بيىلعى مادەنيەت جانە ونەر سالاسى ۇيىمدارى مەن قىزمەتكەرلەرىنىڭ III رەسپۋبليكالىق «رۋحاني قازىنا – 2020» بايقاۋى ونلاين فورماتتا ۇيىمداستىرىلدى.
ءۇشىنشى مارتە ءوتىپ وتىرعان بايقاۋعا ءار وڭىردەگى مۋزەيلەر, كىتاپحانالار, مادەنيەت ۇيلەرى مەن اۋىلدىق كلۋب قىزمەتكەرلەرى قاتىسۋدا. وڭىرلەردەگى ىرىكتەۋ كەزەڭى 14 قىركۇيەككە دەيىن ءوتىپ, ۇزدىك شىققاندار رەسپۋبليكالىق كەزەڭگە جولداما العان بولاتىن. ءار سالا بويىنشا ىرىكتەۋ جۇمىستارىن باعالاۋ تىكەلەي ەفيردە كورسەتىلدى. مىسالى, كىتاپحانا سالاسى بويىنشا ۇلتتىق اكادەميالىق كىتاپحاناسىنىڭ, مۋزەي سالاسى بويىنشا ۇلتتىق مۋزەيدىڭ, ال مادەنيەت ۇيىمدارىنىڭ ۇزدىكتەرىن انىقتاۋ «قازاقكونتسەرت» مەملەكەتتىك كونتسەرتتىك ۇيىمىنىڭ Facebook پاراقشالارىندا تىكەلەي ەفيردە ءوتتى.
رەسپۋبليكالىق كەزەڭگە قاتىسۋ ءۇشىن ەلىمىزدىڭ 17 وڭىرىنەن 180-نەن استام ءوتىنىم كەلىپ ءتۇستى. سونىڭ ىشىندە كىتاپحانا سالاسى بويىنشا – 80 ءوتىنىم, مۋزەي ءىسى بويىنشا – 42 ءوتىنىم, مادەنيەت ۇيلەرى, كلۋبتار سالاسى بويىنشا 60 ءوتىنىم بولدى.
جەڭىمپازداردى ماراپاتتاۋ ءراسىمى 7 قازاندا نۇر-سۇلتان قالاسىندا ەپيدەميولوگيالىق جاعدايدى ەسكەرىپ, ونلاين فورماتتا نەمەسە كارانتين تالاپتارىن ساقتاي وتىرىپ تەك قانا جۇلدەگەرلەردىڭ قاتىسۋىمەن قر ۇلتتىق مۋزەيىندە وتەدى دەپ جوسپارلانۋدا. ماراپاتتاۋ ءراسىمى مادەنيەت جانە سپورت مينيسترلىگىنىڭ Youtube, Facebook رەسمي پاراقشالارىندا تىكەلەي ەفيردە كورسەتىلەدى.
