پرەزيدەنت جانىنداعى ورتالىق كوممۋنيكاتسيالار قىزمەتىندەگى ءداستۇرلى ءباسپاسوز ءماسليحاتىن بۇل جولى جامبىل وبلىسىنىڭ اكىمى قانات بوزىمباەۆ وتكىزدى. ايماق باسشىسى
الدىمەن وبلىستىڭ وتكەن جىلعى الەۋمەتتىك-ەكونوميكالىق دامۋ قارقىنى بويىنشا رەسپۋبليكالىق رەيتينگتە ءبىرىنشى ورىنعا تابان تىرەگەنىن مالىمدەدى.
«ونەركاسىپتەگى كورسەتكىشتەردىڭ وسىمىنە ۇدەمەلى يندۋستريالىق-يننوۆاتسيالىق دامۋ باعدارلاماسىنىڭ اياسىندا جاڭا ءوندىرىس وشاقتارىنىڭ اشىلۋى مەن جۇمىس ىستەپ تۇرعان كاسىپورىنداردى مودەرنيزاتسيالاۋ ىقپال ەتۋدە» دەدى ق.بوزىمباەۆ. وڭىردە باعدارلاما جۇزەگە اسىرىلا باستاعالى 29 كاسىپورىن ىسكە قوسىلىپ, 4 مىڭ شاماسىندا جۇمىس ورنى اشىلعان. ينۆەستيتسيا مولشەرى 20 ملرد تەڭگە بولاتىن 8 جوبا بيىل جۇزەگە اسىرىلدى.
وبلىس اكىمى تاراز قالاسىنداعى اۋەجايدى قالپىنا كەلتىرۋ قاراشا ايىندا اياقتالاتىنىن جەتكىزدى. «بۇل قازىرگى زامانعى ۇشاقتاردىڭ بارلىق ءتۇرىن قابىلداۋعا مۇمكىندىك بەرەدى. اتالعان ماقساتقا 3,4 ملرد تەڭگە ءبولىندى. سونداي-اق اۋەجاي يەلەرى جولاۋشىلار تەرمينالىن قالپىنا كەلتىرىپ جاتىر. وعان تارتىلعان ينۆەستيتسيا 1,8 ملرد تەڭگە» دەدى ول. سونىمەن قاتار, وڭىردە بالامالى ەنەرگيا كوزدەرىن ءوندىرۋ سالاسىندا ءتورت ءىرى جوبا جۇزەگە اسىرىلماق. بۇعان 370 ملن دوللار ينۆەستيتسيا تارتىلادى. ق.بوزىمباەۆتىڭ ايتۋىنشا, جوبالاردى جۇزەگە اسىرۋ جاڭارتىلاتىن ەنەرگيا كوزدەرىنىڭ ۇلەسىن 40 پايىزعا جەتكىزۋگە ءمۇمكىندىك بەرەدى.
كەلەسى جىلى وبلىستاعى الپىسقا جۋىق ەلدى مەكەنگە گاز تارتىلادى. «2009 جىلدىڭ باسىندا 373 ەلدى مەكەننىڭ 58-ىنە عانا گاز تارتىلعان ەدى. ءتورت جىلدا كوگىلدىر وتىن تاعى 30 اۋىلعا جەتكىزىلدى. بۇل ماقساتقا بيۋدجەتتەن 5 ملرد تەڭگەدەن استام قاراجات ءبولىندى. قازىرگى كۇنى 88 اۋىلدىڭ تۇرعىندارى گازبەن قامتاماسىز ەتىلگەن» دەدى ءوڭىر باسشىسى.
اسحات رايقۇل
