ۇلىبريتانيانىڭ استاناسى لوندون قالاسىنا 29 ءساۋىر كۇنى جولعا شىققان «Beibitshilik jane birlik. Peace and unity» حالىقارالىق ۆەلوشەرۋى قازاق ەلىنىڭ ەلورداسى نۇر-سۇلتان قالاسىندا مارەگە جەتتى.
ۆەلوشەرۋ كومانداسى قازاقستاندا تۇراتىن 6 ۇلتتىڭ وكىلدەرىنەن قۇرالعان. ولار ۆەلوسيپەدپەن 7 ەلدىڭ 55 قالاسىندا بولىپ, 6000 شاقىرىمدىق جولدى ءجۇرىپ ءوتتى. وسىعان بايلانىستى قازاقستان رەسپۋبليكاسىنىڭ سىرتقى ىستەر مينيسترلىگى ۇلىبريتانيا, بەلگيا, گوللانديا, گەرمانيا, پولشا, بەلارۋس پەن رەسەيدەگى قازاقستاننىڭ ەلشىلىكتەرىندە سول قالالاردا تۇراتىن قازاق ەتنوستارىنىڭ جانە جەرگىلىكتى باق وكىلدەرىنىڭ قاتىسۋىمەن بىرقاتار كەزدەسۋ وتكىزگەن. اتتانار الدىندا ۆەلوشاباندوزداردى لوندوندا جانە سولتۇستىك يرلانديادا تۇراتىن قانداستارىمىز بەن قازاق ستۋدەنتتەرى شىعارىپ سالىپتى.
بيىلعى جاستار جىلىنا ارناپ «قازاق گەوگرافيالىق قوعامى» Kazakh Geographic Society» قوعامدىق بىرلەستىگى ۇيىمداستىرعان ۆەلوشەرۋگە قاتىسۋشىلار ەلوردا كۇنىنە وراي باس قالاداعى «سارىارقا» ۆەلوترەگىنىڭ الدىنان قابانباي باتىر داڭعىلىمەن ۇلى دالا كوشەسىنە بۇرىلىپ, ودان وڭعا قاراي اقمەشىت كوشەسىمەن ءجۇرىپ, EXPO قالاشىعىنىڭ №9 فينيش قاقپاسىنان ءوتىپ, اۋقىمدى جوبانى تۇيىندەدى.
سالتاناتتى شارا ودان ءارى EXPO قالاشىعىنىڭ ساحناسىندا جالعاسىن تاپتى. «قازاق گەوگرافيالىق قوعامى» Kazakh Geographic Society» قوعامدىق بىرلەستىگىنىڭ پرەزيدەنتى تولەگەن تاستانبەكوۆ پەن قازاقستان حالقى اسسامبلەياسى توراعاسىنىڭ ورىنباسارى يۋسۋپ كەليگوۆ جينالعانداردى ەلوردا كۇنىمەن قۇتتىقتادى.
ايتا كەتسەك, سالاۋاتتى ءومىر سالتىن قالىپتاستىرۋ, بۇقارالىق سپورتتى دامىتۋ ماقساتىندا ۇيىمداستىرىلعان حالىقارالىق ۆەلوشەرۋ قازاقستاننىڭ بىرلىگى كۇنىنە وراي قازاقستان حالقى اسسامبلەياسىنىڭ ۇيىتقى بولۋىمەن باستالعان بولاتىن.
