كەشە ەلوردا اكىمدىگىنىڭ عيماراتىندا كەي كوشەلەردىڭ ۋاقىتشا جابىلاتىنىنا بايلانىستى بريفينگ ءوتتى.
– بۇگىندە استانا قالالىق اۆتوموبيل جولدارى باسقارماسى «نايزا-قۇرىلىس» كونتسەرنىمەن بىرلەسىپ, قابانباي باتىر كوشەسىنىڭ №26 كوشەدەن اۋەجاي اينالما جولىنا دەيىنگى بولىگىن قايتا قالپىنا كەلتىرۋ جۇمىسىمەن اينالىسۋدا. سونىڭ شەڭبەرىندە قابانباي باتىر كوشەسىنىڭ حۋسەين بەن تالال كوشەسىنەن №31 كوشەگە دەيىنگى بولىگىن ۋاقىتشا جابۋ قاجەتتىلىگى تۋىندادى. بۇل جەردە جىلۋ بەرەتىن جانە سۋ تارتاتىن ينجەنەرلىك جەلىلەردى توسەۋگە ارنالعان جۇمىستار جۇرگىزىلەدى. ولار 10 قازانعا دەيىن اياقتالادى دەپ جوسپارلانىپ وتىر, – دەدى اتالمىش باسقارمانىڭ باسشىسى سىمبات مىرزاعۇلوۆ.
بۇدان سوڭ استانا قالالىق ءىىد اكىمشىلىك پوليتسيا باسقارماسى باسشىسىنىڭ ورىنباسارى ەلجان چۋپەكوۆ جوعارىدا ايتىلعان وزگەرىستەر جايلى ەلوردا تۇرعىندارىنىڭ الدىن الا حاباردار بولىپ, ءوز ىستەرىن ەرتەرەك جوسپارلاۋى كەرەكتىگىن ەسكەرتتى:
– قابانباي باتىر كوشەسى جابىلسا, شاھاردا تەك ەكى ءىرى ماگيسترال عانا قالادى. ولار – ورىنبور جانە تۇران داڭعىلدارى. ونىڭ ۇستىنە, 4 قىركۇيەكتە «استانا مارافونى» اتتى ۇلكەن شارا ۇيىمداستىرىلماق. سوعان وراي, ءدال وسى كۇنى ساعات 7.30-14.00 ارالىعىندا تۇران, ورىنبور, سارايشىق, بايتۇرسىنۇلى, تاۋەلسىزدىك, قالداياقوۆ, ءناجىمەدەنوۆ, امانجولوۆ, قوشقارباەۆ, ايناكول, ابىلايحان, پۋشكين, سەيفۋللين, سارىارقا كوشەلەرىنىڭ, ساعات 7.30-12.00 ارالىعىندا تۇران, ورىنبور, قوناەۆ, تۇركىستان, دوستىق, اقمەشىت كوشەلەرىنىڭ, ال ساعات 7.30-11.00 ارالىعىندا تۇران, دوستىق, نۇرلىجول جانە قوناەۆ كوشەلەرىنىڭ كەي تۇستارىندا قوزعالىس شەكتەلەدى.
استانا قالالىق جولاۋشىلار كولىگى باسقارماسى ءبولىمىنىڭ باسشىسى تۇرسىنعالي جاكەنوۆ مارافون كەزىندە كەي اۆتوبۋستاردىڭ قوزعالىسى توقتاتىلىپ, كەيبىرەۋىنىڭ باعىتى وزگەرەتىنىن جەتكىزدى. ول تۋرالى تولىق اقپاراتتى ەلوردا اكىمدىگىنىڭ رەسمي سايتىنان نەمەسە 57-47-77 تەلەفونى ارقىلى الۋعا بولادى.
بوتاگوز ماراتقىزى
