استانا قالاسى اكىمدىگىنىڭ مۋزىكالىق جاس كورەرمەن تەاترىندا كەزەكتى پرەمەرا ءوتتى. ونەر ۇجىمى امەريكالىق دراماتۋرگ, پروديۋسەر, رەجيسسەر كەن ليۋدۆيگتىڭ «پريمادوننالار» تۋىندىسىن «Shoسk قىزدار» اتاۋىمەن ۇسىندى. قۋات ەجەمبەك قازاق تىلىنە اۋدارعان كومەديا جانرىنداعى قويىلىمنىڭ قويۋشى رەجيسسەرى – ەرنازار جاڭاتىلەك.
قۋ قۇلقىن نە ىستەتپەيدى؟ جوقشىلىقتان ابدەن تيتىقتاعان لەو («دارىن» مەملەكەتتىك جاستار سىيلىعىنىڭ لاۋرەاتى اسىلحان تولەپوۆ) مەن دجەك (اقەدىل يمانعالي) ەسىمدى ەكى جاس ءارتىس گازەتتەن ءولىم اۋزىندا جاتقان فلورەنس سنايدەر (ايدانا جەتەشوۆا) دەگەن قارت ميلليونەردىڭ بالالىق شاعىندا جوعالعان جيەندەرىن ىزدەپ جۇرگەنىن وقىپ قالادى دا, بۇل ولاردىڭ جالعىز مۇمكىندىگى ەكەنىن ءتۇسىنىپ, تاۋەكەلگە بەل بايلايدى. ەكەۋىن بۇل ءۇشىن ايەل كەيپىنە ەنۋى كەرەكتىگى دە توقتاتپايدى, سەبەبى جوعالعان جيەندەر – ماكسين مەن ستەفاني ەسىمدى قىزدار. ولارعا كەزدەيسوق سول جيەندەر شىققان پەنسيلۆانيا شتاتىنداعى يورك قالاسىنىڭ تۇرعىنى ودري (جانەل ەسەنگەلدينا) جولىعىپ, ماكسين مەن ستەفاني تۋرالى مالىمەتتى (اتا-انالارى ەسىمدەرىن, ەرەكشەلىكتەرىن) سودان ءبىلىپ الادى. ەگەر بۇل قۋلىق ءساتتى جۇزەگە اسسا, لەو مەن دجەك ارقايسىسى ءبىر ميلليون دوللارعا يە بولادى.
سول ۇمىتپەن قوس ءارتىس يورككە كەلەتىندەرى جونىندە جەدەلحات جىبەرەدى. بۇعان بولەلەرى مەگ (ارەلانا امانگەلديەۆا) قاتتى قۋانادى. ماكسين مەن ستەفانيدىڭ تابىلۋىمەن ول مۇراگەرلىك اقشانىڭ ءبىر بولىگىنەن ايىرىلاتىنى دا ونى قايعىرتپايدى. بىراق مەگتىڭ جىگىتى دۋنكاننىڭ (ەرنار مۇحامبەت) جۇرەگىنە كۇدىك ۇيالاپ, تابىلعان جيەندەر جيەندەر ەمەس, الاياقتار ەمەس پە دەپ دۇرىس ويلايدى. قويىلىمدا قۇلقىننىڭ قامىن ويلايتىن تاعى ءبىر كەيىپكەر بار. بۇل – قارت ميلليونەردىڭ جەكە دارىگەرى دوكتور مايەرس (ماقسات قابدەش). ول بايۋ ءۇشىن ۇلى بۋچتى (ماعجان ومار) تابىلعان جيەندەردىڭ بىرىنە ۇيلەنۋگە ۇگىتتەيدى. بىراق اقكوڭىل بۋچ ودريگە عاشىق.
جالپى كومەديادا باستى ورىنعا ماحاببات شىعىپ, ماحابباتتىڭ ماقساتى بايلىق ەمەس ەكەنىنە ەمەۋرىن بىلدىرىلەدى. لەو مەگكە, دجەك ودريگە عاشىق بولىپ قالادى. ال وتىرىكتەرى اشىلعاندا فلورەنس سنايدەر وتباسى قوس ءارتىستى كەشىرەدى, عاشىقتار ءبىر-بىرىنە قوسىلادى. سپەكتاكل ەرتەگى سياقتى جاقسىلىقپەن اياقتالادى.
كورەرمەندى كۇلكىگە قارىق قىلاتىن قويىلىمدا ستسەنوگرافيا جانە كيىم سۋرەتشىسى ارنا الپىسپاەۆانىڭ, قويۋشى بالەتمەيستەر كاميلا بۋزانوۆانىڭ ەڭبەكتەرىن اتاپ ءوتۋ كەرەك. ساحنادا باسى ارتىق ەشتەڭە بولماي, ادەمى بەزەندىرىلدى. كەيىپكەرلەردىڭ ءبيى جاراسىمدى بولدى. جالپى جەكە ءوزىمىزدى سپەكتاكلدىڭ ءوزى مەن وقيعاسى ەمەس, ارتىستەردىڭ ويىنى ءتانتى ەتتى. ءبارى دە جاندارىن سالا ويناپ, كورەرمەندەرگە جاقسى اسەر سىيلادى. وسى پرەمەرانى ەندى 11-12 ءساۋىر كۇندەرى تاماشالاۋعا بولادى.
