كەشە نۇر-سۇلتان قالاسى ءماسليحاتىنىڭ كەزەكتى سەسسياسىندا ەلوردانى گازداندىرۋ, 2021-2023 جىلدارعا ارنالعان قالا بيۋدجەتىن بەكىتۋ سەكىلدى ماڭىزدى ماسەلەلەر قارالدى. بيىلعى قورىتىندى سەسسياعا قاتىسقان قالا اكىمى التاي كولگىنوۆ وسى جىلى پاندەمياعا, كارانتينگە بايلانىستى ءتۇرلى شەكتەۋلەرگە قاراماستان قالادا اۋقىمدى جۇمىس اتقارىلعانىن, بۇل جۇمىستارعا ءماسليحات دەپۋتاتتارى دا ۇلكەن ۇلەستەرىن قوسقانىن اتاپ ءوتتى.
– ەلباسىنىڭ بەس الەۋمەتتىك باستاماسىنان تۋىنداعان نەگىزگى ماقساتتاردىڭ ءبىرى – ەلوردانى گازداندىرۋ. بۇل – شىن مانىندە تاريحي جوبا. مەملەكەت باسشىسى قاسىم-جومارت توقاەۆ نۇر-سۇلتان قالاسىن ودان ءارى دامىتۋ جونىندەگى كەڭەستە بىرقاتار تاپسىرمالاردى بەرىپ, وسىعان دا نازارىمىزدى اۋداردى. گازداندىرۋدى ىسكە اسىرۋ ءۇشىن ءماسليحات دەپۋتاتتارىمەن بىرگە جەكە سەكتورعا بارىپ, تۇرعىندارمەن كەزدەستىك. ولاردىڭ وتىنىشتەرىن تىڭداپ, سول ورىندا شەشىم شىعاردىق. قورىتىندىسىندا از جۇمىس جاسالعان جوق. سونىڭ ارقاسىندا 300 شاقىرىمدى قۇرايتىن ىشكىورامدىق گاز تاراتۋ جەلىلەرى سالىندى. قازىر تەحنيكالىق شارتتاردى بەرىپ, جەكە سەكتوردى گازعا قوسۋ جۇمىستارى جۇرگىزىلىپ جاتىر. بۇل جۇمىس ەكولوگيا ماسەلەسىمەن, تۇرعىنداردىڭ دەنساۋلىعىمەن تىعىز بايلانىستى. الدىمىزعا قويىلعان ماقسات-مىندەتتەردى ورىندادىق, – دەدى ا.كولگىنوۆ.
قالانىڭ شەت ايماقتارىن دامىتۋعا قاتىستى مەملەكەت باسشىسىنىڭ تاپسىرمالارىنا توقتالعان قالا اكىمى 300 مىڭ ادام تۇراتىن ون التى تۇرعىن الاپتا 104 كوشەگە اسفالت توسەلگەنىن, 17 قوعامدىق كەڭىستىك سالىنعانىن ايتىپ ءوتتى.
– بۇرىن ءۇش اۋىسىممەن وقىتاتىن 8 ورتا مەكتەپ بولسا, ولاردىڭ سانىن ەكى ەسەگە قىسقارتتىق. قازىر وسىنداي 4 مەكتەپ قالدى. الدىندا 22 مەكتەپتە وقۋشىلار سانى شامادان تىس كوپ بولسا, بۇگىندە وسىنداي 16 مەكتەپ بار. ەگەر جاڭا مەكتەپتەردىڭ قۇرىلىسىن جالعاستىرماساق, جاعداي كۇردەلەنە تۇسەر ەدى, – دەدى ا.كولگىنوۆ.
الدا تۇرعان ماقساتتىڭ ءبىرى 3-جەو قۇرىلىسىن اياقتاۋ ەكەنىن ايتقان قالا باسشىسى وزەكتى ماسەلەلەردىڭ قاتارىندا سورعى تازارتۋ ستانساسىن سالۋ دا بار ەكەنىن جەتكىزدى. كارىزدەردى تازارتۋ قۇرىلعىلارى دا سالىنۋى كەرەكتىگىن ايتىپ ءوتتى.
– وسى ءۇش جۇيەلى ماسەلەنى قالانىڭ قارقىندى ءوسۋىن, تۇرعىندار سانىنىڭ ارتۋىن ەسەپكە الىپ, شەشۋىمىز كەرەك. بارلىق جوبالار دايىن. 3-جەو بويىنشا جوبالىق-سمەتالىق قۇجاتتاما وسى جەلتوقسان ايىنىڭ اياعىندا شىعادى. سورعى تازارتۋ ستانساسى بويىنشا دا ءتيىستى قۇجاتتار دايىن بولىپ قالدى. مەن بۇل جوبالاردى جۇزەگە اسىرىلۋ بارىسى جايلى مەملەكەت باسشىلىعىنا باياندادىم. ولاردىڭ تاراپىنان قولداۋ بار, – دەدى ا.كولگىنوۆ.
اعىمداعى جۇمىستارعا توقتالعان قالا باسشىسى بيىل 150 اۋلا اباتتاندىرىلعانىن, 60 قوعامدىق كەڭىستىك سالىنعانىن ايتىپ ءوتتى. اباتتاندىرۋ مەن جولداردى سالۋ جۇمىسى, مەكتەپتەر قۇرىلىسى جالعاساتىنىن جەتكىزدى.
– كەلەسى جىلى تاۋەلسىزدىگىمىزگە 30 جىل تولادى. بۇل – ەل تاريحىنداعى ايتۋلى وقيعا. سوندىقتان الداعى جىلى دا ناقتى ىستەردى اتقارۋىمىز كەرەك. بيىل 3 ميلليون شارشى مەتر تۇرعىن ءۇيدى پايدالانۋعا بەردىك. بۇل – ۇلكەن كورسەتكىش. سالىستىرمالى تۇردە ايتقاندا, وتكەن جىلى 1 ميلليون 700 مىڭ شارشى مەتردى تاپسىرعان ەدىك. ەندى جەدەل تۇردە ەسكى, اپاتتى ۇيلەر ماسەلەسىن شەشەمىز. قالادا سونداي 200-دەن استام ءۇي بار, – دەدى ا.كولگىنوۆ.
تۇرعىنداردى جۇمىسپەن قامتۋ ماسەلەسىنە توقتالعان اكىم بيىل «جۇمىسپەن قامتۋدىڭ جول كارتاسى» مەملەكەتتىك باعدارلاماسى ارقىلى 15 مىڭنان اسا ادام جۇمىسقا تۇرعىزىلعانىن جەتكىزدى.
– الدا اتقارار مىندەتتەرىمىز ءالى دە كوپ. كەشە «قىزىل ايماققا» قايتادان كىردىك. سوندىقتان شەكتەۋ شارالارى جالعاسادى. قازىر ءبارىمىز قاۋىپتىڭ الدىن الۋ ءۇشىن ولاردىڭ ماڭىزىن حالىققا ءتۇسىندىرۋىمىز كەرەك. باستى ماقساتىمىز – حالىقتىڭ بىزگە ارتقان سەنىمدى اقتاۋ, جۇكتەلگەن جۇمىستى ناتيجەلى اتقارۋ, – دەدى ا.كولگىنوۆ.
قالانى گازداندىرۋ بارىسىمەن قالا اكىمىنىڭ ورىنباسارى ەرمەك قيزاتوۆ, 2021-2023 جىلدارعا ارنالعان قالا بيۋدجەتىمەن ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ تانىستىردى.
