مادەنيەت جانە سپورت ءمينيسترى اقتوتى رايىمقۇلوۆا مەملەكەتتىك تۋدى پايدالانۋ تۋرالى زاڭناماعا قانداي وزگەرىستەر ەنگەنىن ءمالىم ەتتى.
مەملەكەت باسشىسى ق.توقاەۆتىڭ مەملەكەتتىك تۋدى پايدالانۋعا قاتىستى مەملەكەتتىك رامىزدەردى پايدالانۋ قاعيدالارىن قايتا قاراۋ تاپسىرماسىن ورىنداۋ اياسىندا قر ۇكىمەتىنىڭ 2020 جىلعى 27 قاراشاداعى №801 قاۋلىسىمەن قر مەملەكەتتىك تۋىن, ەلتاڭباسىن جانە ولاردىڭ بەينەلەرىن, مەملەكەتتىك گيمننىڭ ءماتىنىن پايدالانۋ قاعيدالارىنا وزگەرىستەر ەنگىزىلدى. بۇل وزگەرىستەر ارقىلى ازاماتتارىمىز ءۇشىن مەملەكەتتىك تۋدى پايدالانۋ اياسى زاڭنامالىق تۇرعىدا كەڭەيتىلدى.
ەڭ الدىمەن قر مەملەكەتتىك تۋىن جەكە جانە زاڭدى تۇلعالار عيماراتتاردا, ونىڭ ىشىندە بالكونداردا جانە سالتاناتتى ءىس-شارالار وتكىزىلەتىن ورىنداردا پاتريوتتىق سەزىمدەرىن, قازاقستاندىق بىرەگەيلىگىن ءبىلدىرۋ ءۇشىن, ەل ازاماتتارىنىڭ جەتىستىكتەرىن قولداۋ ماقساتىندا پايدالانا الادى. سونىمەن قاتار جەكە تۇلعالارعا وسى قاعيدالارعا ەنگىزىلگەن وزگەرىستەرگە سايكەس, قر مەملەكەتتىك تۋىن ءبىر قاباتتى نەمەسە كوپ قاباتتى عيماراتتاردا ەكستەرەرلى نۇسقادا ورنالاستىرۋ كەزىندە عيماراتتىڭ ساۋلەت ەرەكشەلىكتەرىنە قاراماستان پايدالانۋ مۇمكىندىگى بەرىلدى. بۇدان بىلاي جەكە تۇلعالار عيماراتتاردا ورنالاستىرىلاتىن مەملەكەتتىك تۋدى قاراڭعى ۋاقىتتا جارىق قۇرالدارىن قولدانباي-اق پايدالانا الادى.
سونىمەن بىرگە نۇر-سۇلتان, الماتى, شىمكەنت قالالارىنىڭ جانە وبلىس اكىمدىكتەرى جىل سايىن قازاقستاندىقتار اراسىندا مەملەكەتتىك رامىزدەردى دارىپتەۋ جانە پاتريوتيزمگە تاربيەلەۋ ماقساتىندا «مەنىڭ تۋىم, مەنىڭ وتانىم!» شاراسىن وتكىزەتىن بولادى.
