ناۋرىز مەيرامى كۇندەرى ەلوردامىزدا مۇمكىندىگى شەكتەۋلى بالالار جاساعان بۇيىمداردىڭ كورمە-جارمەڭكەسى وتەدى. يگىلىكتى شارانى ۇيىمداستىرۋشىلاردىڭ ءبىرى – «مەيiرiمدiلiك-م» قوعامدىق قورىنىڭ ءتورايىمى ايگۇل سەيىلوۆامەن جولىعىپ, قايىرىمدىلىق اكتسياسى تۋرالى سۇراپ بىلگەن ەدىك.
– ءاز ناۋرىز مەرەكەسىنە قانداي شارا دايىنداپ وتىرسىزدار؟
– ەلباسى «قازاقستان جولى -2050:
ءبىر ماقسات, ءبىر مۇددە, ءبىر بولاشاق»
اتتى جولداۋىندا مۇگەدەكتەر ماسەلەسىنە ەرەكشە توقتالىپ, ءمۇمكىندىگى شەكتەۋلى جاندارعا قامقورلىق كورسەتۋ قوعام الدىنداعى پارىز دەپ باسا ايتقان ەدى. مۇگەدەكتەردىڭ قۇقىعى مەن مۇددەسىن قورعاۋ دەگەنىمىز ولاردىڭ ومىرلەرىنە مەيىرىمدىلىك شۋاعىن توگىپ, سەرپىلىس بەرۋ قاجەتتىگىن جاقسى تۇسىنەمىز. كوپتەگەن جۇرەكتەرگە جول تاباتىن قايىرىمدىلىق شارالارىن ۇيىمداستىرىپ جاتىرمىز. ناۋرىزدىڭ 21-23 ارالىعىندا «Asia park» ساۋدا ويىن-ساۋىق ورتالىعىندا «ارمىسىڭ, ءاز ناۋرىز!» اتتى ءمۇمكىندىگى شەكتەۋلى بالالاردىڭ قولىمەن جاسالعان ونىمدەردىڭ كورمە-ءجارمەڭكەسىن وتكىزەمىز.
– جارمەڭكەنىڭ ەرەكشەلىگى قانداي بولماق؟
– ەكسپوزيتسياعا مۇگەدەك بالالاردىڭ ءوز قولىمەن جاساعان 100-دەن استام تۋىندىسى قويىلادى. اتاپ ايتقاندا, سۋرەتتەر, كارتينالار, مونشاق, بيسەردەن ورىلگەن ءتۇرلى كادەسىيلار مەن كيىزدەن, اعاشتان جاسالعان بۇيىمدار ساتىلادى.
بۇدان باسقا, 5-15 جاستاعى ونەرپاز بالالاردىڭ قاتىسۋىمەن وتەتىن كونتسەرتتىك باعدارلامامىز بار.
– مۇمكىندىگى شەكتەۋلى سابيلەردىڭ جارمەڭكەگە دايىندىعى قانداي?
– وتە جاقسى. جۇزگە تارتا تاۋارىمىزدى بۋىپ-ءتۇيىپ دايىنداپ وتىرمىز. جالپى, وزىمىزبەن ءبىر قوعامدا جۇرگەن مۇمكىندىگى شەكتەۋلى جاندارعا بارشامىز مەيىرىمدى بولۋىمىز كەرەك دەپ ويلايمىن. قولداۋ مەن قامقورلىق بولسا ولار قاناتتانىپ, شابىتتانىپ جۇرەدى. ومىرگە دەگەن قۇشتارلىعى ارتا تۇسەدى. وسى كورمەگە قاتىسقانىمىزدىڭ ءوزى ولار ءۇشىن ۇلكەن دەمەۋ دەپ تۇسىنەمىن. سوندىقتان دا وسى شارانى ءوتكىزۋدەگى ماقساتىمىز – مۇمكىندىگى شەكتەۋلى بالالاردىڭ ماسەلەسىنە قوعام نازارىن اۋدارۋ, سونىمەن قاتار, بالالاردىڭ شىعارماشىلىق قابىلەتتەرىن دامىتىپ, ىنتالاندىرۋ بولىپ وتىر.
ايگۇل ۋايسوۆا
