ەجەلگى اقمولا, بۇگىنگى استانامىز ەلىمىزدىڭ باس قالاسى اتالعاننان بەرى كەرەمەتتەي كوركەيىپ, قۇرىلىسى قارقىندى قاداممەن ءوسىپ, ۇلكەن مەگاپوليسكە اينالدى. بۇگىندە قالا تۇرعىندارىنىڭ سانى ءبىر ميلليوننان استى. ايتسە دە كۇندەلىكتى قالا تىرشىلىگىندە كوڭىلگە قونىمسىز «اتتەگەن-ايلار» جوق ەمەس.
ءبىز ەسىلدىڭ وڭ جاعالاۋىنداعى قالانىڭ ورتالىعىندا, ل.پاستەر كوشەسىندە تۇرامىز. كوشەمىزگە اسفالت توسەلگەن, جاياۋ جۇرگىنشىلەرگە ارنالعان تروتۋار بار. سونداي-اق سۋ قۇبىرى, ورتالىق كاناليزاتسيا جۇيەسى تارتىلىپ, كوشە جارىعى دا تولىق شەشىلگەن. قىسقاسى, تۇرمىسقا قولايلى جاعداي جاسالعان شاعىن مەكەنجايىمىز بايقوڭىر اۋدانىنا قارايدى. الايدا ەكى جىلدان استى, بەرەكەمىز قاشتى. 2021 جىلى اسان قايعى كوشەسىن كەڭەيتەمىز دەگەن ماقساتپەن لۋي پاستەر كوشەسىنىڭ بويىنداعى ءتورت ءۇي ىسىرىلىپ تاستالعان ەدى. سودان بەرى بۇل ورىن بوس, تەك قالعان اعاش تەرەكتەر سورايىپ-سورايىپ تۇر. جول سالۋعا ارنالعان جەر كۇل-قوقىس, قۇرىلىس جوندەۋ جۇمىسىنان قالعان زاتتار توگەتىن الاڭعا اينالدى. ەڭ سوراقىسى سول, جاز بويى بۇل جەرگە وڭكەي اراق ىشەتىندەر جينالىپ, ءۇيسىز-كۇيسىز قاڭعىباستار وسىندا تۇنەپ تە جۇرەدى. باستى قاۋىپ – بالا-نەمەرەلەرىمىز ءۇشىن ەلەڭدەيمىز. جاقىندا لۋي پاستەر كوشەسى №100 ۇيدە تۇراتىن كورشىم:
– بيىل سەگىز توننا كومىردى امالسىزدان ەسىك الدىنان سارايعا شەلەكپەن تاسىدىق. ويتكەنى اسان قايعى كوشەسى جاعىنان وتىن قورا تەرەزەسىنە باراتىن جول كۇل-قوقىسپەن جابىلىپ قالعان. جىلدا كومىردى تىكەلەي وسى تەرەزەدەن لاقتىرىپ كىرگىزىپ الاتىنبىز. ەندى قيىن بولدى, – دەپ رەنىش ءبىلدىردى.
شىندىعىندا, ءبىز كىمگە رەنجۋىمىز كەرەك؟ ەلوردانىڭ تورىندە وتىرىپ, انىقتاپ ايتساق, شوقان ءۋاليحانوۆ جانە كەنەسارى مەن اباي داڭعىلدارى وتەتىن ورتالىق اۋداندا تۇرىپ, وسىنداي ولقىلىققا, كەلەڭسىز كورىنىسكە توزۋگە بولا ما؟ سوندىقتان بۇل جانايقايىمىزعا قالا اكىمى نازار اۋدارسا ەكەن دەگەن ۇلكەن ءۇمىت, وتىنىشپەن گازەتكە جازۋعا ءماجبۇر بولدىق.
بيمەندە قازانقاپ,
ەڭبەك ارداگەرى, زەينەتكەر
