قانداي مۋلتفيلم كورىپ ءجۇرمىز؟
پسيحولوگتار بالالاردىڭ قالىپتاسۋىنا كەرى اسەرى بار مۋلتفيلمدەردىڭ ءتىزىمىن جاساپتى. ولاردىڭ پىكىرىنشە, رەسەيلىك ارنالاردى جاۋلاپ العان «ماشا مەن ايۋ» مۋلتسەريالى بالالار ءۇشىن ەڭ قاۋىپتى بولىپ سانالادى ەكەن. ەكىنشى ورىندا – امەريكانىڭ «مونستر حاي», ءۇشىنشى ورىندا «گۋبكا بوب» مۋلتسەريالى تۇر.
بالالار ءۇشىن زياندى دەپ تانىلعان مۋلتفيلمدەردى توقتاتۋعا قاۋقارىمىز شامالى. ونىڭ اششى ىشەكتەي سوزىلعان سەريالارى تولاسسىز بەرىلىپ جاتادى. ساعاتتاپ كورسەتىلەتىن فيلمدەردى كورگەن سايىن ونىڭ كەيىپكەرلەرىن دە قۇددى وتباسىمىزدىڭ ءبىر مۇشەسىندەي سەزىنەتىنىمىز دە راس. سودان دا بولار, تەلەديداردىڭ ىشىنە ءتۇسىپ كەتەتىندەي تەلمىرىپ قاراعان بالاعا دا «قوي» دەمەيمىز. ال بالالارىمىز وزگەگە ەلىكتەپ, ءوز بولمىسىنان اجىراپ بارا جاتقانىن دا بايقاي بەرمەيمىز. ءتىپتى, ءتىلى شىقپاعان ءسابيىمىز ءدال «ماشاداي» بەت-اۋزىن قيسايتىپ, ەرنىن شۇرشيتسە نە «مونستر حايدىڭ» كەيىپكەرلەرىندەي بىلاپىت ءسوزدەردى قايتالاپ ايتىپ جاتسا, بەتىنەن قاقپاي, كەرىسىنشە, قىلىعىنا ءماز بولامىز.
بۇل جەردە ءسابيدىڭ كىناسى بار ما؟ ماماندار سابيلەردىڭ ەكراندا كورسەتىلگەننىڭ ءبارىنە سەنەتىنىن, وزىنە ۇناعان كەيىپكەردىڭ قىلىعىن قايتالاپ, سولاردىڭ سوزىمەن ءسويلەۋىن ادەتكە اينالدىرىپ الاتىنىن ايتادى. البەتتە, جاعىمدى اسەر ەتەتىن, بالانىڭ تانىم-تۇسىنىگىن ارتتىرىپ, باۋىرمالدىق پەن مەيىرىمگە تاربيەلەيتىن فيلمدەر دە بار. ماسەلە بالا پسيحيكاسىنا اسەر ەتەتىن مۋلتفيلمدەردى تالعاممەن تاڭداۋدا جاتىر.
ۇلبولعان بايكەنجەەۆا, دارىگەر: – جاس سابيگە كەز كەلگەن شۋدىڭ اسەرىن ەسكەرگەن ءجون. بولمەدە تەلەديدار قوسىلىپ تۇرسا دا, بالانىڭ دەنساۋلىعىنا زيانى بار. سول سەبەپتى بالاعا ەكى جاسقا تولعانعا دەيىن تەلەديدار كورۋگە تىيىم سالۋ كەرەك. ەكى جاستان اسقاننان كەيىن فيلمدەگى كورىنىستەر ناقتى, سوزدەرى انىق, جاعىمدى اسەرى بارلارىن عانا تاڭداپ كورسەتكەن ءجون. تەلەديداردان ەكى مەتر قاشىق وتىرىپ كورۋ قاجەت. ەگەر بالانىڭ كوزى قىزارىپ, جاساۋراي باستاسا, تەلەديداردى مۇلدەم كورسەتۋگە بولمايدى.
ديانا ساپاربەكقىزى, نەۆرولوگ: – اتا-اناسى كوڭىل بولمەيتىن بالالار كوپ ۋاقىتىن تەلەديدار الدىندا وتكىزەتىنى جاسىرىن ەمەس. مۇندايدا بالالاردىڭ بەلسەندىلىگى ازايادى. ال سيۋجەتتى ءۇزىپ-جارىپ, ءجيى قايتالاناتىن جارناما بالانىڭ ءالى جەتىلمەگەن پسيحيكاسىنا كەرى اسەر ەتەدى. ياعني, مىنەز-قۇلقى وزگەرىپ, ۇيقىسى بۇزىلادى. بالانىڭ شىعارماشىلىق باستاۋلارى دامىماي, تالپىنىسى كەميدى. بالا جاسىنان ەكرانداعى كورىنىستەردىڭ باقىلاۋشىسى بولسا, كەيىننەن ومىردەگى وقيعالارعا دا بەي-جاي قاراپ, تولىققاندى ءومىر ءسۇرۋ نەگىزدەرىنەن اجىرايدى. تەلەديدارعا تەلمىرگەن بالانىڭ ءتىلى كەش شىعىپ, قاتارلارىمەن ويناپ وسكەن بالادان گورى ءتىلى قارابايىر, مىنەزى بۇيىعى كەلەدى. مۇنى ەسكەرۋىمىز كەرەك.
مىنە, مامانداردىڭ پىكىرى وسىنداي. بىراق ءتورىمىزدىڭ ءبىر بۇرىشىن يەمدەنىپ الىپ, كۇن ۇزاعىنا سارناپ تۇراتىن تەلەديداردى ومىرىمىزدەن ءوشىرىپ تاستاي المايمىز. تىم بولماعاندا, دارىگەرلەردىڭ ەسكەرتۋىن قاپەرگە الۋ قاجەت. ودان بولەك, دارىگەرلەر تەلەديداردى جانتايىپ ەمەس, وتىرىپ كورۋ كەرەك دەيدى. قاراڭعى بولمەدە قاراۋعا بولمايدى. بالانى جاسىنان پلانشەت پەن تەلەفوندارعا
ۇڭىلۋدەن تىيىڭىز. ۋاقىت وتە كەلە ءسابيىڭىزدىڭ قوس جانارى سۋالىپ, كور سوقىر بولىپ قالۋى ابدەن مۇمكىن.
سونىمەن, تاڭداۋ ءوز قولى-ڭىزدا. قازاق «سىنىقتان وزگەنىڭ ءبارى جۇعادى» دەيدى. جاس بۋىن تەلەديداردان كورگەنىن قاعىپ الىپ, سونى قايتالاپ جاتسا, بۇل ونىڭ ءوسكەندىگىنىڭ دە, العىرلىعىنىڭ دا بەلگىسى ەمەس ەكەن. كۇندەردىڭ كۇنىندە سانا-سەزىمى بوتەن, ءتىلى بۇلدىر, وزىندىك بەت-بەينەسى جوق, سۋىق مىنەزدى ءبىر كەزدەگى مۋلتفيلم كەيىپكەرلەرىن
ەسكە سالاتىن ۇرپاق بولىپ شىقسا, تاڭ قالماڭىز. ءويتكەنى ونىڭ تاربيەسىمەن جاستايىنان مۋلتفيلمدەر اينالىسقانىن ۇمىتپاڭىز.
ايگۇل ۋايسوۆا