استاناداعى «نۇر وردا» مەكتەپ-ليتسەيىندە «KATEV» حالىقارالىق قوعامدىق قورىنىڭ مۇرىندىق بولۋىمەن قازاق-تۇرىك ليتسەي وقۋشىلارىنىڭ اراسىندا رەسپۋبليكالىق «جاس جاسامپازدار جوبا جارىسى» مەن «روبوتوتەحنيكا» سايىسى باستالدى.
ەلباسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» جولداۋى اياسىندا – «جاس جاسامپازدار جوبا جارىسى» وسىمەن ءۇشىنشى مارتە ۇيىمداستىرىلىپ وتىر. ال «روبوتوتەحنيكا» سايىسى بيىل العاش رەت وزگەشە ويلايتىن العىر جاسوسپىرىمدەردىڭ شىعارماشىلىق پەن لوگيكالىق قاسيەتتەرىن ۇشتاپ, ۋاقىت تالابىنا ساي قاجەتتى حاي-تەك جانە نانوتەحنولوگيالاردى دامىتۋ ءۇشىن وتكىزىلۋدە. وعان ەلىمىزدىڭ بارلىق وڭىرىندەگى قازاق-تۇرىك ليتسەيلەرىنەن 200-دەن اسا وقۋشى قاتىسۋدا. بايقاۋدا بالالار روبوت جاسايتىن جاڭا ۇلگىدەگى «لەگو-روبوت» سەكىلدى باعدارلامالاردى پايدالانادى. قازىلار قۇرامىنا وسى سالادا ەڭبەك ەتىپ جۇرگەن وتاندىق جانە شەتەلدىڭ بىلىكتى ماماندارى شاقىرىلعان. جوعارى باعالانعان وقۋشىلاردىڭ جوبالارى «ستارتاپ» رەتىندە قاراستىرىلىپ, كاسىپكەرلىكتە قولدانىلماق.
سالتاناتتى شاراعا قر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتاەۆا, «KATEV» حالىقارالىق قوعامدىق قورىنىڭ ۆيتسە-پرەزيدەنتى ابدۋراحمان سەل, استانا قالاسىنىڭ ءماسليحات دەپۋتاتى گايدار قاسەنوۆ, رەسپۋبليكالىق دارىن عىلىمي-پراكتيكالىق ورتالىعىنىڭ ديرەكتورى شولپان قيراباەۆا سەكىلدى جاۋاپتى تۇلعالار قاتىسىپ, وقۋشىلارعا يگى تىلەكتەرىن ءبىلدىردى.
سايىستا جۇلدەگەر اتانعان جەتكىنشەكتەر كورەيا مەن برازيليادا وتەتىن جارىسقا جولداما الادى.
ازامات ەسەنجول
