كورەيا پاۆيلونى اۋماعى جاعىنان «ەكسپو» قالاشىعىنداعى ەڭ ۇلكەن گەرمانيا, جاپونيا, رەسەي ەلدەرىمەن قاتار تۇر. 1804 شارشى مەتردى الىپ جاتقان نىسان قوس قاباتتان تۇرادى. ءبىرىنشى قاباتىندا كورمە زالى ورنالاسسا, ەكىنشى قاباتىندا كورەيا ەلىنىڭ مادەنيەتى پاش ەتىلمەك. جالپى, حالىقارالىق كورمە كەزىندە 250-گە جۋىق ءىس-شارا وتكىزۋدى جوسپارلاپ وتىر.
وڭتۇستىك كورەيا – «جاسىل» تەحنولوگيانىڭ دامۋى جاعىنان الدىڭعى قاتارلى ەل. «بولاشاقتىڭ ەنەرگياسى. اقىلدى ءومىر» دەپ اتالاتىن كورمەدە بالامالى ەنەرگيا سالاسىنداعى سوڭعى تەحنولوگيالارىن تانىستىرادى.
كارىستەردىڭ ارنايى دايىنداعان انيماتسيالىق شوۋىندا ءبىزدىڭ ەل تۋرالى كورسەتىلەدى. ۇشاققا مىنگەن «استانا» ەسىمدى قازاق بالاسى جەر الەمدى شارلاپ كەلەدى, ۇشاعىنان اققان ديزەلدى وتىنىمەن جەر-كوكتى لاستايدى. كەنەت ءبىر جەرگە كەلگەندە ۇشاقتىڭ مايى ءبىتىپ, توقتاۋعا ءماجبۇر بولادى. وسى كەزدە تاسادان شىققان كارىس قىزى بوس ىدىسىن الىپ, بەرمەي قويادى. شوۋدىڭ شەشىمى دە سول, كارىس قىز قازاق بالاسى كورمەگەن ءوز ەلىندەگى تىڭ تەحنولوگيامەن تانىستىرادى. تابيعاتتى قۇتقارۋداعى جاڭا بالامالى قۋات كوزدەرىنىڭ وزەكتىلىگىن كورسەتەدى. وڭتۇستىككورەيالىق تانىمال سۋرەتشى كيم دجونگ گي قويعان تۋىندىدا بالامالى ەنەرگيا كوزىنىڭ پايداسىنا ەل نازارىن اۋدارادى.
دامىعان تەحنولوگيالارىن پاش ەتۋگە كەلگەن بۇل ەلدىڭ ەلەڭ ەتكىزەر جاڭالىقتارىنىڭ ءبىرى – ەنەرگەتيكالىق ورمان. كەلۋشىلەرگە مۇندا ءبىر-ءبىر پلانشەتتەن بەرىلەدى. كۇنشىعىس ەلىنىڭ يننوۆاتورلارى دايىنداعان بۇل جوبادا جاڭا ەنەرگيا كوزدەرىنە ساياحات جاساۋعا مۇمكىندىك بار. سونىمەن قاتار, كورمەدە ەنەرگيا كوزدەرىن ءتيىمدى ساقتاۋ تەحنولوگياسى مەن ساندىق تەحنولوگيالارى تانىستىرىلادى. ولاردىڭ كەيبىر ەلەمەنتتەرى استاناداعى «حايۆيلل» تۇرعىن ءۇي كەشەنىندە قولدانىسقا ەنگەن.
پاۆيلونعا كەلۋشىلەر ءۇشىن الەمگە تانىمال Hyundai ماركالى اۆتوكونتسەرننىڭ سۋتەگى وتىنىمەن جۇرەتىن جاڭا كولىگى قىزىعۋشىلىق تۋدىردى. وڭتۇستىك كورەيا پاۆيلونى ديرەكتورىنىڭ ورىنباسارى كيم دجۋنگ-ءحۋننىڭ ايتۋىنشا, استاناعا ارنايى تەڭىز جولىمەن اكەلىنگەن سالماعى ءبىر جارىم توننالىق سۋتەكتىك اۆتوموبيل ەكولوگيالىق جاعىنان ءتيىمدى.
«وڭتۇستىك كورەيا پاۆيلونى ەنەرگيا سالاسىنداعى ەڭ سوڭعى تەحنولوگيالار مەن كارىس مادەنيەتىن كەڭىنەن تانىستىردى. ءبىز قولىمىزدان كەلگەنشە ءتۇرلى كونتەنت قالىپتاستىرۋعا تىرىستىق. حالىقارالىق پاۆيلوندار ىشىندە تانىمال بولعانىمىزدى ماقتانىشپەن ايتا الامىز. وڭتۇستىك كورەيا تمد اۋماعىندا ۇيىمداستىرىلعان كورمەگە العاش رەت قاتىسىپ وتىر. بۇل قادامىمىز ورتالىق ازيا ەلدەرىمەن اراداعى قاتىناستى جاقىنداتادى دەپ سەنەمىن» دەدى كورەيا پاۆيلونىنىڭ باسقارۋشىسى بيون يون سوپ مىرزا.
گۇلميرا ايماعانبەت
