ەگەمەندىگىمىزدى الىپ, ەتەك-جەڭىمىز جيىلعالى ۇلتتىق قۇندىلىقتارىمىزبەن قايتا قاۋىشقانىمىز راس. اسىرەسە, جىلقى مىنەزدى حالقىمىزدىڭ تۇرمىسىمەن بىتە قايناسقان, قانىمىزداعى قايسارلىقپەن, تارپاڭدىقپەن ۇندەسكەن كوكپار ويىنى دالا قازاقتارىنىڭ عۇرپىنان قاي زاماندا دا جوعالعان ەمەس. بۇگىندە قالا قازاقتارىنىڭ دا شابىتپەن كىرىسەتىن, ءسۇيىپ تاماشالايتىن ويىنىنا اينالدى. بۇل سوزىمىزگە تالاي دودالاردا جەڭىس تۇعىرىنان كورىنىپ جۇرگەن «استانا» كوكپار كلۋبى دالەل.
ەلوردانىڭ ىرگەسىندەگى كوكتال تۇرعىن الابىندا قونىس تەپكەن كلۋبتىڭ سايىپقىران شاباندوزدارى كۇن سايىن دايىندىق ۇستىندە. ات جالىندا كوك سەركەنى تاقىمداعان جىگىتتەردىڭ تارتىسى دەلەبەڭىزدى قوزدىرىپ, قانىڭىزدى قىزدىرارى انىق. ونىڭ ۇستىنە, ءوزىڭىز قازاق بولعان سوڭ…
اۋىزدىقپەن الىسقان, «شوقپارداي كەكىلى بار, قامىس قۇلاق», جاراۋ جانۋارلار قانداي دوداعا دا ەكپىندەي ەنسە, بۇزىپ-جارارداي. ون ەكى ءورىم قامشىنى ەزۋگە قىستىرىپ, قىلقۇيرىقتى قوس وكپەدەن تەبىنە جەلىپ, تاقىمداعىنى قازاندىققا قۇلاشتاي لاقتىرعىڭىز كەلەدى-اق. ارينە, استانالىق وعلانداردىڭ قيمىلىنا كوڭىلىڭىز تولماعاندىقتان ەمەس, ولاردىڭ شەبەرلىگىنە ءسۇيسىنگەندىكتەن. سودان كەيىن قازاق بولعاندىعىڭىزدان…
كلۋبتا بۇگىندە ون ەكى شاباندوز, ون ءتورت جىلقى بار. شەتىنەن «سەن تۇر, مەن اتايىن» كوكپارشىلار. ىڭعايى سوقسا بولدى, قاقشىپ الاتىن قۇرىش بىلەكتىلەر. ايتايىن, سوم تۇياقتى سارىشاياندى تىزگىندەگەن – ارسلان قابجانوۆ, قيمىلى شالت شاحتىڭ ۇستىندەگى – دانيار عالينۇروۆ, گاليدەي دەپ اتالاتىن قاراگەردى مىنگەن – قارا كۇشتىڭ يەسى ءرۇستەم ماقۇلوۆ, فەراريدى تاقىمداعان – باۋىرجان ايتماعامبەتوۆ, قارابالتا ايعىردى كىسىنەتىپ جۇرگەن – قۋانىش رىسماعامبەتوۆ… شەتىنەن سپورت شەبەرلەرى, كلۋبتىڭ ماقتانىشتارى.
«جىگىتتەردىڭ ءبارى سان سىننان سۇرىنبەي وتكەن تاڭداۋلىلار. قاي-قايسىسىنا دا سەنىممەن قارايمىز. ەڭ باستىسى, باپتارى كەلىسسە بولعانى. سول ءۇشىن ەڭبەك ەتىپ, جاتپاي-تۇرماي جاتتىعۋدامىز. ءساۋىر ايىندا وڭتۇستىك قازاقستان وبلىسىندا ۇلكەن رەسپۋبليكالىق تۋرنير بولادى. قاتىسىپ, باعىمىزدى سىناپ, جۇلدەلىلەر قاتارىنان كورىنۋگە ءۇمىتتىمىز. ازىرگە دايىندىعىمىز ويداعىداي», – دەيدى باپكەر نۇرسۇلتان امانگەلدينوۆ.
«استانا» كوكپار كلۋبىنىڭ بۇگىنگە دەيىنگى جەتىستىكتەرى دە از ەمەس. 2012 جىلى ەل بىرىنشىلىگىندە, كەلەسى جىلى ازيا چەمپيوناتىندا توپ جارعاندارى بار. ودان كەيىن دە تالاي دودالارعا ءتۇسىپ, جۇلدەلى ورىنداردى قانجىعالادى. ماسايراپ, ماستاناتىن ءبىزدىڭ كوكپارشىلار ەمەس, قايتا العا ۇمتىلادى. قازاقتىڭ ءتول ونەرىن دامىتۋعا, بيىكتەتۋگە كۇش سالادى.
كلۋب باسشىسىنىڭ ورىنباسارى دۋلات ناگۋباەۆپەن تىلدەسۋدىڭ ءساتى تۇسكەن. «قۋانۋعا ءتيىسپىز, ءداستۇرلى ويىنىمىز دامۋ ۇستىندە. تاۋەلسىزدىگىمىزدىڭ ارقاسى عوي» دەيدى ۇلت قۇندىلىقتارىنا جاناشىر اعا. «بۇگىندە ءار ايماقتىڭ ءوز كلۋبى بار, بىرەۋىن وسال دەي المايمىز. ءبارى دە مىقتى باسەكەلەستەر. جاڭاعى دامىپ جاتىرمىز دەگەن ءسوزىمنىڭ تاعى ءبىر دالەلىن ايتايىن, قازىرگى تاڭدا تۇركى تىلدەس ەلدەردىڭ كوپشىلىگىندە كوكپار ويىنى ىلگەرىلەۋ ۇستىندە. حالىقارالىق دودالاردا ولاردىڭ اۋسەلەسىن بايقايمىز. كانىگى كوكپارشىلاردان كەم سوقپايدى ولارىڭ دا», – دەپ اعىنان جارىلدى دۋلات ءسابيتۇلى.
كلۋب وكىلدەرىنىڭ ايتۋىنشا, ناعىز كوكپار ەندى باستالادى. «بيىل – قوي جىلى. قوي جىلى توي جىلى بولايىن دەپ تۇر. توي بولعان سوڭ, ارينە, كوكپار بولادى. تارتىستى دودالاردا توپ جارا بەرەمىز» دەيدى ولار.
اسحات رايقۇل
