بيىل – قر ۇلتتىق قاۋىپسىزدىك كوميتەتىنىڭ قۇرىلعانىنا 30 جىل. وسىعان وراي, ۇلتتىق قاۋىپسىزدىكتى قامتاماسىز ەتۋ جانە مەملەكەتىمىزدىڭ شەپتەرىن قورعاۋ ىسىنە لايىقتى ۇلەس قوسقان جەدەل قىزمەتكەرلەر مەن شەكاراشىلاردىڭ قىزمەتى تۋرالى «وتاندىق ارناۋلى قىزمەتتىك حرونيكالارى. ادامدار, وقيعالار, فاكتىلەر تۋرالى حيكايالار» جانە «مەملەكەتتىك شەكارا» اتتى مەرەيتويلىق كىتاپتار جارىق كوردى. تاريحي ەڭبەكتەردىڭ تۇساۋكەسەرى سالا قىزمەتكەرلەرى جانە ارداگەرلەرىنىڭ, سونىمەن قاتار قىزمەتتە ءجۇرىپ قازا تاپقانداردىڭ جاقىن تۋىستارىنىڭ قاتىسۋىمەن ەلىمىزدىڭ بارلىق ۇلتتىق قاۋىپسىزدىك كوميتەتى اۋماقتىق ورگاندارىندا ءبىر مەزگىلدە وتكىزىلدى.
قر ۇقك نۇر-سۇلتان قالاسى بويىنشا دەپارتامەنت باستىعى, ۇلتتىق قاۋىپسىزدىك گەنەرال-مايورى اسحات تولەۋوۆ پەن «ۇقك ورگاندارىنىڭ ارداگەرلەرى» رەسپۋبليكالىق قوعامدىق بىرلەستىگىنىڭ توراعاسى, پولكوۆنيك كەنجەبولات بەكنازاروۆ كىتاپتىڭ تۇساۋكەسەر ءراسىمىنىڭ لەنتاسىن قيدى. كىتاپتاردىڭ شىعۋ تاريحى, مازمۇنى تۋرالى كوميتەت توراعاسى كارىم ءماسىموۆتىڭ ءسوزى ارنايى بەينەجازبا ارقىلى جەتكىزىلدى.
«تاۋەلسىزدىكتىڭ 30 جىلدىعى قارساڭىندا كوميتەت باسشىلارىمەن بىرگە ەلىمىزدىڭ بارلىق ايماقتارىن جانە مەملەكەتتىك شەكارانى ارالادىق. جۇمىس ساپارى اياسىندا جەدەل قىزمەتكەر مەن شەكاراشىنىڭ ەرەن ەڭبەگى تۋرالى حالىقتىڭ از بىلەتىنىن بايقادىم. سوندىقتان بورىشىن ءمىنسىز ورىنداپ جۇرگەن جاندار تۋرالى ايتاتىن ۋاقىت كەلدى دەپ ويلادىم. نەگىزىن ەلباسى نۇرسۇلتان نازارباەۆ قالاعان, نىعايتۋ باعىتىن پرەزيدەنتىمىز قاسىم-جومارت توقاەۆ جالعاستىرىپ كەلە جاتقان مەملەكەت ەگەمەندىگىنە ولاردىڭ قوسقان ۇلەسىن ايتقىمىز كەلدى. ازاماتتاردىڭ بەيبىت ءومىرى ءۇشىن ءبىزدىڭ قىزمەتكەرلەر كۇنى-ءتۇنى, ىستىق-سۋىققا قاراماي قىزمەت اتقارادى. ولار – ءبىزدىڭ باتىرلارىمىز! بۇل كىتاپ سولار تۋرالى جازىلعان. ونىڭ نەگىزىندە ناقتى ادامدار, قۇپياسى اشىلعان وقيعالار مەن دەرەكتەر بار. كىتاپ ءوز وقىرمانىن تابادى دەپ سەنەمىن» دەپ اتاپ ءوتتى ك.ءماسىموۆ.
