كەشە ەلوردا اكىمدىگىنىڭ عيماراتىندا استانا قالاسى ءماسليحاتىنىڭ سەگىزىنشى كەزەكتەن تىس سەسسياسى ءوتتى. جيىن بارىسىندا باس شاھاردىڭ 2016-2018 جىلدارعا ارنالعان بيۋدجەتىنە وزگەرىستەر ەنگىزۋ تۋرالى ماسەلەلەر تالقىلاندى.
– كەلەر جىلى استانادا الەمدىك دەڭگەيدەگى ماڭىزدى شارا – «ەكسپو-2017» كورمەسى وتەدى. وعان دۇنيەنىڭ تۇكپىر-تۇكپىرىنەن ميلليونداعان قوناق كەلەدى دەپ كۇتىلۋدە. سوعان بايلانىستى قالامىزداعى كورنەكتى ورىنداردى رەتكە كەلتىرىپ, مەيماندار الدىندا ۇياتقا قالمايتىنداي بولۋىمىز كەرەك. ەلوردانىڭ باستى سيمۆولى ءارى ايناسى – «بايتەرەك» مونۋمەنتى. بۇگىندە وسى مونۋمەنتتىڭ كەي تۇستارى ەسكىرىپ, جاڭبىر جاۋعان كۇندەرى سۇرىقسىز قالىپقا تۇسەتىنىن, شىنىسىنىڭ كەيبىر تۇستارى شاعىلعانىن كوردىك. ول شىنى – جوعارى تەحنولوگيامەن ءازىرلەنگەن, اسا كوپ كەزدەسە بەرمەيتىن بىرەگەي ماتەريال. وكىنىشكە قاراي, ونداي ماتەريال شىعاراتىن زاۋىت ءبىزدىڭ ەلدە دە, كورشىلەس رەسەي فەدەراتسياسىندا دا جوق. ىزدەستىرە كەلە ونى يتاليادان تاپتىق. ەندى الداعى ۋاقىتتا 400 ميلليوننان اسا قارجىعا شىنىنى جاڭالاۋعا تاپسىرىس بەرۋ كەرەك, – دەدى ەلوردا اكىمىنىڭ ورىنباسارى اندرەي لۋكين.
سونىمەن قوسا, ول قالاداعى كونەرگەن تەاترلاردىڭ قازىرگى كەيپى جايلى باياندادى:
– استاناداعى مادەني وشاقتاردىڭ ەڭ تاڭداۋلىسى – تەاتر-لار. ال ءسىزدەر تەاترلاردىڭ ايانىشتى احۋالىن كوردىڭىزدەر مە؟ ارنايى قۇرال-جابدىقتارى بولماعاندىقتان, وندا جاڭا سپەكتاكلدەردى دە قويۋ مۇمكىن ەمەس. سوندىقتان تەز ارادا ولارعا كوڭىل ءبولىپ, عيماراتتارىن جوندەۋدەن وتكىزۋ كەرەك, – دەدى.
بۇدان بولەك, ا.لۋكين بەلگىلى ءبىر جۇمىستاردى ورىنداۋ ماقساتىندا قوسىمشا تۇرعىن ءۇي ينسپەكتسياسى باسقارماسىنا – 143 ميلليون تەڭگە, ساۋلەت جانە قالا قۇرىلىسى باسقارماسىنا – 150 ميلليون تەڭگە, باس جوسپاردىڭ ىسكە اسىرىلۋىنا مونيتورينگ جۇرگىزەتىن ۋربانيستيكالىق زەرتتەۋلەر سىزباسىنىڭ جاسالۋىنا 50 ميلليون تەڭگە ءبولۋ كەرەكتىگىن ايتتى.
بوتاگوز ماراتقىزى
