بۇرناعى كۇنى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە «ماقتىمقۇلى جانە ءداستۇرلى تۇركى پوەزياسى» تاقىرىبىندا كونفەرەنتسيا ءوتتى. تۇركى اكادەمياسى ۇيىمداستىرعان بۇل شارا تۇركىمەننىڭ ۇلى اقىنىنىڭ 290 جىلدىعىنا ارنالعان. باسقوسۋعا تۇركى تىلدەس ەلدەردىڭ ەلشىلەرى, مەملەكەت جانە قوعام قايراتكەرلەرى, سەنات جانە ءماجىلىس دەپۋتاتتارى, سونداي-اق, كورنەكتى جازۋشىلار, عالىمدار قاتىستى.
كونفەرەنتسيانى قازاقستاننىڭ ەڭبەك ەرى ءابىش كەكىلباەۆ قۇتتىقتاۋ سوزبەن اشتى. حالىق جازۋشىسى بۇل جيىن ەكى ەل اراسىنداعى رۋحاني-ادامگەرشىلىك نەگىزدەردى نىعايتا تۇسەتىنىن ايتىپ, ماقتىمقۇلى شىعارمالارىن كەڭىنەن تاراتىپ, جاستاردىڭ بويىنا ءسىڭىرۋ قاجەتتىگىن باسا ايتتى. «شىعىس پوەزياسىنىڭ جارىق جۇلدىزى ماقتىمقۇلى پىراعى تەك تۇركىمەن حالقىنىڭ عانا ماقتانى ەمەس, تۇگەل تۇركىنىڭ تەگەۋىرىندى اقىنى ءھام ورتاق جاۋھارى» دەگەن ءا.كەكىلباەۆ ءسوزىنىڭ سوڭىندا تۇركىمەن تىلىنەن ءوزى تارجىمالاعان ماقتۇمقۇلىنىڭ «مىزعىماس ەل» دەيتىن ولەڭىن وقىپ بەردى.
وتىرىس بارىسىندا تۇركىمەنستاننىڭ قازاقستانداعى توتەنشە جانە وكىلەتتى ەلشىسى ماقتىمقۇلى اقمىرادوۆ, قازاقستان جازۋشىلار وداعىنىڭ توراعاسى, سەنات دەپۋتاتى نۇرلان ورازالين, «ەگەمەن قازاقستان» رەسپۋبليكالىق گازەتىنىڭ پرەزيدەنتى ساۋىتبەك ابدراحمانوۆ, تۇركى كەڭەسى اقساقالدار كەڭەسىنىڭ توراعاسى ءادىل احمەتوۆ, پرەزيدەنت ءباسپاسوز قىزمەتى جەتەكشىسىنىڭ ورىنباسارى باۋىرجان وماروۆ, تۇركىتانۋشى شاكىر ىبىراەۆ, تۇركىمەنستاندىق عالىم انناگۋربان اشيروۆ بايانداما جاسادى.
وسىعان دەيىن «تۇركسوي» حالىقارالىق ۇيىمى ءتۇركى حالىقتارىنىڭ ۇلى تۇلعالارىنا ارنالعان «ماقتىمقۇلى» مەدالىن ءازىرلەگەن ەكەن. جيىندا وسى سىيلىقتىڭ العاشقىسى تۇركى تىلدەس حالىقتاردىڭ ادەبيەتىن الەمگە تانىتىپ, قازاق-تۇركىمەن ىنتىماقتاستىعىنا ۇلەس قوسقانى ءۇشىن ءابىش كەكىلباەۆقا بەرىلدى.
جيىندا ارناۋلى قارار قابىلدانىپ, ماقتىمقۇلىنىڭ اندەرى شىرقالدى.
ءسانيا سپانديار
