىمەن استانا قالاسى اكىمدىگىنىڭ «شاراپات» ورتالىعىنا جۇمىسقا ورنالاستىم. سودان بەرى الەۋمەتتىك سالاعا ۇلەسىمدى قوسىپ, قالامىزداعى تىل ەڭبەككەرلەرى مەن جالعىزىلىكتى زەينەتكەرلەرگە قامقورلىق جاساپ كەلەمىن, – دەدى د.تاحاروۆا.
راسىندا دا, قارتتارعا قامقورلىق كورسەتىپ, كومەكتەسۋدىڭ ءوزى – ۇلكەن ىزگىلىكتى ءىس. ولار دا بالالار سياقتى كۇتىمدى قاجەت ەتەدى. «جاقسى ءسوز – جارىم ىرىس» دەگەندەي, وڭ قاباق تانىتىپ, جىلى سويلەسسەڭ, سوعان ءماز بولادى. كەيبىر قىزمەت الۋشى اجەيلەر ۇيلەرىندە گۇل وسىرگەندى جاقسى كورەدى. سولاردى بىرگە كۇتىپ-باپتايدى. جارالى جاندارىنا تيتتەي دە بولسا ءۇمىت وتىن سىيلاپ, ەرتەڭىنە سەنىم وتىن جاعادى. قىسقاسى, الەۋمەتتىك قىزمەتكەرلەر تاڭنىڭ اتىسى, كەشتىڭ باتىسى ءبىر تىنىم تاپپايدى. ورتالىقتا ىستەيتىن ءبىر الەۋمەتتىك قىزمەتكەرگە سەگىز ادامنان ءبولىنىپ بەرىلگەن. دينارا اياپبەرگەنقىزى قامقورلىعىنداعى ءار ادامعا اپتاسىنا ەكى رەت بارادى. ءبىر كۇندە ءتورت ادامنىڭ ۇيىنە بارىپ, ءار ۇيدە 1,5-2 ساعاتتاي بولىپ, ارقايسىسىنا جەكە-جەكە الەۋمەتتىك قىزمەت كورسەتەدى. ول تەك ءۇي تىرشىلىگىنە عانا ەمەس, سونداي-اق ءوزىنىڭ قامقورلىعىنداعى ۇلكەن كىسىلەرگە مورالدىق-پسيحولوگيالىق جاعىنان دا كومەك كورسەتۋگە تىرىسادى.
– الەۋمەتتىك قىزمەتكەر بولۋ ءۇشىن ادام كۇيزەلىسكە ءتوزىمدى, جان-جاقتى, مەيىرىمدى, ءوز جۇمىسىن جاقسى كورەتىن, ومىرلىك قيىن جاعدايعا تاپ بولعان ادامدارعا شىن مانىندە جانى اشيتىن, كەڭ جۇرەكتى, كۇيزەلىسكە ءتوزىمدى بولۋ كەرەك. ءوزىم بۇل جولدى تاڭداعانىما ەش وكىنبەيمىن. كەرىسىنشە, ءار قىزمەت الۋشىنىڭ كوزىنەن كىشكەنتاي ءۇمىت ساۋلەسىن كورۋدىڭ ءوزى – مەن ءۇشىن ۇلكەن باقىت. جۇمىسىم وزىمە قاتتى ۇنايدى. قارتتارعا كومەكتەسە ءجۇرىپ, كەيدە بىلمەگەنىممەن ءبولىسىپ, تاجىريبە جيناپ كەلەمىن. قامقورلىعىمداعى ادامدارعا بوگدە ادامعا ەسىك اشپاۋىن ايتامىن. قاي ۇيگە قاشان باراتىنىمدى الدىن الا قوڭىراۋ شالىپ, ەسكەرتىپ قويامىن. ولار دا مەنى سول ۋاقىتتا كۇتىپ وتىرادى, – دەدى الەۋمەتتىك قىزمەتكەر.
ءيا, ول قانداي جاعداي بولماسىن قىزمەت الۋشىلارىنىڭ جانىنان تابىلۋعا, قولداۋ كورسەتىپ, كومەكتەسىپ قانا قويماي, قاجەت بولعان كەزدە ولارمەن سىرلاسۋعا, اقىلداسۋعا تىرىسادى. ءتىپتى ولار ءۇشىن ۋايىمدايتىن, ومىرىنە الاڭدايتىن كەزى دە بولادى.
