2020 جىلدان باستاپ مىندەتتى الەۋمەتتىك مەديتسينالىق ساقتاندىرۋ جۇيەسى ىسكە قوسىلاتىنى بەلگىلى. سونىڭ اياسىندا ەلوردا تۇرعىندارىنا ەكى ءتۇرلى پاكەت بويىنشا مەديتسينالىق كومەك كورسەتىلەدى. بۇل تۋرالى الەۋمەتتىك مەديتسينالىق ساقتاندىرۋ قورى نۇر-سۇلتان قالاسى بويىنشا فيليالىنىڭ ءباسپاسوز قىزمەتى ءمالىم ەتتى.
ونىڭ ءبىرىنشىسى – كەپىلدەندىرىلگەن تەگىن مەديتسينالىق كومەك پاكەتى. دارىگەرلىك كومەكتى قاجەت ەتەتىن شۇعىل جاعدايلاردا كومەك كورسەتۋ, جەدەل جاردەم, سانيتارلىق اۆياتسيا, بىرقاتار سوزىلمالى اۋرۋلاردى ديناميكالىق باقىلاۋ, شۇعىل جاعدايدا ستاتسيوناردا ەمدەۋ وسى پاكەت شەڭبەرىندە جۇزەگە اسىرىلادى. ياعني, مەملەكەت تاراپىنان كەپىلدىك بەرىلگەن كومەك بويىنشا, ساقتاندىرىلعان-ساقتاندىرىلماعانىنا قاراماستان, بارلىق ازاماتتار ەمحاناعا قارالىپ, ستاتسيوناردا جاتىپ ەمدەلە الادى; الەۋمەتتىك ماڭىزى بار اۋرۋلار وسى پاكەت نەگىزىندە تەگىن ەمدەلەدى. مەديتسينالىق وڭالتۋ قىزمەتىن تەك تۋبەركۋلەزگە شالدىققاندار عانا پايدالانا الادى. كومەك قاجەت ەتەتىن ازاماتتارعا پاللياتيۆتىك قىزمەت (كومەك) كورسەتىلەدى. نەگىزگى جۇقپالى ەمەس اۋرۋلار مەن قورشاعان ورتاعا قاۋىپ توندىرەتىن جۇقپالى اۋرۋلار دا وسى ءتارتىپ بويىنشا ەمدەلەدى.
اتالعان پاكەت شەڭبەرىندەگى باستاپقى مەديتسينالىق-سانيتارلىق كومەك تۇرعىندار تىركەلگەن ەمحانالار تاراپىنان كورسەتىلەدى. مۇنداي كومەك تۇرىنە پروفيلاكتيكالىق ەكپەلەر مەن سكرينينگتەر, جۇكتى ايەلدەر مەن ءبىر جاسقا دەيىنگى بالالاردى دارىگەرلىك باقىلاۋ, سوزىلمالى اۋرۋلار مەن الەۋمەتتىك ماڭىزى بار اۋرۋلاردى ديناميكالىق باقىلاۋ سىندى مەديتسينالىق قىزمەت تۇرلەرى كىرەدى.
ال ەكىنشى پاكەت – مىندەتتى الەۋمەتتىك مەديتسينالىق ساقتاندىرۋ پاكەتى. وعان تابىسى ورتاشا ازاماتتاردىڭ قالتاسى كوتەرە بەرمەيتىن جوعارى تەحنولوگيالىق مەديتسينالىق قىزمەتتەر, اۋرۋحاناعا جاتۋعا سەبەپ بولعان, اسقىنعان اۋرۋلاردى (ەستەتيكالىق ماقساتتا جاسالعان پلاستيكالىق وپەراتسيالاردى قوسپاعاندا) ەمدەۋ, مرت, كومپيۋتەرلىك توموگرافيا, پتسر-اناليز, قانمەن جانە قان كومپونەنتتەرىمەن قامتاماسىز ەتۋ, مەديتسينالىق وڭالتۋ جانە قالپىنا كەلتىرۋگە باعىتتالعان ەم-دوم شارالارى, ەمدىك تاماقتانۋ, ت.س.س كىرەدى.
«مىندەتتى الەۋمەتتىك مەديتسينالىق ساقتاندىرۋدىڭ بىزگە نە قاجەتى بار؟» دەگەن ساۋالدى ءجيى ەستيمىز. ءبىزدىڭ ەلدە ازاماتتار دەنساۋلىققا جۇمسالاتىن جالپى شىعىننىڭ شامامەن 40 پايىزىن ءوز قالتالارىنان تولەيدى. ءدارى-دارمەك ساتىپ الادى, اقىلى كلينيكالارعا قارالادى. ءبىر سوزبەن ايتقاندا, وتباسىنىڭ ءبىر مۇشەسى اۋىرا قالسا, كوڭىل-كۇيدەن بولەك, وتباسى بيۋدجەتىنە دە ەداۋىر سالماق تۇسىرەتىنى داۋسىز. جاڭا جۇيە وسى شىعىنداردىڭ بەلگىلى ءبىر بولىگىن ساقتاندىرۋ ەسەبىنەن جابۋعا مۇمكىندىك بەرەدى. رەفورمانىڭ ماڭىزى مىنە, وسىندا.
تاعى ءبىر ايتا كەتەرلىگى, تەگىن مەديتسينالىق كومەكتى مەملەكەتتىك قانا ەمەس, جەكە مەنشىك كلينيكالار دا كورسەتەدى. الەۋمەتتىك مەديتسينالىق ساقتاندىرۋ قورى نۇرسۇلتان قالاسى بويىنشا فيليالىنىڭ ديرەكتورى نۇرلىبەك قابدىقاپاروۆتىڭ ايتۋىنشا, بيىل ەلوردادا مەملەكەتتىك تاپسىرىستى ورىنداپ جاتقان 93 مەديتسينا ۇيىمىنىڭ 58-ءى – جەكە مەنشىك. بىلتىرعى جىلمەن سالىستىرعاندا جەكەمەنشىك كلينيكالار سانى 9-عا كوبەيگەن. بۇل سان 2020 جىلى بۇدان دا كوبەيۋى مۇمكىن. ياعني, مەديتسينا ۇيىمدارىنىڭ اراسىندا باسەكەلەستىك ارتىپ, مەديتسينالىق قىزمەت ساپاسى ارتادى.
