جۋىردا استانا قالاسىندا پاۆلودار قالاسىنىڭ №24 مەكتەپ وقۋشىلارىنىڭ جەڭىس كۇنىنە ارناعان مارافونى مارەگە جەتتى. پاۆلودارلىق وقۋشىلار ۇلى وتان سوعىسى ارداگەرلەرىنىڭ قۇرمەتىنە پاۆلودار-استانا-بۋراباي باعىتىمەن جۇگىرىپ ءوتتى.
اتاۋلى كۇندەر قارساڭىندا سپورت تۇرلەرىنەن جارىس وتكىزۋ ءداستۇرى پاۆلودارداعى №24 مەكتەپتە 16 جىلدان بەرى ۇزىلمەي كەلە جاتىر.
سالاۋاتتى ءومىر سالتىنا مەكتەپتە ايرىقشا ءمان بەرىلەدى. اسىرەسە, جەڭىل اتلەتيكا, فۋتبول, باسكەتبول, ۆولەيبول, ۆەلوسپورتقا جانە «توعىز قۇمالاق» سياقتى ۇلتتىق ويىندارعا وقۋشىلاردىڭ نيەت-ىنتاسى بولەك.
مەكتەپتىڭ جەڭىل اتلەتشىلەرى الماتى, كوكشەتاۋ, استانا سياقتى قالالاردا وتكەن جارىستارعا قاتىستى, ءتىپتى, رەسەيدىڭ ومبى, نوۆوسيبيرسك قالالارىندا دا بولىپ قايتتى.
وسىنداي سپورتشى, جەلاياق قۇرداستارىن استانالىق №55 مەكتەپ وقۋشىلارى مەن وسى شارانىڭ دەمەۋشىسى «اي-سۋ» كورپوراتسياسىنىڭ وكىلدەرى سالتاناتپەن قارسى الدى. بۇل دا كەزدەيسوقتىق ەمەس, ويتكەنى, بارلىق زاماناۋي تالاپقا ساي №55 مەكتەپتى «اي-سۋ» قۇرىلىس كورپوراتسياسى سالعان.
كورپوراتسيانىڭ پرەزيدەنتى ق. ساپەنوۆ, مەكتەپ ديرەكتورىنىڭ وقۋ ءىسى جونىندەگى ورىنباسارى ن. يبراەۆا بالالارعا دەنساۋلىق پەن سپورتتىق جەتىستىكتەر تىلەدى. سوسىن قوس مەكتەپ جانە «اي-سۋ» كورپوراتسياسىنىڭ اتىنان جاساقتالعان كوماندالار اراسىندا اياقدوپتان, ۆولەيبول, باسكەتبولدان جولداستىق كەزدەسۋلەر ءوتتى. شارا سوڭىندا «اي-سۋ» كورپوراتسياسىنىڭ پرەزيدەنتى قوناقباي ساپەنوۆ جەڭىمپازدارعا العىس حات پەن باعالى سىيلىقتار تابىس ەتتى.
ەركەجان ساتىمبەك
