«ازىرەت سۇلتان» مەشىتىندە ەلوردامىزدىڭ مەكتەپ ءبىتىرۋشى تۇلەكتەرىنە ارنالعان «جولىڭ بولسىن, جاس تۇلەك!» اتتى رۋحاني كەش ءوتتى.
ايتا كەتۋ كەرەك, جىل سايىن مەكتەپ ءبىتىرۋشى تۇلەكتەرگە اق جول تىلەپ, باتا بەرۋ, مازمۇنى تەرەڭ كەش وتكىزۋ ەلوردامىزدا داستۇرگە اينالعان. استانا قالاسى اكىمدىگىنىڭ قولداۋىمەن, قازاقستان مۇسىلماندارى ءدىني باسقارماسىنىڭ ۇيىتقى بولۋىمەن وتكىزىلىپ وتىرعان رۋحاني كەشكە ەلوردا مەكتەپتەرىنىڭ 1800-گە جۋىق ءبىتىرۋشى تۇلەكتەرى قاتىستى. سالتاناتتى كەشتى اشقان «نۇر استانا» ورتالىق مەشىتىنىڭ نايب يمامى تولەبي وسپان تۇلەكتەردى ءومىردىڭ جارقىن بەلەسىندەگى ايتۋلى كۇندەرىمەن قۇتتىقتاپ, مىنبەرگە قازاقستان مۇسىلماندارى ءدىني باسقارماسىنىڭ استانا قالاسى بويىنشا وكىلى, «نۇر استانا» مەشىتىنىڭ باس يمامى ناۋرىزباي قاجى تاعانۇلىن شاقىردى.
ءوز بايانداماسىندا ناۋرىزباي قاجى ءبىلىمنىڭ ارتىقشىلىقتارىنا توقتالىپ, ەل ەرتەڭى مەن بولاشاعىنىڭ جارقىن بولۋى ءبىلىمدى جاستاردىڭ قولىندا ەكەنىن ايتتى. «ون ءبىر جىل جيعان بىلىمدەرىڭىزدى سىن تەزىنە سالاتىن ءسات تە جەتتى. شاريعات كوزىمەن قارار بولساق تا, مۇسىلمان بالاسىنىڭ ءبىلىم-عىلىم يگەرۋى پارىز بولىپ سانالادى. قاسيەتتى قۇران كارىمدە اللا تاعالا «بىلەتىندەر مەن بىلمەيتىندەر تەڭ بولا الا ما؟» دەسە, ارداقتى پايعامبارىمىز مۇحاممەد (س.ع.س.) «ءبىلىم الۋ – ءاربىر مۇسىلمانعا پارىز» دەپ, ۇممەتىنە ءىلىم يگەرۋدى ناسيحات ەتكەن. سول سەبەپتى دە ءوز ۋاقىتىن اياماي, وزگەنىڭ باقىتىن ايالاعان ۇلاعاتتى ۇستازدارىڭىزدىڭ ەڭبەگىن ەش ەتپەي, مەرەيىن وسىرىڭىزدەر. ءبىلىم جولىنداعى ساپارلارىڭىز ءساتتى بولعاي» دەپ, ناۋرىزباي تاعانۇلى جاراتقاننان جاقسىلىق تىلەپ, تۇلەكتەرگە ىزگى لەبىزىن ءبىلدىردى.
باس يمامنىڭ ىستىق ىقىلاسقا تولى تىلەگىنەن كەيىن ەلوردالىق №70 مەكتەپ-ليتسەيدىڭ ءبىتىرۋشى تۇلەگى, «التىن بەلگى» ۇمىتكەرى ۇلان ابدىشۇكىر اسىل ءدىننىڭ اماناتىن ارقالاعان يمامدارعا, ءدىن قىزمەتكەرلەرىنە العىسىن ءبىلدىرىپ, حاكىم اباي اتامىز ايتقانداي دۇنيەنىڭ كەم-كەتىگىن تولتىرىپ, ءوز ورنىن تابۋعا نيەتتى, بىلىمگە ىقىلاستى ەكەندىگىن جەتكىزدى.
بۇدان كەيىن اللانىڭ جەردەگى ۇيىندە «ازىرەت سۇلتان» مەشىتىنىڭ ازانشىسى ەركەبۇلان بايعابىلوۆ قاسيەتتى قۇران اياتتارىن وقىدى. سوڭىنان باس يمام ناۋرىزباي قاجى دۇعا ەتىپ, جاس ورەندەرگە اق باتاسىن بەردى.
سونداي-اق, مەشىتكە قادام باسىپ كەلگەن جاستارعا «ازىرەت سۇلتان» مەشىتىنىڭ حيكمەت ستۋدياسىندا «عيبراتناما», «حالىق دانالىعى», «اق باتا» سەرياسىمەن باسىلىپ شىققان مازمۇنى تەرەڭ CD تاسپالارى تاراتىلدى.
كەش سوڭى تۇلەكتەرمەن, اتا-انا, ۇستازدار قاۋىمىمەن ەستەلىككە سۋرەتكە تۇسۋمەن اياقتالدى.
جايىق ناعىماش
