كوگىلدىر وتىننىڭ قىزىعىن كورەر شاق الدا
گازدى پايدالانۋ – ەكونوميكالىق تۇرعىدان عانا ەمەس, ەكولوگيالىق تازالىعى جاعىنان دا ءتيىمدى. استانا قالاسى بىرتىندەپ كوگىلدىر وتىنعا كوشە باستادى.
ەكولوگيالىق تازا وتىندى الدىمەن ەلوردالىق قوعامدىق كولىكتەر پايدالانۋدا. بىلتىر پرەزيدەنت كۇنى قارساڭىندا ەل يگىلىگىنە جاراعان «ەكوتاكسيلەر» تەگىس گازبەن جۇرەدى. ال, بيىل قالا بيلىگى سۇيىتىلعان وتىنمەن جۇرەتىن 350 اۆتوبۋس ساتىپ الماقشى. بۇل جولاۋشى كولىكتەرىنىڭ 200-ءى استانا كۇنى قارساڭىندا جەتكىزىلەدى دەگەن جوسپار بار. ال, قالعان 150-ءى 2014 جىلدىڭ سوڭىنا دەيىن اكەلىنەتىن بولادى.
كولىكتەرىن كوگىلدىر وتىنمەن جۇرگىزە باستاعان استانانىڭ وزىنە گاز قاشان كەلەدى؟ بۇل ساۋال, اسىرەسە, قالانىڭ شەتكەرى ايماقتارىنداعى جۇرتشىلىقتى تولعاندىرىپ جۇرگەنى انىق. اعىمداعى جىلدىڭ اياعىنا قاراي «قازمۇنايگاز» ۇك استاناعا ماگيسترالدى گاز قۇبىرىن تارتۋدى جانە اۆتوماتتاندىرىلعان ەكى گاز تاراتۋ ستاناساسى قۇرىلىسىن جۇرگىزۋدى جوسپارلاپ وتىر. ەگەر گازبەن قامتۋعا ارنالعان العاشقى جوبالار ءساتتى اياقتالسا, الدىمەن شەتكى ايماقتاعى جەكە تۇرعىن ءۇي سەكتورلارى مەن يندۋستريالدىق پاركتە كوگىلدىر وتىن لاۋلايتىن بولادى.
جالپى العاندا, قالاعا 1,2 ملرد تەكشە مەتر گاز قاجەت كورىنەدى.