قاتاڭ تالاپ قويدى
ەلوردا اكىمدىگىندە وتكەن اپپارات وتىرىسى پارلامەنت ءماجىلىسى مەن استانا قالاسى ءماسليحاتىنىڭ دەپۋتاتتارىن سايلاۋدى ۇيىمداستىرۋ جۇمىستارىنىڭ, سونداي-اق, ناۋرىز مەيرامىنا ارنالعان ءىس-شارالاردىڭ قورىتىندىسىن شىعارۋدان باستالدى.
قالا باسشىسى ادىلبەك جاقسىبەكوۆ استانا تۇرعىندارى «نۇر وتان» پارتياسىن قولداۋ بويىنشا ەڭ ۇزدىك ناتيجەگە قول جەتكىزگەنىن اتاپ ءوتتى. سايلاۋ قورىتىندىسى بويىنشا ەلوردالىقتاردىڭ 85,18 پايىزى اتالمىش پارتياعا سەنىم بىلدىرگەن. ال جالپى سايلاۋشىلاردىڭ ساياسي ناۋقانعا قاتىسۋ كورسەتكىشى 75 پايىزدى قۇرادى. بۇل – استانالىق ازاماتتاردىڭ بەلسەندى ءىس-قيمىلىنىڭ ناتيجەسى.
ءداستۇرلى اپپارات وتىرىسى بارىسىندا قالانى اباتتاندىرۋ جانە سانيتارلىق تازارتۋ ماسەلەلەرى دە تالقىلاندى. استانا اۋداندارىنىڭ اكىمدەرى جول توسەمىنىڭ جاعدايى تۋرالى تولىق فوتو-ەسەپ ۇسىندى. وسى رەتتە ەلوردا اكىمى اۆتوموبيل جولدارى باسقارماسىنا ءبىر ايدىڭ ىشىندە جولداردى جوندەۋ جانە قالپىنا كەلتىرۋ جۇمىستارىن بارىنشا شيراتىپ جۇرگىزۋدى تاپسىردى. اتالعان پروبلەمانى شەشۋ قالالىق قىزمەتتەردىڭ نازارىندا ۇدايى بولۋى كەرەك ەكەنىن ەسكەرتتى.
ەلوردا اكىمىنىڭ سوزىنشە, كۇننىڭ جىلىنۋىنا وراي قالا تۇرعىندارى مەن قوناقتارى ساياباقتارعا, گۇلباقتارعا جانە ەسىلدىڭ جاعالاۋىنا ءجيى باراتىن بولادى. سوندىقتان بۇل جەرلەردى اباتتاندىرۋدى تەزىرەك قولعا الۋ كەرەك. اۋدان اكىمدىكتەرى مەن ءپروفيلدى قالالىق قىزمەتتەر ءبىر اپتانىڭ ىشىندە ساياباقتار مەن اۋماقتاردا قالپىنا كەلتىرۋ جۇمىستارىن جۇرگىزۋى قاجەت.
بۇل رەتتە بيزنەس وكىلدەرى ءوز نىساندارىنىڭ سىرت كورىنىسىنە مۇقيات بولىپ, قالانى اباتتاندىرۋعا اتسالىسقانى ابزال ەكەنى ەسكە سالىندى. سونىمەن قاتار, الداعى ۋاقىتتا ۇيىمداستىرىلاتىن اباتتاندىرۋ ايلىعى اياسىندا تەمىرجول ماڭىنداعى اۋماقتاردا بارىنشا سانيتارلىق تازارتۋ جۇمىستارىن جۇرگىزۋ قاجەتتىلىگى ايتىلدى. تۇپتەپ ايتقاندا, ەلوردا باسشىسى اۋا رايىنىڭ كۇرت جىلىنۋىنا وراي قالانىڭ سانيتارلىق تازالىعىنا جاۋاپ بەرەتىن بارلىق مەكەمەلەر مەن كاسىپورىن جەتەكشىلەرىن جۇمىستى جانداندىرۋعا شاقىرىپ, ءتيىستى تالاپتار قويدى.
قالا باسشىسى كوشەدە ساۋدا جاساۋ ءۇشىن 1 مىڭ ورىن بولۋگە دە ەرەكشە نازار اۋداردى. ادىلبەك جاقسىبەكوۆ بۇل پروتسەستىڭ كاسىپكەرلەر ءۇشىن ەڭ از بيۋروكراتيالىق تارتىپپەن جانە بارىنشا ايقىن وتكىزىلۋى ءتيىس ەكەندىگىن اتاپ ءوتتى. وسى رەتتە ۇيىمداستىرىلعان كوشە ساۋداسىنىڭ ارتىقشىلىقتارى بيىلعى جازدا قالا تۇرعىندارى مەن شاعىن جانە ورتا بيزنەس وكىلدەرى ءۇشىن سەزىلۋى كەرەك.