وركەنيەتتى ەلدەردە قىزمەت كورسەتۋ ساپاسى الدىڭعى ورىندا تۇرادى. كەز كەلگەن جەكە تۇلعا ساۋدا ورتالىعىنا, دامحاناعا نەمەسە قوناق ۇيگە باس سۇقسا, سول مەكەمەنىڭ مامانى الدىنان قۇشاق جايا شىعىپ, قۇدايى قوناعى كەلگەندەي جانى قالماي كۇتىپ, قىزمەت كورسەتىپ جاتادى. ءتىپتى, ول ازامات الگى ورىندارعا جاي كىرىپ شىقسا دا قىزمەتكەرلەر ىزگى ءىلتيپات ءبىلدىرىپ, شىعارىپ سالادى. مىنە, وسىدان-اق, ادامنىڭ مادەنيەتى, قالا بەردى قوعامنىڭ مادەنيەتى ايقىن كورىنەدى.
ارينە, ءبىز دە وركەندى ەلدىڭ ونەگەلى جولىنا بەت بۇردىق. ۋاقىت تالابى جاڭاشا ۇردىستەردى الىپ كەلدى. بۇگىنگى تاڭدا ەلوردادا ازىق-تۇلىك دۇكەندەرى مەن شاعىن ماركەتتەر, اتاعىنان ات ۇركەتىن ساۋدا ورتالىقتارىنان كوپ نارسە جوق. ودان قالدى اسحانا دەيسىڭ بە, ءدامحانا دەيسىڭ بە, ساۋلەتى مەن داۋلەتى كەلىسكەن رەستوراندار دا جەتەرلىك. ءزاۋلىم قوناق ۇيلەردىڭ دە سانى مولىراق. ءاپ-ساتتە ءتۇر-ءتۇسىڭىزدى ادەمىلەپ بەرەتىن ءسان سالوندارى دا كوپ. قىسقاسى, جەكە تۇلعالارعا قىزمەت كورسەتەتىن ورىنداردان اياق الىپ جۇرە المايسىز. ال ولاردىڭ قىزمەت كورسەتۋ ساپاسى قانداي؟.. ماسەلە وسىندا.
بىردە قىزىمنىڭ شاشىن قيدىرۋ ءۇشىن ءسان سالونىنا باردىق. – ون بەس مينۋت كىدىرە تۇرىڭىزدار, – دەدى ادمينيستراتور. قوش, كۇتكەن ۋاقىت ءوتتى, ەش حابار بولمادى. جارتى ساعاتتان استى. كىشكەنتايىم تىپىرشي باستادى. سالدەن سوڭ سالون قىزمەتكەرى شىعىپ, – مەنىڭ ۋاقىتىم جوق, باسقا كليەنت كەلەدى, – دەپ دۇڭك ەتكىزدى. قاراپايىم قۇرمەت تە, ءتىپتى, سونشاما كۇتكەن ۋاقىتىمىزدى العانى ءۇشىن كەشىرىم دە سۇراعان جوق. امالسىزدان باسقا سالونعا باردىق. ونداعى قىزمەت كورسەتۋ ساپاسى جوعارى دەڭگەيدە ەكەن. شاشتارازشى قىز سول دەمدە ەكى جاسار بالدىرعاننىڭ ءتىلىن تاۋىپ, ءۇيىرىپ الدى. قايشىدان قاتتى قورقاتىن قىزىم, قايتا سالوننان كوڭىلدەنىپ شىقتى.
تاعى ءبىر مىسال. تۇسكى ۋاقىتتا دامحاناعا اۋقاتتانۋعا باردىم. قاباعى ءتۇيۋلى, اسپازشى قىز سەلسوق قارسى الدى. مازىردەن قالاعان تاعامىمدى ايتتىم. تىرس ەتىپ ءلام دەگەن جوق. الدەن كەيىن تاسىر-تۇسىر ىدىسقا استى سالىپ, الدىما تارس ەتكىزدى. جۇرەگىم زىرك ەتە قالدى. كوڭىلى بولماي تۇرعان شىعار دەگەن ويمەن اقشامدى ۇسىندىم. ءبىر كەزدە اقشامنىڭ ارتىعىن قولىما ەمەس, وزىمە قاراي لاقتىرىپ جىبەردى. ول قالىقتاپ بارىپ, دىمقىل ەدەنگە ءتۇستى.
– قارىنداسىم, بۇنىڭىز نە, قولىما بەرسەڭىز بولماي ما؟ – دەدىم. كوزىمەن ءبىر الارا قارادى دا, ءوز جونىمەن كەتە بەردى.
راسى كەرەك, باس قالاداعى اسحانا مەن شاعىن كافەلەردىڭ سەرۆيستىك قىزمەتى كوپ جاعدايدا سىن كوتەرمەيدى. ارينە, بارلىعىنا بىردەي توپىراق شاشپايمىز. ولاردىڭ اراسىندا اتالعان قىزمەتكە تولىق جاۋاپ بەرەتىن ورىندار دا جەتكىلىكتى. دەگەنمەن, ادامدار كوپ شوعىرلانعان ورىندارداعى شاعىن ءدامحانالاردىڭ قىزمەت كورسەتۋ ساپاسىنا ونشا كوڭىلىمىز تولمايدى.
قىر استىنان «ەحرو 2017» حالىقارالىق كورمەسى قول بۇلعايدى. وعان الەمنىڭ بارلىق ەلى كوز تىگىپ وتىرعانى جاسىرىن ەمەس. قانشاما قوناق الىستان ات ارىتىپ كەلمەك. ال, ءبىز ولارعا ساپالى قىزمەت كورسەتۋگە دايىنبىز با؟!
ازامات ەسەنجول
