نۇرسۇلتان نازارباەۆ: ازاماتتار ەلدىڭ قوعامدىق جانە ساياسي ومىرىنە بەلسەندى قاتىسقىسى كەلەدى
ەلباسىنىڭ توراعالىعىمەن Nur Otan پارتياسى ساياسي كەڭەسىنىڭ بيۋرو وتىرىسى ءوتتى.
وتىرىستا بيۋرو مۇشەلەرى «سەنىم. ديالوگ. بولاشاققا نىق قادام – Nur Otan پارتياسىنىڭ 7 سەرپىنى» اتتى پارتيا جۇمىسىن «قايتا جانداندىرۋ» باعدارلاماسىنىڭ جۇزەگە اسىرىلۋىن جانە پارتياىشىلىك سايلاۋ وتكىزۋدى تالقىلادى. قاتىسۋشىلار الدىندا سويلەگەن سوزىندە ەلباسى قازىرگى ۋاقىتتا قوعام تاراپىنان پرايمەريزدەرگە ۇلكەن قىزىعۋشىلىق بايقالىپ وتىرعانىن اتاپ ءوتتى.
– ادامدار ەلدىڭ قوعامدىق جانە ساياسي ومىرىنە بەلسەندى قاتىسقىسى كەلەدى. ءبىز پارتيانى قايتا جۇكتەۋدىڭ دۇرىس ۆەكتورىن تاڭدادىق. ەل پروبلەمالارىن بىرلەسىپ شەشۋ ءۇشىن اشىق ديالوگتى قامتاماسىز ەتۋ ماڭىزدى. پرايمەريزدىڭ مىندەتى – حالىقتىق پارتيالىق تىزىمدەردى قالىپتاستىرۋ. باسەكەلەستىك نەگىزدە جوعارى قوعامدىق قولداۋى بار, ناقتى جاعدايدى بىلەتىن بەدەلدى كوشباسشىلاردى, بەلسەندى ادامداردى تاڭداۋ كەرەك, – دەدى قازاقستاننىڭ تۇڭعىش پرەزيدەنتى.
Nur Otan پارتياسىنىڭ توراعاسى پرايمەريزگە قاتىسۋشىلار جەرگىلىكتى جەرلەردەگى كۇرمەۋى قيىن ماسەلەلەردى اشىق كوتەرىپ, كەمشىلىكتەردى انىقتاپ, ناقتى شەشىمدەر ۇسىنۋى ءتيىس ەكەنىن اتاپ ءوتتى.
– ءبىز ءوز ءوڭىرىن جانە ەلىن دامىتۋعا ءىس جۇزىندە اتسالىسۋعا دايىن بارلىق ادامدارعا ارناپ «الەۋمەتتىك ليفت» قۇردىق. قىركۇيەك ايىندا جەرگىلىكتى باعدارلامالاردىڭ بارلىق 216 جوباسى جاريالاناتىن بولادى. كەڭىنەن تالقىلاۋ ەلەكتورالدىق مىندەتتەرىمىزدى حالىقتىڭ سۇرانىستارى مەن مۇقتاجدىقتارىنا سايكەس كەلتىرۋگە مۇمكىندىك بەرەدى. سونداي-اق بەس جىلدىق مەرزىمگە ارنالعان باعدارلامالار حالىقتىڭ پىكىرىن ەسكەرە وتىرىپ قايتا پىسىقتالادى, ءار اۋدان, قالا جانە وبلىستىڭ بيۋدجەتتىك مۇمكىندىكتەرىمەن ۇيلەستىرىلەدى, – دەدى نۇرسۇلتان نازارباەۆ.
ەلباسى پارتياىشىلىك ىرىكتەۋ كەزەڭدەرىن جۇزەگە اسىرۋ بويىنشا ساپالى ۇيىمداستىرىلعان جۇمىسپەن قامتاماسىز ەتۋدىڭ ماڭىزدىلىعىنا نازار اۋداردى.
– پرايمەريزدى ادال, اشىق تۇردە جانە بارلىق قاتىسۋشىلارعا تەڭ ەرەجەلەرمەن ۇيىمداستىرۋ كەرەك. پارتياىشىلىك ۇگىت-ناسيحات قىركۇيەكتە باستالادى. ەلدەگى كوروناۆيرۋس ينفەكتسياسى جاعدايىنا بايلانىستى ونى دەنساۋلىق ساقتاۋ مينيسترلىگىنىڭ ۇسىنىستارىنا ساي وتكىزۋ قاجەت. بارلىق قاۋىپسىزدىك شارالارى قاتاڭ ساقتالۋى كەرەك. حالىق دەنساۋلىعى باستى نازاردا بولادى, – دەدى قازاقستاننىڭ تۇڭعىش پرەزيدەنتى.
پارتيا توراعاسى ءسوزىنىڭ سوڭىندا ەلدىڭ ءارى قاراي دامۋى مەن قوعام بىرلىگىن نىعايتۋدا Nur Otan پارتياسىنىڭ ورنى ەرەكشە ەكەنىن اتاپ ءوتتى.
«پارتيا قازاقستاندىقتاردى, قوعامنىڭ بارلىق سىندارلى جانە سالاۋاتتى كۇشتەرىن بىرىكتىرۋى ءتيىس. ءبىز بىرلىگىمىزدى ساقتاي وتىرىپ قانا كەز كەلگەن قيىندىققا توتەپ بەرە الامىز. ەلدەگى تۇراقتىلىق پەن تىنىشتىقتى ساقتاۋ ءۇشىن جاسالىپ جاتقان ۇيلەسىمدى جۇمىس اسا ماڭىزدى» دەدى ەلباسى.
نۇرسۇلتان نازارباەۆ پارتياىشىلىك ىرىكتەۋ كەزەڭدەرىن جۇزەگە اسىرۋ بويىنشا ساپالى ۇيىمداستىرىلعان جۇمىسپەن قامتاماسىز ەتۋدىڭ ماڭىزدىلىعىنا نازار اۋداردى.
سونداي-اق ءماجىلىس بارىسىندا Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك پەن بيۋرو مۇشەسى, پرەمەر-مينيستر اسقار مامين بايانداما جاسادى.
