باس قالاداعى №2 كوپسالالى قالالىق اۋرۋحانا تەك استانالىقتارعا عانا ەمەس, سونىمەن قاتار ەلىمىزدىڭ باسقا وڭىرلەرى مەن شەتەلدەن كەلگەن ازاماتتارعا دا مەديتسينالىق ساپالى قىزمەت كورسەتەدى. اكۋشەرلىك جانە 62 كلينيكالىق بولىمشەدەن تۇراتىن ەمدەۋ ورنى بىلىكتى كادرلارى جانە زاماناۋي جابدىقتارىمەن ەرەكشەلەنەدى. اۋرۋحانانىڭ تمد اۋماعىندا بالاماسى جوق باسقا دا قىزمەتتەرى جانە قازىرگى تاڭداعى پروبلەمالارى تۋرالى مەكەمە ديرەكتورى نۇربول تۇرسىنباەۆ ايتىپ بەردى.
– ءسىز باسقاراتىن اۋرۋحانا ەلوردانىڭ دەنساۋلىق ساقتاۋ سالاسىندا قانداي ورىن الادى, نەسىمەن ەرەكشەلەنەدى?
– اۋرۋحانا كلينيكالىق جانە اكۋشەرلىك بولىمشە دەپ اتالاتىن 2 بلوكتان تۇرادى. 670 توسەك ورىندىق اۋرۋحانانىڭ 200 ورنى اكۋشەرلىك بلوكتا, قالعانى كلينيكالىق. بۇگىنگى تاڭدا 3 قالالىق ورتالىق ءبىزدىڭ كلينيكالىق بولىمشەدە ورنالاسقان, اتاپ ايتساق, جەدەل كارديولوگيا جانە كارديوحيرۋرگيا ورتالىعى, وعان بۇكىل قالا بويىنشا ينفاركتكە شالدىققاندار كەلەدى. بۇل جەردە جۇرەك ترانسپلاتاتسياسىنان باسقا ەمنىڭ ءبارى كورسەتىلەدى, جۇرەك وتاسى جاسالادى. ەكىنشى ورتالىق – ۋرولوگيا وتورونتولوگيا. ءۇشىنشىسى – بىلتىر اشىلعان كوز ميكروحيرۋرگياسىنىڭ ورتالىعى. قازاقستاندا, سونىڭ ىشىندە ەلوردادا مەديتسينالىق ءتۋريزمدى دامىتۋعا وسى ورتالىقتاردىڭ قوسار ۇلەسى زور. اسىرەسە, قازىرگى تاڭدا سانكتسياعا بايلانىستى رەسەي ازاماتتارى بىزگە كوپتەپ كەلۋدە. قازاقستاننىڭ وزىندە 1800-1900 ادام كوز ميكروحيرۋرگياسى بويىنشا وتاعا كەزەكتە تۇر. ولارعا «امسق» قورى ارقىلى تەگىن كومەك كورسەتۋ جولدارى قاراستىرىلۋدا. بىلتىر دەمەۋشىلەر كومەگىمەن تمد اۋماعىندا بالاماسى جوق اريتمولوگيالىق وتا جاساۋعا ۇلكەن اپپارات الىندى. سونىمەن بىرگە پاندەمياعا قاراماي, وتكەن جىلى بىزدە ينسۋلت ورتالىعىندا كونفەرەنتسيا وتكىزىلدى, وعان ونلاين تۇردە امەريكالىق ماماندار قاتىستى. سونىڭ بارىسىندا سەrەbrا دەگەن باعدارلامانى قويعىزۋدى قولعا الدىق. پاندەميا كەسىرىنەن جۇرەك جانە ينسۋلت اۋرۋلارى كوبەيدى. ينفاركت اۋرۋلارى جاسارىپ كەتتى, بۇرىن ورتا جاستان اسقاندار اۋىرسا, قازىر 18 جاستاعى جاستار دا ناۋقاستار قاتارىندا. بۇعان كوروناۆيرۋس ينفەكتسياسى, سترەستىڭ كوپتىگى, دۇرىس تاماقتانباۋ اسەر ەتۋى مۇمكىن. اتالعان باعدارلاما سونىڭ الدىن الۋعا ارنالعان. تاعى ءبىر ەرەكشەلىگىمىز – قالا بويىنشا بەت-جاق حيرۋرگياسى تەك بىزدە عانا. سونىمەن قاتار اكۋشەرلىك بلوكتا جاڭا تۋعان نارەستەلەردىڭ حيرۋرگياسى بار. مۇندا 500 گرامنان باستاپ شالا تۋعان بالالارعا, تۋا ءبىتتى جۇرەك جەتىسپەۋشىلىگى بولعان, وڭەش, اسقازان, وكپە, ىشەگى دۇرىس دامىماي قالعان سابيلەرگە كومەك كورسەتىلەدى. كوز جانارىنىڭ دۇرىس كورمەۋىنە بايلانىستى لازەر اپپاراتى الىنىپ, ەمدەيتىن ءبىر ماماندى يزرايلگە جىبەرىپ وقىتتىق. شالا تۋعان بالالاردى ءتيىستى سالماعىن جيناعانعا دەيىن 4-5 اي جاتقىزىپ, باعىپ-قاعاتىن 30 توسەككە شاقتالعان ارنايى بولىمشە بار. ودان بولەك, تۋعاننان باستاپ 3 جاسقا دەيىنگى مۇگەدەك بالالارعا كومەك كورسەتەتىن بولىمشەمىز جۇمىس ىستەيدى.
