كەشە “كەرۋەن” ويىن-ساۋىق ساۋدا ورتالىعىندا ەلىمىزدەگى تۇڭعىش سپورت حابارلارى ارناسى ءبىر جىلدىق مەرەيتويىن اتاپ ءوتتى. مەرەكەلىك شارانى «قازاقستان» تەلەراديو كورپوراتسياسى» اق باسقارما ءتورايىمى نۇرجان جالاۋقىزى اشتى. ول ارنا قىزمەتكەرلەرىن قۇتتىقتاپ, تولاعاي تابىس تىلەدى. سونداي-اق, باس قوسۋ بارىسىندا رەسپۋبليكالىق «قازاقستان» تەلەراديوكورپوراتسياسى مەن قر سپورت جانە دەنە شىنىقتىرۋ ىستەرى اگەنتتىگى ءوزارا ارىپتەستىك تۋرالى مەموراندۋمعا قول قويدى.
تاعى ءبىر ماڭىزدى ءسات – تۇڭعىش وتاندىق سپورت تەلەارناسىن قۇتتىقتاۋعا اقش-تان وليمپيادا ويىندارىنىڭ بەس دۇركىن چەمپيونى نەللي كيم كەلدى. مەرەكەلىك شارادا اتى اڭىزعا اينالعان گيمناستشى, وليمپيادا ويىندارىنىڭ بەس دۇركىن چەمپيونى نەللي كيم تۋرالى تۇسىرىلگەن «ءبىزدىڭ كيمانەللي» دەرەكتى ءفيلمى كورسەتىلدى. بۇل – وتاندىق تەلەارنا تاريحىندا تۇسىرىلگەن العاشقى ومىرباياندىق فيلم. تۋىندىدا اتاقتى سپورتشىنىڭ ءومىرى مەن سپورتتاعى جەتىستىكتەرى تۋرالى تولىق باياندالادى.
سونىمەن قاتار, وليمپيادا چەمپيونى جاقسىلىق ۇشكەمپىروۆ, وليمپيادا ويىندارىنىڭ ەكى دۇركىن چەمپيونى يليا يلين, ازيا ويىندارىنىڭ ءابسوليۋتتى چەمپيونى ءاليا ءجۇسىپوۆا جانە باسقا دا اتاقتى سپورتشىلار كەش قوناقتارى بولدى.
مەرەيتوي سوڭىندا جيىنعا قاتىسۋشىلار داستارقان باسىندا باس قوستى.
ساپارعالي قانات
