جاقىندا نۇر-سۇلتان قالاسى ونوماستيكا كوميسسياسىنىڭ وتىرىسىندا باس قالاداعى كەيبىر مەكتەپتەرگە بەلگىلى تۇلعالار ەسىمىن بەرۋ تۋرالى ۇسىنىستار قولداۋ تاپتى. ۇرپاق تاربيەسىندە ماڭىزى زور ماسەلە جايلى ۇسىنىستى نۇر-سۇلتان قالاسى تىلدەردى دامىتۋ جانە ارحيۆ ءىسى باسقارماسىنىڭ باسشىسى ساكەن ەسىركەپ قالالىق ءماسليحات سەسسياسىندا مالىمدەگەن ەدى.
بىرىنشىدەن, قالاداعى №11 مەكتەپ-ليتسەيگە كورنەكتى مەملەكەت قايراتكەرى, عالىم, ەتنوگراف وزبەكالى جانىبەكتىڭ ەسىمىن بەرۋ تۋرالى ايتىلدى.
«وزدەرىڭىز جاقسى بىلەسىزدەر, بيىل – وزبەكالى جانىبەكوۆتىڭ 90 جىلدىعى. ول كەڭەس وداعىنىڭ سوڭعى جىلدارى جاۋاپتى قىزمەت اتقارىپ, ءتول رۋحانياتىمىزدىڭ, مادەنيەتىمىزدىڭ دامۋىنا, ونىڭ قايتا تۇلەۋىنە وراسان زور ۇلەس قوستى. ەكىنشى ۇسىنىس, №69 مەكتەپ-گيمنازياعا ارحەولوگ, تاريح عىلىمدارىنىڭ دوكتورى, بەلگىلى اكادەميك كەمەل اقىشەۆتىڭ ەسىمىن بەرۋ. كەمەل اقىشۇلى – قازاقستان ارحەولوگياسىنىڭ نەگىزىن قالاۋشىلاردىڭ ءبىرى. ول – سانالى عۇمىرىن وتاندىق تاريح, ارحەولوگيا عىلىمىن دامىتۋعا ارناعان ءىرى عالىم. ونىڭ ەسىك قورعانىنداعى ايگىلى «التىن ادامدى» تاپقانىن, ەجەلگى وتىرار, سارايشىق قالالارىن زەرتتەگەنى – وسى سوزىمىزگە ايقىن دالەل. سونىمەن قاتار №2 بالالار مۋزىكا مەكتەبىنە كۇمىس كومەي ءانشى, قازاقستاننىڭ جانە بۇرىنعى كسرو حالىق ءارتىسى, حالىق قاھارمانى روزا باعلانوۆانىڭ ەسىمىن بەرۋ كەرەك. كەلەر جىلى روزا تاجىبايقىزىنىڭ تۋعانىنا 100 جىل تولادى. ونىڭ قازاق مۋزىكا ونەرىنە قوسقان ۇلەسى ۇشان-تەڭىز. ال №3 بالالار مۋزىكا مەكتەبىنە ايگىلى وپەرا ءانشىسى, پەداگوگ, كسرو حالىق ءارتىسى, قاز كسر حالىق ءارتىسى, پروفەسسور, سوتسياليستىك ەڭبەك ەرى ەرمەك سەركەباەۆتىڭ ەسىمىن بەرۋدى ۇسىنامىز. ەرمەك بەكمۇحامەدۇلى قازاقتىڭ ءان ونەرىن تورتكۇل دۇنيەگە پاش ەتىپ, الەمدىك بيىككە كوتەرگەن تۇلعا ەكەنى بارشاعا ايان. سونداي-اق №66 مەكتەپ-ليتسەيگە كورنەكتى مەملەكەت قايراتكەرى, قازاقستاندى شيرەك عاسىرعا جۋىق باسقارعان دىنمۇحامەد قوناەۆتىڭ ەسىمىن بەرۋ قاجەت. دىنمۇحامەد احمەتۇلىنىڭ ەل دامۋىنا قوسقان ۇلەسىن بارشامىز جاقسى بىلەمىز» دەدى باسقارما باسشىسى.
ءماسليحات وتىرىسىندا مەكتەپتەرگە ەسىم بەرۋگە بايلانىستى ايتىلعان التىنشى ۇسىنىس – №83 مەكتەپ-گيمنازياعا قازاقتىڭ اسا كورنەكتى اعارتۋشى-پەداگوگى, جازۋشى ىبىراي ءالتىنساريننىڭ ەسىمىن بەرۋ تۋرالى بولدى. ارينە, قيىن-قىستاۋ كەزەڭدە بالا وقىتىپ, العاشقى قازاق مەكتەپتەرىن اشقان ىبىراي ءالتىنساريننىڭ ەسىمىن قالاي ۇلىقتاساق تا جاراسادى. ال ءتىلدى تەرەڭدەتىپ وقىتاتىن №77 مەكتەپ-گيمنازياعا اقىن, حالىق جازۋشىسى, جۋرناليست, قازاقستاننىڭ ەڭبەك سىڭىرگەن قايراتكەرى فاريزا وڭعارسىنوۆانىڭ ەسىمىن بەرۋدىڭ ءمانى وتە زور.
«وسىعان وراي, سىزدەردىڭ قاراۋلارىڭىزعا «نۇر-سۇلتان قالاسىنىڭ كەيبىر ءبىلىم بەرۋ ۇيىمدارىنا اتاۋ بەرۋ تۋرالى» نۇر-سۇلتان قالاسى əكىمدىگىنىڭ قاۋلىسى جəنە نۇر-سۇلتان قالاسى مəسليحاتىنىڭ شەشىمى جوباسى ەنگىزىلىپ وتىر. كورسەتىلگەن جوبا قر قولدانىستاعى زاڭناماسىنا قايشى كەلمەيدى جəنە نورماتيۆتىك-قۇقىقتىق اكتىلەرگە قويىلاتىن تالاپتاردى بۇزبايدى» دەدى سپيكەر.
ۇسىنىس قولداۋ تاپقان جاعدايدا نۇر-سۇلتان قالاسى əكىمدىگىنىڭ قاۋلىسى جəنە نۇر-سۇلتان قالاسى مəسليحاتىنىڭ شەشىمى قر زاڭناماسىندا بەلگىلەنگەن تəرتىپتە قر ۇكىمەتى جانىنداعى رەسپۋبليكالىق ونوماستيكا كوميسسياسىنىڭ قاراۋىنا ەنگىزىلەدى.
