ەلوردامىزدا كوپتەن بەرى ايتىلىپ جۇرگەن اسپالى كولىك ءتۇرى, ياعني, جەڭىل رەلستى LRT جوباسى اقىرى ىسكە اساتىن بولدى. «استانا قالاسىنىڭ جاڭا كولىك جۇيەسى. LRT» جوباسى اياسىندا ىسكە اساتىن عاجايىپ تاسىمال جۇيەسىنىڭ ينجەنەرلىك جەلىلەرىن شىعارۋ جانە قۇرىلىس-مونتاجداۋ جۇمىستارى بۇگىن باستالدى.
جەڭىل رەلستى كولىك جۇيەسىنىڭ جالپى ۇزىندىعى 22,4 شاقىرىمدى قۇرايدى. ول استانا حالىقارالىق اۋەجايى مەن EXPO-2017 كورمەسىن, ودان ءارى «ابۋ-دابي پلازا» كوپ قاباتتى كەشەنى جانە جاڭا تەمىرجول ۆوكزالىنىڭ اراسىندا جالعايتىن بولادى.
جاڭا تاسىمال قۇرالى ەستاكادالىق, ياعني, اسپالى جول ارقىلى قاتىنايدى. ارنايى جول جۇيەسى زاماناۋي جابدىقتارمەن جابدىقتالعان 18 جابىق ستانتسيادان جانە 19 جىلجىمالى قۇرام مەن دەپودان تۇراتىن بولادى. پويىزدارعا ەلەكتروندى تولەم جۇيەسى ورناتىلادى. سونىمەن قاتار, اقپاراتتاندىرۋ, بەينەباقىلاۋ, بەلگى بەرۋ جابدىقتارى تاعى بار.
كولىكتىڭ بۇل ءتۇرى استانا تابيعاتىنا تولىق ىڭعايلاستىرىلعان. ءارى قاۋىپسىز, ءارى ەكولوگيالىق جاعىنان تابيعاتقا ەش زالالى جوق بۇل تاسىمال قۇرالى استانا كوشەلەردەگى كولىك كەپتەلىسىن ءبىرشاما ازايتىپ, جولاۋشىلارعا قىزمەت كورسەتۋ جۇيەسىن جاڭا ساپالىق دەڭگەيگە كوتەرەدى دەپ كۇتىلىپ وتىر. اتالمىش جوبا 2017 جىلدىڭ جەلتوقسان ايىندا ىسكە قوسىلاتىن بولادى.
بۇركىت نۇراسىل
