ەگدە جاستاعى جانە كارى ادامداردىڭ دۇرىس تاماقتانۋىن ۇيىمداستىرۋ – وزەكتى ماسەلە. سەبەبى جاقسى تاماقتانۋ اعزا مۇشەلەرى مەن جۇيەلەرىنىڭ تەرىس وزگەرىستەرىنە جول بەرمەيدى. تاماقتانۋ قانشالىقتى دۇرىس قۇرىلسا, سونشالىقتى ادام ءومىرى ۇزاق, دەنساۋلىعى مەن ەڭبەككە قابىلەتى جوعارى بولادى.
تاماقتانۋ رەجيمىنە تاماقتى قابىلداۋ مەرزىمى, تاماق ءىشۋ ارالىعىنداعى ۇزىلىستەر, ءبىر تاۋلىكتە راتسيونعا كىرەتىن كالوريانى ءبولۋ جاتادى. ءتورت مەزگىل تاماقتانۋ اناعۇرلىم ءتيىمدى. ويتكەنى اسقازانعا كۇش بىركەلكى ءتۇسىپ, تاماق شىرىنىنىڭ تاعامدى تولىق وڭدەپ شىعۋىن قامتاماسىز ەتەدى. تاماقتى كۇن سايىن بەلگىلى ءبىر مەزگىلدە قابىلداۋ اسقازان ءسولىن نەعۇرلىم شۇعىل ءبولۋ رەفلەكسىن قالىپتاستىرادى. راتسيوندى مىناداي تارتىپپەن ءبولۋ اناعۇرلىم ءتيىمدى بولادى: تاڭەرتەڭگى اسقا 25%, تۇستىككە 15%, كەشكى تاماققا 25%. كەشكە تاماقتى ۇيقىعا دەيىن 2 ساعات بۇرىن ءىشۋ كەرەك. سونداي-اق تاماقتى بىرقالىپتى قورىتۋ ءۇشىن تاماق تەمپەراتۋراسىنىڭ رەجيمىن ساقتاۋدىڭ ماڭىزى زور. ىستىق تاماق تەمپەراتۋراسى 50-60 س اسپاۋى ءتيىس, ال سۋىق تاماق تەمپەراتۋراسى, ادەتتە, 10 س-تان تومەن بولماۋى كەرەك.
ادام جاسى ۇلعايعان سايىن تۇزدى از-ازدان پايدالانعان ءجون. ەگدە جاستا كوبىنىڭ تۇز بەن قىشقىلتىم دامگە سەزىمتالدىعى ازايىپ, سونىڭ اسەرىنەن تۇزدى كوپ سالعىسى كەپ تۇرادى. الايدا بۇل ادامدى ءىسىندىرىپ قانا قويماي, گيپەرتونياعا, سال اۋرۋىنا اكەلەدى, بۇيرەككە سالماق تۇسىرەدى. بۇدان قاشۋ ءۇشىن تۇزدى ساپالى دامدەۋىشتەر مەن پايدالى مايلارعا الماستىرعان دۇرىس. سونداي-اق ۋاقىت وتە ادامنىڭ اس قورىتۋ جۇيەسى السىرەپ, سودان سىلەكەي مەن اسقازان ءسولى كوپ بولىنەدى. ناتيجەسىندە اعزا قاجەتتى دارۋمەندەردى تولىق الا المايدى. مۇمكىندىگىنشە جەمىس-جيدەكتەر مەن كوكونىستەر, ءداندى داقىلداردى كوبىرەك جەگەن پايدالى. بۇعان قوسا, قۇرامىندا كالتسي كوپ تاعام جەۋ كەرەك. بۇل قارتايا كەلە كەميتىن سۇيەكتىڭ بەرىكتىگىن نىعايتادى. كالتسي ءسۇت ونىمدەرىندە كوپ بولادى. الايدا ەگدە جاستا ادام بويىندا لاكتوزا تەز سىڭىرىلمەيتىنىن دە ۇمىتپاۋ قاجەت. ودان بولەك, «ومەگا-3» دارۋمەنىن قابىلداۋ ماڭىزدى. بالىق مايى رەۆماتويدتى ارتريت اۋرۋىمەن كۇرەستە جاقسى كومەكتەسەدى. اپتاسىنا ەكى رەت بالىقتى اسىپ نەمەسە بۋعا ءپىسىرىپ جەگەن ءجون.
ساۋلە شاگيروۆا, كوپسالالى مەديتسينا ورتالىعىنىڭ سالاۋاتتى ءومىر سالتىن قالىپتاستىرۋ دارiگەرi
