نۇر-سۇلتان قالاسىندا «نۇرلى جەر» مەملەكەتتىك باعدارلاماسى اياسىندا «وتاۋ» تۇرعىن ءۇي كەشەنى پايدالانۋعا بەرىلدى. جاڭا كەشەندە 1 884 پاتەر بار.
«بۇل تۇرعىن ءۇي كەشەنىن شاعىن اۋدان دەسەك تە بولادى. كەلەسى جىلى بۇل اۋماقتا جاڭا مەكتەپ بوي كوتەرەدى. قازىردىڭ وزىندە جاڭا اۆتوبۋس باعىتى ۇيىمداستىرىلدى. بالاباقشا, مەديتسينالىق ورتالىق سەكىلدى باسقا دا الەۋمەتتىك ماڭىزدى نىساندار سالىنادى. اباتتاندىرۋ جۇمىستارى جۇرگىزىلەدى. ياعني تۇرعىنداردىڭ قولايلى ءومىر سۇرۋىنە بارىنشا جاعداي جاسالادى» دەدى جاڭا ۇيگە قونىستانعان تۇرعىنداردى قۇتتىقتاعان ەلوردا اكىمىنىڭ ورىنباسارى نۇرلان نۇركەنوۆ. نۇر-سۇلتان قالاسى ءماسليحاتىنىڭ حاتشىسى ەرلان كاناليموۆ ەلوردادا بەس جىل ىشىندە 50 مىڭ تۇرعىندى باسپانامەن قامتۋ جوسپارلانعانىن, بيىل جىل باسىنان بەرى 6 مىڭ تۇرعىنعا پاتەر كىلتى بەرىلگەنىن, ەندى قالعان 4 مىڭ پاتەر جىل سوڭىنا دەيىن بەرىلەتىنىن ءمالىم ەتتى.
