ەلوردا تورىندە الداعى جەكسەنبى, ياعني 23 ماۋسىم كۇنى دۋاتلوننان اشىق قالالىق تۋرنير وتەدى. ەلوردا كۇنىنە ورايلاستىرىلعان سپورتتىق شارا وسىمەن ءتورتىنشى مارتە ۇيىمداستىرىلادى, دەپ حابارلايدى قالا اكىمدىگىنىڭ رەسمي سايتى.
«نۇر-سۇلتان دۋاتلون-2019» جارىسىندا 16 جاستان اسقانداردىڭ ءبارى قاتىسا الادى. ول ءۇشىن 21 ماۋسىم كۇنى ساعات 18.00-گە دەيىن ەلوردالىق ترياتلون فەدەراتسياسىنىڭ www.triathlonastana.kz سايتىندا تىركەلۋ قاجەت, 22 ماۋسىمدا ساعات 12:00-21:00 ارالىعىندا «بايتەرەك» مونۋمەنتىنىڭ الدىنداعى الاڭدا تىركەلگەندەرگە باستاپقى توپتامالار تاراتىلادى. جارىسقا قاتىسۋشىلار جۇگىرۋ, ۆەلوجارىس سپورت تۇرىنەن ءتۇرلى ءۇش قاشىقتىقتى باعىندىرادى. جۇگىرۋ قاشىقتىعى 5 جانە 2,5 كم قۇرايدى, ال ۆەلوسيپەدشىلەر 20 كم باعىندىرۋى ءتيىس. بۇل كەزەڭدە مىندەتتى تۇردە قاتىسۋشىنىڭ ءوز ۆەلوسيپەدى مەن شلەمى بولۋى كەرەك. دۋاتلوننىڭ تولىق رەگلامەنتى نۇر-سۇلتان قالاسى مادەنيەت جانە سپورت باسقارماسىنىڭ www.madeniet-sport-astana.kz سايتىندا جاريالانعان. جارىس تاڭعى ساعات 08:00 «بايتەرەك» مونۋمەنتىنىڭ جانىنداعى الاڭنان باستالادى. جۇگىرۋ جولى قوناەۆ ك-ءسى, قابانباي باتىر داڭعىلى, اقمەشىت ك-ءسى, دوستىق ك-ءسى جانە ماڭگىلىك ەل داڭعىلى ارقىلى وتەدى. سونىمەن قاتار قوناەۆ كوشەسىنەن باستاپ, تۇران داڭعىلىنىڭ بويىمەن «استانا جۇلدىزدارى» مونۋمەنتىنە دەيىن (قابانباي باتىر داڭعىلىمەن اينالما جول) 20 شاقىرىم جولدى قاتىسۋشىلار ۆەلوسيپەدپەن ءجۇرىپ وتەدى. مۇندا قاتىسۋشىلار كەرى بۇرىلىپ, تۇران داڭعىلىمەن دوستىق كوشەسىنە دەيىن, ماڭگىلىك ەل داڭعىلىمەن جۇرەدى, جارىس قوناەۆ كوشەسىندە اياقتالادى. «نۇر-سۇلتان دۋاتلون-2019» جارىسى بارىسىندا قاتىسۋشىلاردىڭ قاۋىپسىزدىگىن قامتاماسىز ەتۋ ماقساتىندا اتالعان كوشەلەردە كولىك قوزعالىسى شەكتەلەدى. ايتا كەتەيىك, دۋاتلون قاشىقتىعىن باعىندىرۋعا ەڭ كوپ دەگەندە 150 مينۋت ۋاقىت بەرىلەدى, ال بۇل ۋاقىتتان اسقان سپورتشىلار جارىستان شەتتەتىلەدى. جارىسقا جىبەرىلگەن سپورتشىلار 4 جاس ساناتىنا بولىنەدى – 16-29 جاس, 30-39 جاس, 40-49 جاس, 50 جاس جانە ودان اسقاندار. ءاربىر جاس ساناتى بويىنشا جەڭىمپازدار قاشىقتىقتى باعىندىرۋعا جۇمسالعان ەڭ از ۋاقىت بويىنشا انىقتالادى. حرونومەتراج ارنايى قوندىرعىنىڭ كومەگىمەن جەكە ەسەپتەلەتىن بولادى. جارىس سوڭىندا 1, 2, جانە 3-ورىن العان چەمپيوندار ماراپاتتالادى, سونداي-اق تىركەلگەن سپورتشىلار اراسىندا لوتەرەيا ويناتىلىپ, باعالى سىيلىقتار ۇتىسقا تىگىلەدى.
