ناۋرىز ايىندا باستالعان قىرعىز كينوسى كۇندەرى استانادا جالعاسىن تاپتى. اتالعان مادەني ءىس-شارا اياسىندا قىرعىزستاننىڭ قازاقستانداعى ەلشىلىگىنىڭ مۇرىندىق بولۋىمەن «پەيىش. جۇماق – انا تابانىنىڭ استىندا» كينوسى كورسەتىلدى.
ءىس-شاراعا قىرعىز رەسپۋبليكاسىنىڭ قازاقستانداعى ەلشىسى داستان ديۋشەكەەۆ, قر مادەنيەت جانە اقپارات مينيسترلىگى مادەنيەت كوميتەتىنىڭ توراعاسى كۇمىس سەيىتوۆا, قر سىرتقى ىستەر مينيسترلىگىنىڭ, قىرعىز دياسپوراسىنىڭ وكىلدەرى قاتىستى. «بىرلەسكەن مادەني ءىس-شارالار وتكىزۋ ەكى ەل اراسىنداعى مادەني قارىم-قاتىناستى كۇشەيتۋگە سەرپىن بەرەدى. 25 ناۋرىز الماتى قالاسىندا «داراق ىرى» ءفيلمى كورسەتىلسە, بۇگىن استانا جۇرتشىلىعىنا قىرعىز كينوسىنىڭ ۇزدىك تۋىندىلارىن كورسەتۋگە مۇمكىندىك تۋدى. ماقساتىمىز – باۋىرلاس ەلدەر اراسىندا كەلىسىم مەن بىرلىكتى ودان ءارى نىعايتىپ, ۇلتتىق مادەنيەت پەن ءداستۇردى دارىپتەۋ. ءساۋىر ايىندا ەلوردادا ءبىر قىدىرۋ ءىس-شارالار وتكىزۋ جوسپارلاعان. سونىڭ ىشىندە اتى اڭىزعا اينالعان «ماناس» باتىردىڭ ەسكەرتكىشىن اشۋ, ەكى ەلدىڭ اقساقالدارى مەن شىعارماشىلىق ينتەلليگەنتسيالارى قاتىسقان دوڭگەلەك ۇستەل وتىرىسىن وتكىزۋ دە بار» دەدى كۇمىس سەيىتوۆا.
ەكى ەلدىڭ مادەني بايلانىسىن نىعايتىپ, كورشى ەلدەر كينو ءوندىرىسى سالاسىنا ءوزارا قولداۋ كورسەتۋ ماقساتىندا پرەمەراسى ناۋرىز مەرەكەسى قارساڭىندا قىرعىزستان مەن قازاقستان كينوتەاترلارىندا بىردەي وتكەن بۇل فيلمدە اقىل-ويى دامىماي قالعان جىگىتتىڭ ءومىرى, انا مەن بالانىڭ ماحابباتى بەينەلەنگەن. كينوكارتينانىڭ ءبىر بولىگى قازاقستان اۋماعىندا ءتۇسىرىلىپ, قازاق اكتەرلەرى دە رولدەردى سومداعان.
ايتا كەتەيىك, «پەيىش» كينوسىمەن قاتار, استانالىقتارعا قىرعىزدىڭ كومەديالىق جانرداعى «تەنيربەردي» (تاڭىربەردى) ءفيلمى دە كورسەتىلدى. سوڭعى كەزدەرى قازاقستان مەن قىرعىزستاننىڭ كينووندىرۋشىلەرى بىرلەسىپ, «ۇكىم» ءفيلمى سياقتى بىرنەشە جوبانى جۇزەگە اسىردى.