– اكۋشەرلىك بلوك جونىنەن دە قىزمەتتى جولعا قويىپسىزدار, كەزىندە وسى جەردە بوسانعان 5 انانىڭ ءولىمى تۋرالى جاعىمسىز اقپارات تاراپ ەدى.
– ءيا, ونداي جاعداي بولدى. بىراق ول وتكەننىڭ ەنشىسىندە قالدى. ونىڭ ءبارى بالا بوسانعاننان كەيىنگى اسقىنۋلاردى ەمدەيتىن مامانداردىڭ بولماۋىنان بولدى. وسى ماسەلەنى شەشۋ ءۇشىن 2018 جىلى ەكى بلوكتى قوسىپ, ءبىر اۋرۋحانا جاسادىق. سودان باستاپ ءبارى جاقساردى. بىلتىر بىزدەگى اكۋشەرلىك بلوكتا 14 مىڭ بالا دۇنيەگە كەلدى, بۇل – وتە ۇلكەن كورسەتكىش. ماسەلەن, سقو-دا ءبۇتىن ءبىر وبلىستا 6700 بالا دۇنيەگە كەلگەن. ودان بولەك, انانى امان-ەسەن بوساندىرۋ بويىنشا دا ءى ورىندا تۇرمىز. ءتىپتى قازىرگى تاڭدا ءبىزدىڭ اۋرۋحانامىزعا قازاقستان بويىنشا قيىن بوساناتىن ايەلدەر كەلىپ, اقىلى تۇردە قىزمەتكە جۇگىنەدى. ولارعا بارلىق جاعداي جاسالعان.
– اقىلى قىزمەتتى ارتتىرۋداعى ماقسات نە? جىرتىققا جاماۋ بولۋ ءۇشىن بە?
– ءيا, اقىلى تۇردە قىزمەتتەردى دامىتۋدا كوزدەگەنىمىز بار. قازىرگى تاڭدا اۋرۋحانا شتاتىندا 2000 ادام جۇمىس ىستەيدى. دارىگەرلەر مەن ورتا بۋىن مەدبيكەلەر جالاقىسى 30 پايىزعا ءوستى. بىراق كىشى پەرسونال – سانيتارلارعا جانە كۇزەتشى, كولىك جۇرگىزۋشىسى, ت. ب. ماماندىقتارعا كوبەيتىلگەن جوق. سوندىقتان اۋرۋحانانىڭ ءوز قارجىسىنان جىلىنا 160 ملن تەڭگە سولارعا ۇستەماقى رەتىندە بولەمىز. ول قارجى وسىنداي اقىلى قىزمەتتەردى جانداندىرۋ ارقىلى جينالادى. بۇل دا جەتىستىك. جالپى بىزدە مەنەدجمەنت جۇيەسى جاقسى جولعا قويىلعان. اشىلعان اقىلى ەمحانامىزدىڭ اكۋشەرلىك بلوگىنا ءوز ەركىمەن كەلىپ تىركەلەتىندەر بار. سونىمەن قاتار مەديتسينالىق ءتۋريزمدى دامىتۋ باعدارلاماسى بويىنشا شەتەلدىك ازاماتتارعا دا اقىلى قىزمەت كورسەتىلەدى. الايدا ءوزىمىز جيناعان قاراجات بارلىق شىعىندى جابۋعا جەتكىلىكسىز. «امسق» قورى ارقىلى بەرىلەتىن قارجى تىم از. ول ەمگە جۇمسايتىن شىعىندى عانا جابادى. ال عيماراتقا جوندەۋ جۇرگىزۋگە جەتپەيدى.
