قاراوتكەلدەن تۇلەگەن قاھارمان
قالامى قارىمدى جۋرناليست بولات جۇنىسبەكوۆتىڭ «وتاسۋ» دەگەن كىتابى قولىمىزعا تيىسىمەن اسىعا پاراقتاپ, وقىپ شىققانبىز. ارميا گەنەرالى ساعادات نۇرماعامبەتوۆتىڭ عۇمىر جولىنداعى ەرلىگىن, جىگەرىن, سىن ساعاتتارداعى شەشىمدەرى مەن سەزىمدەرىن پاش ەتكەن رومان-ديلوگيا جايىندا تۇيگەن ويىمىزدى قاعازعا ءتۇسىرىپ, ۋىز قالپىندا وقىرمان نازارىنا ۇسىنعانىمىز سوڭعى سەيسەنبى عانا ەدى… كۇن ساسكەدەن اسپاستان «الاش باھادۇرىنەن ايىرىلدى» دەگەن قارالى حابار تارادى.
قۇزار شىڭ باسىنان اينالاسىنا بايىپپەن كوز تاستاي قومدانعان قىران تەكتەس اعانىڭ اسىل بەينەسى كوز الدىمىزعا كەلە بەردى سوسىن. «ۇلتقا قىزمەت ەتۋدىڭ قۇنى – ادالدىق» دەگەن اسىل اعانىڭ بەينەسى… «قازاق – جاۋىنگەر حالىق! ءبىز سياقتى اسقاق رۋحتى جىگەرلى حالىق جوق! سول سوعىستا جان اياماي كۇرەسكەن تەك قازاقتار بولدى! «يزۆەستيا» گازەتىندە تەك قازاقتاردىڭ ەرلىگى, جىگەرى جازىلاتىن» دەپ, اعىنان جارىلعان اسىل اعانىڭ بەينەسى…
توقسان جاسىنا قاراعان شاعىندا باقيعا اتتانعان ساعادات قوجاحمەتۇلى ارقانىڭ توپىراعىندا – استانانىڭ ىرگەسىندەگى ەڭبەك اۋىلىندا (قازىر اقمولا وبلىسى اقكول اۋدانى) تۋىپتى. كادىمگى قاراوتكەلدەن تۇلەگەن, قانات قاققان. كامەلەتكە تولعان كۇننەن ءومىرىنىڭ سوڭعى ساتىنە دەيىن وتانىنا بار ىنتا-شىنتاسىمەن قىزمەت ەتتى. 1942 جىلى ادامزات تاريحىنداعى ەڭ سۇراپىل سوعىستى سولتۇستىك كاۆكازدا باستاپ, ءوزى باسقارعان اتقىشتار باتالونىمەن جاۋدى بەرلينگە دەيىن قۋدى. ۇلى وتان سوعىسىنان كەيىن ارامىزعا كەڭەس وداعىنىڭ باتىرى بولىپ ورالدى.
ساعادات نۇرماعامبەتوۆ قارۋلى كۇش-
تەر قاتارىندا ازاماتتىق قورعانىس شتابىنىڭ باستىعى, ورتا ازيا اسكەري وكرۋگىنىڭ قولباسشىسىنىڭ ورىنباسارى, ۆەنگرياداعى اسكەري كونتينگەنت باسشىسىنىڭ ءبىرىنشى ورىنباسارى, قازاق سسر-ءى مەملەكەتتىك قورعانىس كوميتەتىنىڭ توراعاسى قىزمەتتەرىن ابىرويمەن اتقارىپ, 1992 جىلى تاۋەلسىز قازاقستاننىڭ ءبىرىنشى قورعانىس مينيسترى لاۋازىمىنا تاعايىندالادى. ارميا گەنەرالى اتانىپ, قۇرمەتتى دەمالىسقا شىققان ءباھادۇر كۇنى كەشەگە دەيىن پرەزيدەنتتىڭ كەڭەسشىسى قىزمەتىن اتقاردى. 1994 جىلى قازاقستان رەسپۋبليكاسى پرەزيدەنتىنىڭ
جارلىعىمەن ءنومىرى ءبىرىنشى «حالىق قاھارمانى» وردەنىمەن ماراپاتتالادى. 1999 جىلى ەلوردادا اشىلعان «جاس ۇلان» رەسپۋبليكالىق اسكەري مەكتەبىنە ساعادات نۇرماعامبەتوۆتىڭ ەسىمى بەرىلدى. ال, ونىڭ كوپتەگەن وردەندەرىنىڭ اراسىندا ۋكراينا, پولشا, چەحيا, مونعوليا ەلدەرىنىڭ ەڭ جوعارى ماراپاتتارى بار.
«قازاناتتىڭ ەرى اۋدى, قايتەيىك…»
اھ ۇرامىز دا, قايعىرامىز دا, ازا تۇتامىز دا. الايدا, اسىل اعانىڭ بەينەسى, ەرلىگى, كىسىلىگى ۇرپاق جادىنان وشپەيتىنى تاعى اقيقات!
ادىلبەك جاقسىبەكوۆ, قازاقستان
رەسپۋبليكاسى قورعانىس ءمينيسترى:
بۇل – بۇكىل قازاقستان ءۇشىن ورنى تولماس قازا.
ءبىز ۇستازىمىزدان ءارى سەنىمدى دوسىمىزدان ايىرىلدىق. ساعادات
قوجاحمەتۇلى قازاقستان قارۋلى كۇشتەرىنىڭ تاريحىندا اڭىزعا اينالعان تۇلعا رەتىندە قالادى.
ماحمۇت نالىباەۆ, س.نۇرماعامبەتوۆ اتىنداعى حالىقارالىق قوردىڭ توراعاسى:
ساعادات – ادامزاتتىڭ ەتالونى.
«ۇلت ماقتانىشى» دەپ اتالاتىن مۇراعات قۇجاتتارى بويىنشا جۇمىس ىستەپ, باتىردى بىرنەشە قىرىنان تانىدىق. العاشقىلاردىڭ ءبىرى بولىپ, جاۋدىڭ عيماراتىنا ەنگەندىگىن انىقتادىق. ەكىنشى مارتە كەڭەس وداعى باتىرى ور-
دەنىنە ۇسىنعان قۇجاتتاردى تاپتىق.