قالا كۇنىنە ارنالعان مەرەكەلىك شارالار اياسىندا «استانا كۋبوگى» ءۇشىن كتك كوماندالارى اراسىنداعى حالىقارالىق فەستيۆال ءوتتى.
ءداستۇرلى تۇردە ۇيىمداستىرىلىپ وتىرعان بۇل ويىنعا وسى جولى «سبورنايا رۋدن» (ماسكەۋ), «سويۋز» (تيۋمەن), «ازيا MIX» (بىشكەك), «بۋمەرانگ» (بارناۋىل) كوماندالارى قاتىستى. كورەرمەندەردى ەرەكشە قۋانتقانى – ولاردىڭ اراسىندا استانالىق «قازاقستاننىڭ جاڭا قۇراماسى» دا بار. قازىلار القاسى جاس بۋىننىڭ قالجىڭدارىن ەرەكشە باعالاپ, كتك ويىندارىنىڭ جوعارى ليگاسىندا كورىنبەي جۇرگەن قازاقستاندى ساعىنعاندارىن جەتكىزدى. كەش بارىسىندا ساياسي-الەۋمەتتىك, قوعامدىق, تۇرمىستىق تاقىرىپتاعى ازىلدەر ايتىلدى. سونىمەن قاتار, شىمكەنت, قايرات نۇرتاس جايلى قالجىڭدار جيىلعانداردى قىران-توپان كۇلكىگە باتىردى.
قالجىڭمەن جۇزىمىزگە قان جۇگىرتكەن ازىلكەشتەردى ميحايل گۋليكوۆ, ميحايل گالۋستيان, تۇرسىنبەك قاباتوۆ جانە قالالىق مادەنيەت باسقارماسىنىڭ باسشىسى بولات ماجاعۇلوۆ باعالاپ, ناتيجەسىندە بايگەگە تىگىلگەن كۋبوكتى قىرعىزستان ويىنشىلارىنىڭ قانجىعاسىنا بايلادى.
ءمادينا جاقىپ