– عيماراتتىڭ سالىنعانىنا 12 جىل ەندى بولادى, جوندەۋ قاجەت ەتىلە مە?
– ءيا, كەزىندە مەردىگەر قۇرىلىس مەكەمەلەرى ساپاسىز ەتىپ سالعان. سونىڭ سالدارىنان جوندەۋ جۇمىستارىن ساپالى تۇردە جۇرگىزۋگە تۋرا كەلەدى. شاتىرىن جوندەۋ دەگەندەي. زاڭ بويىنشا كۇردەلى جوندەۋ عيماراتتىڭ سالىنعانىنا 15 جىل وتكەن سوڭ بارىپ جۇرگىزىلۋ كەرەك ەكەن. سوندىقتان ءوز كۇشىمىزبەن ورتاشا جوندەۋ جۇرگىزىپ ءجۇرمىز. دەمەۋشىلەردىڭ كومەگىمەن بىلتىر اكۋشەرلىك بلوكتا 12 دۋش قابىلداۋ ورنىن اشتىق, سەبەبى بالا كۇتىمىنە قاراپ جاتقان انالار مۇندا 3-4 اي جاتادى, ال جۋىناتىن جەر جوق ەدى. سونىمەن قاتار ولار بيىل 2 اجەتحانانى جوندەپ بەردى.
– ال جابدىقتار جاڭارتۋ جاعىنان كەدەرگىلەر جوق پا?
– اۋرۋحانا اشىلعالى ەش جابدىق جاڭارتىلماعان ەدى. الدىڭعى جىلى قالا اكىمى التاي كولگىنوۆ كەلىپ, اۋرۋحانا جۇمىسىمەن تانىسقان كەزدە جەتىسپەيتىن قۇرال-جابدىقتاردى 1 ملرد 162 ملن تەڭگەگە الىپ بەردى, سۇراعان قۇرال-سايماننىڭ 30 پايىزىن عانا الدى, قالعان 30 پايىزىن بيىل الىپ بەرەمىز دەپ جوسپارعا ەنگىزدى. بىراق وسى جىلعى پرەزيدەنت جولداۋىندا بەرىلگەن تاپسىرما بويىنشا قۇرال-سايماندى «سق-فارماتسيا» جشس ارقىلى الاتىن بولدىق. كوپ ءدارى-دارمەكتى وسى سەرىكتەستىك ارقىلى الامىز, بىراق ونىڭ باعاسى وتە جوعارى. وسىعان وراي, ءدارى-دارمەككە باعا ساياساتىن قايتا قاراۋ تۋرالى ۇسىنىس جازدىق. ال بىلتىر اكىمدىك كت اپپاراتىن ورناتىپ بەردى, ونىڭ ەرەكشەلىگى – جۇرەك-قان تامىرلارىن 3D رەجيمىندە كورۋگە بولادى, كەرەمەت اپپارات! ول ءۇشىن اكىمدىككە ريزاشىلىعىمىز زور.
– قالا تۇرعىندارىنىڭ قانشا بولىگى ءسىزدىڭ اۋرۋحانانى تاڭدايدى? جالپى ولاردا تاڭداۋ قۇقىعى بار ما?
– قالا تۇرعىندارىنىڭ سەنىمىنەن شىققانىمىز سونداي, ەلوردالىقتاردىڭ 70 پايىزى بىزگە كەلەدى. كۇندەلىكتى 200-دەن استام ناۋقاس جەدەل جاردەم ارقىلى, 100 ناۋقاس ءوزى كەلەدى. قايدان كەلسە دە, ولارعا قىزمەت كورسەتۋدەن باس تارتپايمىز. باستاپقى تەكسەرۋىن جۇرگىزىپ, ءارى قارايعى ەمى بويىنشا جولداما بەرەمىز. كلينيكالىق بولىمشەدە 400 ورىن بولسا, كۇنىنە 300-350 ناۋقاس بىزگە قارالۋعا كەلەدى, سونىڭ ىشىندە ءجۇز ادام جاتقىزىلىپ, ەمدەلەدى. وسىلايشا بىلتىر ءبىزدىڭ اۋرۋحاناعا 115 مىڭ ادام قارالىپ, سونىڭ 49 مىڭى ەمدەلىپ شىقتى. ماماندارىمىزعا سۇرانىس كوپ, قازىر حالىق اۋرۋحانا ەمەس, مامان تاڭدايدى. سەبەبى كادر ساپالى جانە مەدپەرسونالدىڭ كوبىن شەتەلگە جىبەرىپ وقىتۋعا مۇمكىندىكتەر قاراستىرىلعان.
