استاناعا جامبىل وبلىستىق قازاق دراما تەاترى ەكى كۇندىك گاسترولدىك ساپارمەن كەلدى. 80 جىلدىق تاريحى بار ونەر ورداسى ەلوردالىقتارعا ق.ىسقاق پەن ش.قۇسايىنوۆتىڭ «قازاقتار» تاريحي دراماسىن, ي.ساپاربايدىڭ «سىعان سەرەناداسى» مۋزىكالىق دراماسىن جانە كىشكەنتاي كورەرمەندەرگە ارناپ ءا.فايزۋللاۇلىنىڭ «التىن ادام» ەرتەگىسىن ۇسىنادى.
استانادا كەشەدەن بەرى ءجۇرىپ جاتقان اتالمىش قويىلىمداردى استانالىقتار «جاستار» تەاترىنىڭ ساحناسىنان تاماشالاي الادى. سپەكتاكلدەر بۇگىن دە جالعاسادى. جامبىلدىقتاردىڭ ەلورداعا ساپارى قازاقستان رەسپۋبليكاسى تاۋەلسىزدىگىنىڭ 25 جىلدىعى مەن تەاتردىڭ 80 جىلدىعىنا ورايلاستىرىلىپ وتىر. «ەلىمىزدىڭ باس قالاسىنا كەلۋىمىزدىڭ ماقساتى – استانا قالاسى كورەرمەندەرىمەن جۇزدەسىپ, شىعارماشىلىق ەسەپ بەرۋ. اكتەرلىق ونەردى حالىق اراسىنا كەڭىنەن ناسيحاتتاپ, تەاتر ونەرىنىڭ دامۋىنا ىقپال ەتۋ» دەيدى تەاتر ۇجىمى.
وسى ونەر ورداسىنىڭ استانالىقتارعا ۇسىنىپ وتىرعان قويىلىمدارىنا كەلسەك, «قازاقتار» تاريحي دراماسى بىلتىر قازاق حاندىعىنىڭ 550 جىلدىعىنا وراي قازاقستاننىڭ حالىق ءارتىسى ەرسايىن تولەۋبايدىڭ باسشىلىعىمەن ساحنالاندى. وندا قازاق حاندىعىنىڭ قۇرىلعان كەزەڭىنەن باستاپ, سول جولدا كەرەي مەن جانىبەك سۇلتانداردىڭ الدارىنان شىققان قيىندىقتار سۋرەتتەلەدى. دراما ارقىلى كورەرمەن ءابىلحايىر, ءاز-جانىبەك, كەرەي, قاسىم, بۇرىندىق, ادىك سىندى تاريحي تۇلعالاردى تاني تۇسەدى.
«سىعان سەرەناداسى» مۋزىكالىق دراماسى حالقىمىزدىڭ ءبىرتۋار كومپوزيتورى ءشامشى قالداياقوۆ ومىرىنەن ءبىر ۇزىك سىر شەرتەدى. ال, «التىن ادام» ەرتەگىسى وتكەن عاسىردا ەسىك قورعانىنان تابىلعان التىن ادامدى ءتىرىلتىپ, سونىڭ باسىنان وتكەن حيكايالاردى قىزىقتى ەتىپ باياندايدى. سول ارقىلى بالالاردى تاريح تىلسىمىنا جەتەلەيدى.
امانعالي قالجانوۆ
