كەشە لوندوندا ءوتىپ جاتقان ححح جازعى وليمپيادا ويىندارىنىڭ التىن مەدال يەگەرى ولگا رىپاكوۆا استانا قالاسىندا بولدى. قالا اكىمىنىڭ ورىنباسارى ايدا بالاەۆا «الاۋ» مۇزايدىنى سارايىندا چەمپيوندى كۇتىپ الىپ, سونداعى سپورت الاڭىمەن تانىستىردى.
داستارحان باسىندا جالعاسقان ەركىن اڭگىمە بارىسىندا وليمپياداداعى ەلىمىزدىڭ جەتىستىكتەرى ءسوز بولىپ, بۇل بۇقارا اراسىندا سپورتتىڭ كەڭىنەن جايىلۋىنا سەپتىگىن تيگىزەتىنى ايتىلدى. ا.بالاەۆا شىعىستىق جەڭىل اتلەتتىڭ سپورتتاعى جولىنا جەڭىس پەن ساتتىلىك تىلەدى. باسقوسۋدا چەمپيون تىلشىلەردىڭ دە سۇراقتارىنا كەڭىنەن جاۋاپ بەردى. «بىلسەڭىزدەر, وليمپيادا ويىندارىنا دايىندالۋ بارىسىندا وقىس وقيعا بولدى. مەن وكشەمدى جاراقاتتاپ الدىم. سونىڭ كەسىرىنەن, جارىسقا دايىندىق جاتتىعۋلارىنىڭ ماڭىزدى كەزەڭدەرىن وتكىزىپ الدىم. وسىدان سوڭ, بويىمدا جەڭىمپازدار قاتارىنا ىلىنبەك تۇگىلى, ويىندارعا قاتىسا الام با دەگەن ۇرەي بولدى. البەتتە, بۇل كۇدىكتى سەيىلتۋگە باپكەرىم – اكەم, ەكىنشى باپكەرىمدەي بولعان, جان-جارىم, جالپى, جاقىن تۋما-تۋىسقاندارىم كوپ كومەك كورسەتتى» دەيدى ول. جەڭىل اتلەت باسىنان وتكەن تاعى ءبىر قيىن جاعدايمەن ءبولىستى: «نەگىزگى جارىسقا ىرىكتەۋ كەزەڭىندە ەكى مۇمكىندىگىمدى ءمۇلت جىبەرىپ, 13 ورىنعا تۇراقتاپ قالدىم. ال, كەلەسى ىرىكتەۋگە 12 سپورتشى عانا وتەدى. سودان, قۇدايعا سيىنىپ, بار جىگەرىمدى جيىپ, سوڭعى مۇمكىندىگىمدى پايدالانىپ, نەگىزگى سايىسقا وتكەن ون ەكىلىكتىڭ ۇزدىگى بولدىم. جالپى, جارىستاردا ەڭ قيىنى – وسى ىرىكتەۋ كەزەڭى دەسەم, قاتە ايتپايمىن».
«التىن» قىزىمىز لوندونداعى جانكۇيەرلەر قولداۋىنا دا ەرەكشە ريزا ەكەنىن ايتادى. «بىراق, مەن ءۇشىن باستى قولداۋ, ول – ەلدەگى جانكۇيەرلەردىڭ دەمەۋى بولدى. بريتانياعا شىعارىپ سالىپ تۇرىپ «سەنىڭ قولىڭنان كەلەدى. ءبىز ساعان سەنەمىز» دەگەن جانكۇيەرلەر تىلەگى مەنى جىگەرلەندىرە ءتۇستى» دەدى. ولگا ءوز ەلىنىڭ ازاماتتىعىن ۇسىنىپ, سول مەملەكەتتىڭ اتىنان ونەر كورسەتۋگە شاقىرعان شەتەلدەر دە بولعانىن جاسىرمادى. «بىراق, مەن بۇل ەلدە ءوستىم. جورگەگىمدە جاتقان كەزىمدە-اق, مەنى سپورتقا دايىنداعان دا وسى ەل. مەن بۇل ەلدەن كەتسەم, دۇرىس ارەكەت بولماس ەدى» دەپ اعىنان جارىلدى و.رىپاكوۆا.