باسىلىمدارعا قازىرگى ۋاقىتتا قۇپياسىزداندىرۋعا بولاتىن جايتتار عانا ەنگىزىلگەن. ەڭبەكتەر ناقتى ادامدار, وقيعالار مەن فاكتىلەر, قۇپيا جانە قاۋىپتى وپەراتسيالارعا تىكەلەي قاتىسۋشىلاردىڭ ەموتسياسىن جەتكىزەتىن قاتاڭ دەرەكتى ستيلدە جازىلعان.
«كىتاپتاردا ۇلتتىق قاۋىپسىزدىك قىزمەتكەرلەرىنىڭ ءساتتى جۇزەگە اسىرعان وپەراتسيالارى تۋرالى باياندالادى. بۇل ەرلىكتىڭ ءبارى بىزگە, كوميتەت ادامدارىنا ايان, ال كىتاپ ەلگە جاپپاي تاراعاننان كەيىن ءبىزدىڭ باتىرلارىمىزبەن بۇكىل قازاقستان ماقتاناتىن بولادى. ءاربىر قازاقستاندىق ءۇشىن قاسيەتتى سانالاتىن ەل شەبىن كۇزەتۋ كەزىندەگى باستارىنان كەشىرگەن شيەلەنىسكە تولى وقيعالارى اشىپ ايتىلادى. كىتاپتى قولىنا الىپ, بەتتەرىن اشقان ساتتەن باستاپ وقىرمان ءوزىن كەيىپكەرلەرمەن بىرگە ەل شەبىندە جۇرگەندەي, بىرەسە جاياۋ, بىردە اتپەن, تاعى بىردە يتپەن بىرگە قارۋىن سەرت ۇستاپ, تاۋ اسىپ, تاس باسقانداي, سۋ كەشىپ, تەڭىزدىڭ تولقىندارىنا قارسى جۇزگەندەي اسەرگە بولەنەدى. شەكارادان وتكىزۋگە قاتاڭ تىيىم سالىنعان ەسىرتكى زاتىن تاسىمالداۋشىنى قۇرىقتاپ, تاۋدىڭ ىشىندە مال باعىپ بۇيىعى تىرشىلىك كەشىپ جاتقان شوپاننىڭ جانۇياسىن كەپىلگە العان قىلمىسكەردەن تايسالماعان شەكاراشىنى سۋ دا, ءورت تە العان بەتىنەن قايتارا المايتىنىن ايتىپ بەرەدى» دەدى ءوز سوزىندە ۇلتتىق قاۋىپسىزدىك گەنەرال-مايورى اسحات تولەۋوۆ.
سالتاناتتى جيىندا «وتاندىق ارناۋلى قىزمەتتىك حرونيكالارى. ادامدار, وقيعالار, فاكتىلەر تۋرالى حيكايالار» كىتابىندا جازىلعان وپەراتسيالارعا قاتىسۋشى قىزمەتكەرلەر مەن قاۋىپتى تاپسىرمالار كەزىندە قازا تاپقانداردىڭ تۋىستارى «ۇلتتىق قاۋىپسىزدىك كوميتەتى» كەۋدە بەلگىسى, العىس حاتتار جانە باعالى سىيلىقتارمەن ماراپاتتالدى. ولاردىڭ ىشىندە گەنەرال-مايور ەسەنگەلدى مۇستافەتوۆتىڭ جۇبايى, پولكوۆنيك تايبەك بەلەسوۆتىڭ بالالارى, وتستاۆكاداعى گەنەرال-مايور ءومىرتاي ماقاشۇلى, گەنەرال-مايور ميحايل داۋەنوۆتىڭ ۇلى, ۇق مايورى ازامات داۋەنوۆ جانە تاعى باسقا سالا قىزمەتكەرلەرى بار. قالىڭ وقىرمانعا ارنالعان كىتاپتىڭ 8000 داناسى جارىق كوردى. ولاردى «مەلومان» كىتاپتار دۇكەندەرى جەلىسىنەن ساتىپ الۋعا بولادى.
