3 شىلدە كۇنى مەملەكەت باسشىسى نۇرسۇلتان نازارباەۆ قالا نىساندارىن ارالاۋ بارىسىندا قۇرىلىسى قارقىن الىپ جاتقان «استانا ەسپو-2017» كورمە كەشەنى ايماعىنا ات باسىن تىرەپ قايتتى.
ەلباسى قۇرىلىستىڭ قالاي بولىپ جاتقانىمەن تانىسىپ, مەملەكەتتىك ورگاندار وكىلدەرىمەن جانە جاۋاپتى كومپانيا باسشىلارىمەن بىرگە نەگىزگى جوسپارلاردى تالقىعا سالدى. ناقتىراق ايتساق, «Sembol», «Mabetex», «بازيس-ا», «ساەم», «BI-Group», «Mega Management», «Astana Innovation» كومپانيالارىمەن قاتار قر مادەنيەت مينيسترلىگى, قر كولىك جانە كوممۋنيكاتسيا مينيسترلىگى, استانا قالاسى اكىمدىگى, سونداي-اق «قتج» ۇق» اق وزدەرىنىڭ جوبالارىن كەزەك-كەزەك تانىستىرىپ ءوتتى.
ولاردىڭ ەسەبى بويىنشا, پرەزيدەنتتىڭ ءوزى تاپسىرعانداي, كورمە الاڭىنىڭ نولدىك تسيكلى وسى جىلدىڭ قازان ايىندا اياقتالۋى كەرەك. بۇل ۋاقىتتىڭ تىعىزدىعىنا وراي كەستەنى قاتاڭ ساقتاۋ قاجەتتىلىگىن تۋدىرادى. سونىمەن قاتار, كوپ كەشىكپەي 5 جانە 8 قاباتتىق تۇرعىن ۇيلەر, مەكتەپ پەن بالاباقشا, مەيرامحانا, ساۋدا جانە بيزنەس ورتالىقتارىنىڭ قۇرىلىسى باستالاتىن بولدى. بارلىعى بىردەي 2016 جىلى تولىقتاي اياقتالادى دەپ كۇتىلۋدە. بۇدان بولەك, قالادا جاڭا تەمىر جول بەكەتىنىڭ قۇرىلىسى ءجۇرىپ جاتىر. ال, قىركۇيەكتەن باستاپ استانالىق اۋەجايدى قايتا جاڭعىرتۋ جۇمىستارى باستالادى. سونداي-اق, كورمە ۋاقىتىندا استانا كوشەلەرىندە جۇردەك اۆتوبۋستار جۇيتكيتىن بولادى.
قۇرىلىس ورىندارىن ارالاۋ بارىسىندا مەملەكەت باسشىسى «بۇل – الەمدىك اۋقىمداعى ءىرى ءىس-شارا. بۇكىل الەمگە ءوز مۇمكىندىكتەرىمىزدى كورسەتۋ ءۇشىن سىزدەرگە, مەردىگەرلەرگە ونىڭ دايىندىعىنا قاتىسۋعا سەنىم ءبىلدىرىلدى. سىزدەر ءوز قابىلەتتەرىڭىزدى وزگە نىسانداردا دالەلدەدىڭىزدەر. وتاندىق كومپانيالار, سونداي-اق ءبىزدىڭ ەلىمىزدە جۇمىس ىستەگەن شەتەلدىك مەردىگەرلەر بۇعان دەيىن ەشقاشان ۇياتقا قالدىرعان ەمەس, قازىر دە ءبارىن ۋاقىتىندا جانە ساپالى اتقارۋى ءتيىس» دەپ, كورمەگە كەلۋشىلەردى ەل استاناسىمەن تانىستىرىپ قانا قويماي, قازاق حالقىنىڭ مادەنيەتىن, ۇلتتىق سالت-ءداستۇرىن جوعارى دەڭگەيدە كورسەتۋدى تاپسىردى.
سونىمەن قاتار, ەلباسى بارلىق عيماراتتاردىڭ كورمە بىتكەننەن كەيىن دە پايدالانىلۋىنىڭ ماڭىزدىلىعىن تاعى ءبىر رەت ەسكە سالىپ, «باستاپقىدا قوناق ءۇي قىزمەتىن اتقاراتىن بارلىق عيماراتتار كەيىن باسپانا رەتىندە پايدالانىلۋعا ءتيىس. بۇل – كورمە اۋماعىندا سالىنعان بارلىق عىلىمي, ساۋدا جانە باسقا دا ورتالىقتارعا قاتىستى ماسەلە. كورمە ءۇشىن سالىنعان عيماراتتارى كەيىن پايدالانىلماي قالعان وزگە ەلدەردىڭ قاتەلىگىن قايتالاۋعا جول بەرۋگە بولمايدى. «استانا ەكسپو-2017» ۇلتتىق كومپانياسى وسىنى قاداعالاۋى ءتيىس» دەگەن تاپسىرما بەردى.
ەسكە سالا كەتەيىك, حالىقارالىق كورمەلەر تۋرالى كونۆەنتسياعا سايكەس, استاناداعى «ەكسپو-2017» كورمەسى 3 ايعا, ياعني 2017 جىلعى 10 ماۋسىمنان 10 قىركۇيەككە دەيىن سوزىلادى.
نۇريسلام قۇسپانعالي
