كەشە كەستەلى كوركەم ءسوزدىڭ جالاۋى جەلبىرەگەن كۇن بولدى. «نۇر وتان» پارتياسىنىڭ ۇيىتقى بولۋىمەن العاش رەت وتكىزىلگەن «ۇلى دالا» رەسپۋبليكالىق شىعارماشىلىق بايقاۋىنىڭ جەڭىمپازدارى ماراپاتتالدى.
سالتاناتتى كەشتە ءسوز العان «نۇر وتان» پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ەلباسىنىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» اتتى ماقالالارى تاريحي سانامىزدى قالىپتاستىرۋعا, سول ارقىلى رۋحاني ءومىرىمىز بەن ۇلتتىق بولمىسىمىزدى جاڭعىرتۋعا تىڭ سەرپىن بەرگەندىگىن ايتىپ, وسى باعىتتا ۇيىمداستىرىلعان ادەبي شارانىڭ ماڭىزى زور ەكەندىگىن باياندادى.
جالپى بايقاۋعا 18 بەن 40 جاس ارالىعىنداعى قالامگەرلەر قاتىسىپ, 400-دەن استام شىعارما تۇسكەن. ولاردى تولەن ابدىك, الدان سمايىل, نەسىپبەك ايتۇلى, ۇلىقبەك ەسداۋلەت, نۇرتورە ءجۇسىپ, جۇسىپبەك قورعاسبەك, كوپەن امىربەك سەكىلدى اقىن-جازۋشىلار ساراپقا سالدى.
سونىمەن بايقاۋدىڭ ناتيجەسىندە بەس اتالىم بويىنشا جەڭىمپازدار انىقتالدى. ناقتىراق ايتقاندا, «پروزا» اتالىمىندا «قۇدىق باسىنداعى ەكەۋ» اتتى تۋىندىسىمەن ماقسات مالىكوۆ توپ جارسا, «پوززيا» اتالىمىندا قاراعاندىلىق جاس اقىن جانات جاڭقاشۇلىنىڭ باعى جاندى. «دراماتۋرگيا, كوركەم فيلمدەر مەن تەلەسەريالدار ستسەناريى» اتالىمىندا جاقىندا «Qazaqstan» ۇلتتىق ارناسىنان كورسەتىلگەن «كەيكى مەرگەن» تەلەسەريالىنىڭ ستسەناريىن جازعان سەرجان زاكەرۇلىنىڭ اسىعى الشىسىنان ءتۇستى. «بالالارعا ارنالعان شىعارمالار» اتالىمىندا باس جۇلدەنى «ۇلى دالانىڭ جەتى قىرى» اتتى ولەڭدەر توپتاماسىمەن اقىن باۋىرجان قاراعىزۇلى يەلەندى.
