الداعى ۋاقىتتا كولىك كەپتەلىسىن ازايتۋ ماقساتىندا استانادا اقىلى جولدار پايدا بولماق. بۇل تۋرالى قالالىق ءماسليحاتتىڭ 39-سەسسياسىندا ءمالىم بولدى. جيىنعا استانا قالاسىنىڭ اكىمى باقىت سۇلتانوۆ پەن شاھار باسشىسىنىڭ ورىنباسارلارى, اۋدان اكىمدەرى مەن باسقارما باسشىلارى, قوعامدىق ۇيىم وكىلدەرى قاتىستى.
جالپى, سەسسيانىڭ كۇن تارتىبىندە 9 ماسەلە قارالدى. جيىندا العاشقى بولىپ ءسوز العان قالا اكىمىنىڭ ورىنباسارى سەرگەي حوروشۋن قالاداعى كەپتەلىستى ازايتۋ ءۇشىن قانداي جۇمىستار اتقارىلىپ جاتقانىن باياندادى.
– 77 شاقىرىمدى قۇرايتىن 24 كوشە بويىنداعى اۆتوبۋستارعا ارنالعان Bus lane جولاعى كەپتەلىستى 24 پايىزعا جەڭىلدەتتى. سونىمەن قاتار اباي, كەنەسارى كوشەلەرى ءبىر باعىتقا كوشىرىلگەلى بەرى مۇنداعى كەپتەلىس 30 پايىزعا ازايدى. ەندى كەلەر جىلدارى سول جاعالاۋداعى دوستىق, اقمەشىت, قوناەۆ, تۇركىستان سياقتى بىرقاتار كوشەلەردى دە ءبىر باعىتتىق جولعا اينالدىرىپ, ولارعا Bus lane جولاعىن قوسۋ جوسپارلانىپ وتىر. سول سياقتى كوشە قوزعالىسىن 2 مىڭعا جۋىق «سەرگەك» كامەراسى باقىلاپ تۇر. وسىنداي جۇمىستاردىڭ ارقاسىندا ەلورداداعى جول-كولىك وقيعاسى ەكى ەسەگە, قاقتىعىستان جاراقات الاتىندار سانى 25 پايىزعا, ال كىسى ءولىمى 53 پايىزعا تومەندەدى. ەندى كولىك ءنوپىرىن ازايتۋ ماقساتىندا كەيبىر كوشەلەردەگى جولداردى تەك تاڭعى ۋاقىتتا اقىلى قىلۋدى ويلاستىرىپ جاتىرمىز, – دەدى س.حوروشۋن ءوز سوزىندە.
جيىن بارىسىندا دەپۋتاتتار شەنەۋنىكتەرگە كولىك جۇيەسىنە قاتىستى سۇراقتارىن قويىپ, ۇسىنىس-تىلەكتەرىن ايتتى. مىسالى, قوعامدىق كولىك جولاۋشىلارىنىڭ كوپ نارسەگە كوڭىلى تولمايتىنىن, ولاردىڭ تەك ايالدامالار جانىنداعى تابلولار تۋرالى عانا جاقسى پىكىردە ەكەنىن ايتقان يرينا مانجانوۆا الداعى ۋاقىتتا شەتەلدەردەگى سياقتى School bus free اۆتوبۋستارىن قولدانىسقا ەنگىزىپ, وقۋشىلاردى تەگىن تاسىمالداۋ كەرەكتىگىن ۇسىندى. ال ءوز كەزەگىندە دەپۋتات ميراس شەكەنوۆ ۇركەر تۇرعىن ءۇي الابىنداعى جول قۇرىلىسىنىڭ ناقتى قاشان اياقتالاتىنىن سۇرادى. بۇل سۇراققا قالا اكىمىنىڭ ورىنباسارى قوسمان ايتمۇحامبەتوۆ بىلاي دەپ جاۋاپ بەردى: «سمەتالىق جوبا قۇجاتىنا تۇزەتۋلەر ەنگىزىلگەندىكتەن, جۇمىستار كەشەۋىلدەپ جاتىر. قارجىلاندىرۋ ەندى بولادى. جىل سوڭىنا دەيىن 10 كوشە جوندەلىپ, جول قۇرىلىسىنىڭ جۇمىسى كەلەر جىلى تولىقتاي اياقتالۋى ءتيىس».
قالانىڭ وڭ جاعالاۋىنداعى اۋەزوۆ, جەلتوقسان كوشەلەرىنىڭ بويى كولىك تۇراعىنا اينالعانىن, بۇل جەردەن جاياۋ ءوتۋدىڭ ءوزى قيىن ەكەنىن ايتقان ءماجيت شايداروۆ جەرگىلىكتى بيلىككە وسى ماسەلەنى رەتتەۋدى ۇسىندى. ءوز كەزەگىندە ءماسليحات سەسسياسىنا العاش رەت قاتىسىپ وتىرعان قالا باسشىسىنىڭ جۇمىسىنا ساتتىلىك تىلەگەن دەپۋتات اقىلبەك كۇرىشباەۆ:
– جاقىندا وزگە وڭىرلەردەن كوشىپ كەلگەن زەينەتكەرلەر قابىلداۋىمدا بولدى. ولار دا ءومىر بويى ەڭبەك ەتىپ, ەلگە قىزمەت جاساپ زەينەتكەرلىككە شىققان سوڭ ەلورداعا كوشىپ كەلىپتى. بىراق, وكىنىشكە قاراي, ولارعا قوعامدىق كولىكتەردە جەڭىلدىكپەن ءجۇرۋ مۇمكىندىگى بەرىلمەيدى. الداعى ۋاقىتتا وسى ماسەلەنى قايتا قاراۋلارىڭىزدى سۇرايمىن, – دەدى.
وسى جانە باسقا دا ماسەلەلەردىڭ بارلىعى نازاردان تىس قالمايتىنىن ايتقان قالا اكىمى باقىت سۇلتانوۆ الداعى ۋاقىتتا ءماسليحات دەپۋتاتتارىمەن كەڭەسە وتىرىپ جۇمىس ىستەيتىنىن اتاپ ءوتتى.
– ەكى اپتانىڭ ىشىندە ەلوردانىڭ تىنىس-تىرشىلىگىمەن تانىسىپ, كومىر ساتاتىن كاسىپورىنداردا, قالانىڭ سىرتقى اۋماقتارىندا بولىپ, جاعدايدى ءوز كوزىممەن كوردىم. جالپى, جۇزدەگەن جىلدىق تاريحى بار الەمنىڭ كوپتەگەن قالالارىمەن بار بولعانى 20-اق جىلدا تەرەزەسى تەڭەسكەن استانانىڭ بولاشاعى زور. بۇل تۇرعىدا بىزگە ارتىلعان مىندەتتەردىڭ دە سالماعى جوعارى. وسى ورايدا سىزدەرمەن كەڭەسە وتىرىپ, ەلباسى مەن ەلوردالىقتاردىڭ سەنىمىن اقتاۋعا بارىمدى سالامىن, – دەدى قالا باسشىسى.
